Tihlabelelo 17 - Siswati 1996 Bible

Umthandazo wekucela kuphephiswa kulababi

Umkhuleko waDavide.

¹ Awu, Simakadze, ase ulalele kuncusa kwami lokumsulwa. Beka indlebe yakho emthandazweni wami, lophuma emlonyeni lote inkhohliso.

² Kwehlulelwa kwami akuvele kuwe, emehlo akho abuke lokulungile.

³ Uvivinye inhlitiyo yami, wangivakashela utengihlolisisa ebusuku, kepha awutfolanga lutfo lolubi kimi. Nome ngicabange lokubi, kodvwa umlomo wami awuzange ukhulume lokubi.

⁴ Macondzana nemisebenti yebantfu mine ngitigadze ngekulalela livi lakho, ngaticwaya tindlela talabatidlova.

⁵ Tinyatselo tami tisemikhondvweni yakho, ngiko nje tinyawo tami tingasheleli.

⁶ Ngincusa kuwe, ngobe wena, Nkulunkulu, utangiphendvula; beka indlebe yakho, ulalele emavi ami.

⁷ Khombisa ubonakalise umusa wakho lomangalisako. Wena ungumsindzisi walabo labatsi nababaleka etitseni tabo bete kuwe, njengesiphephelo sabo.

⁸ Ngilondvolote njengenhlavu yeliso. Ngifihle ngaphansi kwemaphiko akho,

⁹ ungivikele kulababi labangihlaselako nasetitseni tami lese tingitungeleta.

¹⁰ Tinhlitiyo tabo atinasihawu, imilomo yabo ikhuluma kutigabatisa kodvwa.

¹¹ Nome siyaphi bayasihaca, emehlo abo bawabhekise ngakitsi, kutsi basiwise.

¹² Banjengelibhubesi lelifuna kubamba inyamatane; bafana neliwundlwana lelibhubesi lelibhace etindzaweni letisitsele.

¹³ Vuka Simakadze! Hlangabeta lomubi umlahle phansi. Sindzisa umphefumulo wami kuye ngenkemba yakho.

¹⁴ Simakadze, ngephule ngesandla sakho etandleni talabagungubele ngetintfo talomhlaba. Bajezise ngekuhlupheka lobabekele kona. Shangatsi kungenela bona kanye nebantfwababo, kwendlulele nakubatukulu bebatukulu babo.

¹⁵ Mine-ke ngiyawububona buso bakho, ngobe ngingulolungile, mhlazana ngivuka ngiyakweneliswa bukhona bakho.