Tihlabelelo 145 - Siswati 1996 Bible

Sekubonga sisa nemandla aNkulunkulu

Sihlabelelo saDavide sekudvumisa.

¹ Ngiyawuphakamisa wena, Nkulunkulu wami neNkhosi yami, ngituse libito lakho phakadze naphakadze.

² Ngiyawukubabata onkhe emalanga, ngidvumise libito lakho phakadze naphakadze.

³ Mkhulu Simakadze, ufanele kudvunyiswa kakhulu, bukhulu bakhe abuphenyisiseki.

⁴ Titukulwane ngekwelamana kwato tiyawubikelana ngemisebenti yakho; tiyawumemetela ngemisebenti yakho yemandla.

⁵ Tiyawukhuluma ngenkhatimulo yakho, tikhulume ngebukhosi bakho; mine ngiyawuzindla ngemisebenti yakho lemangalisako.

⁶ Bantfu bayawubabata bukhulu bemandla akho, nami ngibabate bukhulu bakho.

⁷ Bayawubalisa ngeludvumo lwakho, nangebukhulu betento takho letinhle, bahlabele ngekulunga kwakho.

⁸ Simakadze unemusa nesihawu, uyephuta kutfukutsela, andze ngemusa.

⁹ Simakadze muhle kubo bonkhe, uyayihawukela imisebenti yakhe yonkhe.

¹⁰ Yonkhe indalo netidalwa takho tiyawubonga tidvumise wena, Simakadze, nalabangcwele bonkhe bakudvumise.

¹¹ Bayawudvumisa ngenkhatimulo yebukhosi bakho, bashumayele ngemandla akho;

¹² kuze bonkhe bantfu emhlabeni bayati imisebenti yakho yemandla, kanye nenkhatimulo yebukhosi bembuso wakho.

¹³ Umbuso wakho ungumbuso lome kuze kube phakadze, lombuso uyawuhlala ukhona, titukulwane ngetitukulwane. Simakadze wetsembekile kuto tonkhe tetsembiso takhe. Unemusa kuyo yonkhe imisebenti yakhe.

¹⁴ Simakadze uyabaphasa bonkhe labawako, abaphakamise bonkhe labatfotjisiwe.

¹⁵ Emehlo endalo yonkhe abheke kuwe, uyipha kudla ngesikhatsi lesifanele.

¹⁶ Uvula sandla sakho, wesutsise tonkhe tifiso talokuphilako.

¹⁷ Simakadze ulungile kuto tonkhe tindlela takhe, unemusa emisebentini yakhe yonkhe.

¹⁸ Simakadze usedvute nabo bonkhe labambitako, bonkhe labambita ngeliciniso.

¹⁹ Wesutsisa kufisa kwabo bonkhe labamesabako, uyabeva nabakhalako, abasindzise.

²⁰ Simakadze uyabalondvolota bonkhe labamtsandzako, kepha lababi bonkhe uyawubabhubhisa.

²¹ Umlomo wami uyawukhuluma ludvumo lwakho, Simakadze, tonkhe tidalwa atibonge libito lakho lelingcwele kuze kube phakadze naphakadze.