Tihlabelelo 135 - Siswati 1996 Bible

Ingoma yekudvumisa

¹ Haleluya, dvumisani Simakadze! Dvumisani libito laSimakadze! Mdvumiseni Simakadze, nine tinceku takhe,

² nine lenikhonta endlini yaSimakadze nasemabaleni endlu yaNkulunkulu wetfu.

³ Dvumisani Simakadze, ngobe yena muhle. Hlabelani nidvumise libito lakhe, ngobe yena unelutsandvo.

⁴ Ngobe Simakadze utikhetsele Jakobe kutsi abe wakhe, ukhetse Israyeli kutsi abe lifa lakhe.

⁵ Ngiyati kutsi mkhulu Simakadze, nekutsi Simakadze wetfu ungetulu kunabo bonkhe bonkulunkulu.

⁶ Konkhe Simakadze lakutsandzako uyakwenta emazulwini nasemhlabeni, etilwandle kanye nasekujuleni konkhe.

⁷ Nguye lokhuphula tinkhungu emikhawulweni yemhlaba. Wenta imibane ilandzelwe yimvula. Ukhipha imimoya etingosini takhe.

⁸ Nguye lowashaya ematubulo aseGibhithe, ebantfu kanye newetilwane.

⁹ Watfumela tibonakaliso netimangaliso, emkhatsini wakho, wena Gibhithe, wamelana naFaro kanye netinceku takhe tonkhe.

¹⁰ Washaya tive letinyenti, wabulala emakhosi lanemandla.

¹¹ Wabulala Sihoni, inkhosi yema-Amori. Wabulala Ogi, inkhosi yaseBhashani, kanye nawo onkhe emakhosi aseKhenani.

¹² Wenta live lawo laba lifa, walenta lifa laka-Israyeli, sive sakhe.

¹³ Simakadze, libito lakho lime kuze kube phakadze. Nkhosi, titukulwane ngetitukulwane tiyawuhlala tikukhumbula.

¹⁴ Simakadze uyawubavikela bantfu bakhe, ahawukele tinceku takhe.

¹⁵ Tithico tebetive tiyigolide nesiliva, tingumsebenti wetandla temuntfu.

¹⁶ Tinemilomo, kodvwa atikhulumi, tinemehlo, kodvwa atiboni,

¹⁷ tinetindlebe, kodvwa ativa, atikwati ngisho nekuphefumula imbala.

¹⁸ Labo labatentako bayawufanana nato, nabo bonkhe labetsembele kuto.

¹⁹ Dvumisani Simakadze, nine mndeni waka-Israyeli! Dvumisani Simakadze, nani mndeni waka-Aroni!

²⁰ Dvumisani Simakadze, nine mndeni wakaLevi, nani nonkhe, lenesaba Simakadze, mdvumiseni!

²¹ Akabongwe Simakadze eSiyoni, yena lohlala eJerusalema. Akabongwe Simakadze.