Tihlabelelo 20 - Siswati 1996 Bible

Umthandazo wenkhosi wekuncoba

Sihlabelelo saDavide lesetfulwe kumhlabelisi.

¹ Shangatsi Simakadze angakuphendvula, ngelilanga lekuhlupheka! Shangatsi libito laNkulunkulu waJakobe lingaba siphephelo sakho!

² Akakutfumelele lusito lwasendlini lengcwele akusekele asentsabeni yakhe iSiyoni.

³ Akayikhumbule yonkhe iminikelo yakho, ayemukele neminikelo yakho yekushiswa. Cabanga.

⁴ Akakuphe njengekufisa kwenhlitiyo yakho, afeze tonkhe tinhloso takho.

⁵ Asimemete sijabulele kuncoba kwakho, asibetsele sishaye tandla egameni laNkulunkulu wetfu. Shangatsi Simakadze angaphumelelisa tonkhe ticelo takho.

⁶ Nyalo sengiyati kutsi Simakadze uyamsindzisa logcotjiwe wakhe, uyawumphendvula asezulwini lakhe lelingcwele, amphendvule ngemandla akhe ekusindzisa, esandla sakhe sangesekudla.

⁷ Labanye bantfu bachoshe ngetincola temphi, labanye bachoshe ngemahhashi, kodvwa tsine sigabe ngelibito laSimakadze longuNkulunkulu wetfu.

⁸ Labantfu bacimuleka bawe phansi, kepha tsine sima sitsi zica.

⁹ Yebo, Simakadze, sindzisa inkhosi, uyiphe kuncoba. Shangatsi Simakadze angasiphendvula, nasikhala kuye.