Tihlabelelo 22 - Siswati 1996 Bible

Sililo sekuhlupheka nendvumiso yaNkulunkulu

Sihlabelelo saDavide lesetfulwe kumhlabelisi kutsi sihlatjelwe ngendlela letsi: “Imbabala yentsatsakusa.”

¹ Nkulunkulu wami! Nkulunkulu wami! Ungishiyeleni? Ukhashane leni nekungisita? Ukhwesheleni emavini ekukhala kwami?

² Awu, Nkulunkulu wami! Emini ngiyakhala, kodvwa awungiphendvuli; nasebusuku ngikhale, ngingaphumuli.

³ Wena ungcwele, indvumiso yema-Israyeli sihlalo sakho sebukhosi.

⁴ Bokhokho betsembela kuwe; bakwetsemba, wabakhulula.

⁵ Bakhala kuwe, wabasindzisa; bakwetsemba, abazange bajabhiswe.

⁶ Kepha mine angisesiye muntfu walutfo, sengaba ngumbungu nje, ngisetfuko sebantfu, nenhlekisa esiveni.

⁷ Bonkhe labangibonako bayangiphukuta, badvubula imilomo bancife, banikine netinhloko, batsi:

⁸ “Phela lowo wetsembele kuSimakadze, akamkhulule yena-ke, loSimakadze wakhe; amphephise, ngobe phela usime ngaye.”

⁹ Empeleni nguwe lowangikhipha esiswini samake; wangenta ngetsembela kuwe, kusukela ngisamunya.

¹⁰ Ngetfulwa kuwe kwasekutalweni kwami, waba nguNkulunkulu wami kusukela esiswini samake.

¹¹ Ungakhweshi kimi, ngobe inhlupheko isedvute nami, kute nalongangisita.

¹² Titsa letinyenti tingitungeletile, tinkunzi letinemandla taseBhashani tingivimbetele.

¹³ Tingikhamisele imilomo yato njengemabhubesi labhodla adladlabule.

¹⁴ Ngicitseke njengemanti, emalunga ami onkhe ahhehlulukile, inhlitiyo yami igucuke yaba ngumtfwebeba, yancibilika ngekhatsi kwami.

¹⁵ Emandla ami ome njengeludzengelo, lulwimi lwami lunamatsele elwangeni; wena ungilalisa phansi elutfulini lwekufa.

¹⁶ Yebo-ke, tinja tingihace ndzawo tonkhe, nesicumbi salababi singitungeletile, singibhobose tandla netinyawo.

¹⁷ Sengondze ngingumbambotiyabalwa, bayangigolotela bangihheletele.

¹⁸ Behlukaniselana ngetimphahla tami, bentelane inkatho ngengubo yami.

¹⁹ Kodvwa wena, Simakadze, ungabi khashane nami! Awu, mandla ami, ngiphutfume ungisite.

²⁰ Sindzisa umphefumulo wami enkembeni, nekuphila kwami lokuligugu ukwephule emlonyeni wetinja.

²¹ Ngephule emlonyeni welibhubesi, ungisindzise etimphondvweni tetinyatsi.

²² Ngiyawulimemetela kubomnaketfu libito lakho ngikudvumise emkhatsini welibandla, ngitsi:

²³ “Nine lenesaba Simakadze, mdvumiseni! Nani nonkhe madvodzana aJakobe, mtuseni! Nonkhe nine ntalo ya-Israyeli, mhlonipheni!

²⁴ Ngobe akedzelelanga akanengwanga yinhlupheko yalohluphekako. Akabufihlanga buso bakhe kuye, wamuva nakakhala, acela lusito kuye.”

²⁵ Ungivusela lusinga lwekudvumisa emkhatsini welibandla lelikhulu. Tifungo tami ngiyawutifeza tigcwaliseke embikwabo bonkhe labakwesabako.

²⁶ Labatitfobako bayawudla besutse, labafuna Simakadze bayawumdvumisa, bahalaliselwe kutsiwe: “Shangatsi ningaphila phakadze naphakadze!”

²⁷ Umhlaba wonkhe uyakukhumbula ugucukele kuSimakadze, yonkhe imindeni netive temhlaba tiyawukhotsama embikwakhe,

²⁸ ngobe bukhosi baSimakadze, nguye lobusa etikwetive.

²⁹ Yebo, bonkhe labacebile emhlabeni, bayawudla bakhotsame embikwakhe; bonkhe labayakuya phansi elutfulini, bayawuguca embikwakhe bakhonte, yebo, nabo bonkhe labangeke batibambe kutsi bafe.

³⁰ Titukulwane takusasa titawumkhonta, bantfu bayawusala balandzise ngaSimakadze etitukulwaneni nasetitukulwaneni.

³¹ Sive lesiyawutalwa siyawutjelwa kutsi: “Simakadze wasisindzisa sive sakhe.”