Tihlabelelo 24 - Siswati 1996 Bible

INkhosi yeludvumo

Sihlabelelo saDavide.

¹ Umhlaba nako konkhe lokukuwo kwaSimakadze, emave kanye nabo bonkhe labahlala kuwo kwakhe,

² ngobe wakusimisa etikwetilwandle, wakusekela ekujuleni kwemanti.

³ Ngubani loyakwenyuka intsaba yaSimakadze? Ngubani loyakuma endzaweni yakhe lengcwele?

⁴ Ngulowo lonetandla letihlantekile nalonenhlitiyo lengenacala longawulibatisi ngelite umphefumulo wakhe, nalongawafungeli emanga.

⁵ Simakadze uyawumbusisa, yebo, Nkulunkulu wensindziso uyawumenta abe msulwa.

⁶ Ngulesi-ke situkulwane salabo labamfunako, labafuna buso bakho, Nkulunkulu waJakobe. Cabanga.

⁷ Nine masango, vulekani! Nani minyango yasemandvulo vulekani nitsi nge, kuze iNkhosi yeludvumo itewungena.

⁸ Ngubani leNkhosi yeludvumo? NguSimakadze, lichawe lelinemandla, Simakadze lolichawe lekulwa.

⁹ Nine masango, vulekani! Nani minyango yasemandvulo vulekani nitsi nge, kuze iNkhosi yeludvumo itewungena.

¹⁰ Ngubani yona leNkhosi yeludvumo? Nguye Nkulunkulu longuSomandla, nguye loyiNkhosi yeludvumo. Cabanga.