Tihlabelelo 27 - Siswati 1996 Bible

Simakadze ukukhanya kwami nensindziso yami

Sihlabelelo saDavide.

¹ Simakadze usibane sami nensindziso yami. Ngiyakwesaba bani? Simakadze uyinqaba yami yekufihla kuphila kwami. Pho, ngubani lengingamesaba?

² Nangihlaselwa ngulababi betama kungimita bangibulale, ngihlaselwe titsa nalabamelene nami, bayawukhubeka, bawele phansi.

³ Nome ngingavinjetelwa yimphi, inhlitiyo yami ingeke yesabe; nome titsa tingangihlasela, noko ngiyawuhlala nginelitsemba kuNkulunkulu.

⁴ Kunye kuphela lengakucela kuSimakadze, ngiko kodvwa lengikufunako: kutsi ngihlale endlini yaSimakadze onkhe emalanga ekuphila kwami, ngibukisise buhle baSimakadze, ngizindle ngaye ngisethempelini lakhe.

⁵ Uyawungibhacisa ngaphansi kweluphahla lwakhe ngelilanga lenhlupheko. Uyawungifihla ethendeni lakhe, angisimise edvwaleni leliphakeme.

⁶ Titsa tami letingitungeletile ngiyawutimela ngenhla, nginikele imihlatjelo ngekudvumisa endlini yakhe. Tibongo teNkhosi ngiyawutihlabela ngenjabulo.

⁷ Ngive Simakadze, nangikhala kuwe ngelivi lelikhulu, ube nemusa kimi, ungiphendvule.

⁸ Wena utsite: “Funani buso bami.” Mine-ke enhlitiyweni yami ngitsi: “Buso bakho, Simakadze, ngiyabufuna.”

⁹ Ungabufihli buso bakho kimi. Ungayincandzi ngentfukutselo inceku yakho, nguwe Somandla, lolusito lwami. Ungangiyekeleli, ungangilahli! Wena unguNkulunkulu wensindziso yami.

¹⁰ Nome bobabe namake bangilahlile, kodvwa wena, Simakadze, utangemukela ungigcine.

¹¹ Ngifundzise indlela yakho, Simakadze, ungihole endleleni lecondzile ngenca yetitsa tami.

¹² Unganginikeli entsandvweni yalabalwa nami, ngobe bofakazi bemanga bangivukele, baphefumula lusongo nebudlova.

¹³ Impela ngiyakholwa nguloku: Buhle baSimakadze ngiyawububona ngisaphila kulomhlaba!

¹⁴ Tsemba kuSimakadze, cina ungadzangali, ube nesibindzi. Yebo, tsemba kuSimakadze.