Tihlabelelo 140 - Siswati 1996 Bible

Umthandazo wekucela kuvikelwa

Sihlabelelo saDavide lesetfulwe kumhlabelelisi.

¹ Simakadze, ngisindzise kubantfu lababi, ngephule kubantfu labatidlova,

² bantfu labahlose lokubi etinhlitiyweni tabo. Onkhe emalanga bacubungula emasu etimphi.

³ Balola tilimi tabo tibe njengetetinyoka. Sihlungu sato sisemilonyeni yabo. Cabanga.

⁴ Simakadze, ngeluse ungivikele emandleni alababi; ngephule kubantfu labatidlova, labahlose kungigila ngiwe.

⁵ Bantfu labatigabatisako bangibekele lugibe, bangicuphe ngetintsambo telugibe, bangibophele emafindvo endleleni yami. Cabanga.

⁶ Ngatsi kuwe, Simakadze: “Wena unguNkulunkulu wami.” Nkhosi, ngive nangikhalela lusito kuwe.

⁷ Awu, Simakadze, Nkulunkulu wami, Msindzisi wami lonemandla, wena uvikela inhloko yami ngesikhatsi semphi.

⁸ Simakadze, tifiso talababi ungatiphumelelisi, ungawaphumelelisi emasu abo lamabi, funa batigabatise. Cabanga.

⁹ Labo labangitungeletile labatigcabhako bubi labasongela kubenta kimi abehlele kubo.

¹⁰ Shangatsi emalahle labovu lavutsako angatfululelwa etikwabo, bajikijelwe emgodzini loshonako, bangaphindzi baphume.

¹¹ Shangatsi labo labacambela labanye emanga, bangete baphumelela. Shangatsi bubi bungahlasela tidlova.

¹² Ngiyati kutsi Simakadze uyayimelela indzaba yalohluphekile, awamelele nemalungelo alomphofu.

¹³ Impela labalungile bayawubonga libito lakho, labacotfo bayawuhlala ebukhoneni bakho.