Tihlabelelo 138 - Siswati 1996 Bible

Umthandazo wekubonga umusa weNkhosi

Sihlabelelo saDavide.

¹ Ngiyakubonga, wena Simakadze, ngayo yonkhe inhlitiyo yami; ngikunika ludvumo embikwabo bonkhe bonkulunkulu.

² Ngiyawukhuleka embikwelithempeli lakho lelingcwele, ngibonge libito lakho ngenca yemusa wakho nekwetsembeka kwakho. Ngobe libito lakho nelivi lakho uliphakamisele ngetulu kwako konkhe.

³ Ngatsi nangikhala kuwe, wangiva wangiphendvula, wanginika sibindzi ngekungicinisa.

⁴ Onkhe emakhosi emhlaba ayawukubonga wena, Simakadze, ngobe awevile emavi akho.

⁵ Ayawuhlabelela wena, Simakadze, ngobe bukhulu bukhosi baSimakadze.

⁶ Nome Simakadze aphakeme kangaka, uyabanakekela labatitfobako; kodvwa labatiphakamisako ubabukela khashane.

⁷ Nome sengitungeletwe tinhlupheko, wena, Simakadze, uyayiphephisa imphilo yami, ungivikele elulakeni lwetitsa tami, unginyomule ngesandla sakho sekudla.

⁸ Simakadze uyawusifeza kimi setsembiso sakhe; umusa waSimakadze ume kuze kube phakadze. Cedzela lomsebenti wakho lowawusungula, ungawukhohlwa umsebenti wetandla takho.