Tihlabelelo 144 - Siswati 1996 Bible

Inkhosi Davide ibonga Nkulunkulu ngekuncoba kwayo

Sihlabelelo saDavide.

¹ Akabongwe Simakadze lolidvwala lami, lowente tandla tami tafundzela kuhlasela neminwe yami yafundzela kulwa.

² UnguNkulunkulu wami lowetsembekile nenqaba yami lengibalekela kuyo, usiphephelo sami nemkhululi wami, usihlangu sami lengiphephela kuso. Wenta tive tikhotsame kimi.

³ Awu, Simakadze, uyini umuntfu kutsi ungadzimate umnake? Indvodzana yemuntfu bekuyini kutsi ungadzimate uyikhumbule?

⁴ Umuntfu ufanana nemoya nje; emalanga ekuphila kwakhe afanana nesitfunti lesendlulako.

⁵ Khotsamisa emazulu akho, Simakadze, wehle; tsintsa tintsaba tibhunye.

⁶ Bashaye ngelitulu ubadvungulule bacibe ngemicibisholo yakho, baphitsitele.

⁷ Yelula sandla sakho wena Longetulu, ngikhulule, ungenyule etikhukhuleni temanti lanemandla, ungenyule nasesandleni sebetive,

⁸ labamlomo wabo ukhuluma inkhohliso, bafunga bagomele ngesandla sabo sangesekudla bafungele bufakazi lobungemanga.

⁹ Ngiyawuhlabela kuwe, Nkulunkulu, ngihlabele ingoma lensha, ngishaye ihabhu lenetintsambo letilishumi.

¹⁰ Nguwe lonika emakhosi kuncoba, uphephise inceku yakho lenguDavide.

¹¹ Ngisindzise enkembeni lenelunya, ungiphephise esandleni sebafokati labamlomo wabo ukhuluma inkhohliso, nesandla sabo sekudla singesekudla semanga.

¹² Shangatsi emadvodzana etfu angaba njengetitfombo letinhle ebusheni bawo, nemadvodzakati etfu afanane nematje labatiwe, alungiselelwa kwakha tigodlo temakhosi.

¹³ Shangatsi tinyango tetfu tingagcwaliswa ngesivuno sekudla lokunhlobonhlobo. Kanjalo netifuyo tetfu shangatsi tingandza, titalane ngetinkhulungwane nangemashumi etinkhulungwane.

¹⁴ Shangatsi tinkhomo tetfu tingawatsela emankhonyane, kubete letiphuntako naletilatelwako, shangatsi kungabate kukhala nekuhlupheka eveni letfu.

¹⁵ Sibusisiwe sive lesinaletibusiso! Sibusisiwe leso sive Nkulunkulu waso lekunguSimakadze!