Tihlabelelo 147 - Siswati 1996 Bible

IJerusalema ayibonge tibusiso taSomandla

¹ Haleluya, dvumisani Simakadze! Maye, kuhle kuhlabela kuNkulunkulu wetfu. Kumnandzi, futsi kufanele kutsi advunyiswe!

² Simakadze wakha iJerusalema kabusha, ubutsa labasakatekile baka-Israyeli.

³ Labanetinhlitiyo letephukile uyabaphilisa, abophe emanceba abo.

⁴ Ubala inombolo yetinkhanyeti, atibite tonkhe ngemabito ato.

⁵ Mkhulu Simakadze wetfu, nemandla akhe makhulu, kuhlakanipha kwakhe akunakulinganiswa.

⁶ Simakadze uyabaphakamisa labatfobekile, kepha lababi ubehlisela phansi.

⁷ Hlabelani kuSimakadze ngekubonga; dvumisani Nkulunkulu wetfu ngekushaya ihabhu.

⁸ Yena losibekela sibhakabhaka ngemafu, alungisele umhlaba imvula, ahlumise tjani etintsabeni.

⁹ Tilwane utipha kudla, afunte emazini emahhwabayi nasalambile.

¹⁰ Simakadze akatfokotiswa ngemandla emahhashi emphi; nemasotja lahlomile lahamba ngetinyawo angeke amjabulise.

¹¹ Simakadze ujatjuliswa ngulabamesabako nalabetsemba umusa wakhe.

¹² Awu, Jerusalema, dvumisa Simakadze! Awu, Siyoni, dvumisa Nkulunkulu wakho!

¹³ Ngobe nguye locinisa imivalo yemasango akho, abusise bantfu bakho,

¹⁴ ente iminyele yakho ibe nekuthula, anesutsise ngakolweni lomnandzi.

¹⁵ Ukhipha umyalo wakhe uye emhlabeni, livi lakhe ligijima ngalamakhulu ematubane.

¹⁶ Ukhitsikisa lichwa njengeboya betimvu, asakate sitfwatfwa njengemlotsa,

¹⁷ ehlise sangcotfo sakhe njengetinhlavu. Ngubani nje longemelana nemakhata akhe?

¹⁸ Utfumela livi lakhe likuncibilikise, avuse umoya wakhe, emanti agobhote.

¹⁹ Wembula livi lakhe kuJakobe, timiso nemiyalo yakhe ku-Israyeli.

²⁰ Kute sive lake wenta njalo kuso, kute sive lesake sati timiso takhe. Haleluya, dvumisani Simakadze.