Tihlabelelo 119 - Siswati 1996 Bible

1 Umtsetfo waNkulunkulu

¹ Babusisiwe labo labatindlela tabo timsulwa, labo labahamba ngemitsetfo yaNkulunkulu.

² Babusisiwe labo labagcina imiyalo yaSimakadze, bamfunisise ngayo yonkhe inhlitiyo yabo.

³ Labo-ke abakwenti lokungakalungi, kodvwa bahamba ngetindlela takhe.

⁴ Wena, Simakadze, usinike imiyalo yakho, wasiyala kutsi siyitfobele ngenhlonipho.

⁵ Shangatsi tindlela tami tingacondza njalo ekutigcineni timiso takho.

⁶ Nangingayigcina yonkhe imiyalo yakho, ngingeke ngihlazeke.

⁷ Ngiyawukudvumisa ngenhlitiyo lecotfo ngesikhatsi ngifundza tehlulelo takho letilungile.

⁸ Timiso takho ngitawutilalela; ungangishiyi nakancane.

2 Kulalela umtsetfo waNkulunkulu

⁹ Umuntfu lomusha angayigcina kanjani imphilo yakhe ihlantekile? Ngekucaphela kuhamba ngelivi lakho.

¹⁰ Ngikufuna ngayo yonkhe inhlitiyo yami, shangatsi ngingete ngaphambuka emiyalweni yakho.

¹¹ Livi lakho ngililondvolote enhlitiyweni yami, kuze ngingoni kuwe.

¹² Awubongwe, Simakadze! Ngifundzise timiso takho.

¹³ Ngimemetela ngemlomo wami tonkhe tehlulelo takho letiphuma emlonyeni wakho.

¹⁴ Ngijabulela kuhamba ngemiyalo yakho, kunekutsi ngibe nebunjinga bonkhe.

¹⁵ Ngiyawuzindla ngemiyalo yakho, emehlo ami ngingawesusi etindleleni takho.

¹⁶ Ngiyawutfokota ngetimiso takho; ngingeke ngilikhohlwe livi lakho.

3 Kujabulela umtsetfo waNkulunkulu

¹⁷ Mine, sisebenti sakho, ngicela ungiphatse ngebubele, kuze ngitewuphila ngekunakekela livi lakho.

¹⁸ Vula emehlo ami, kuze ngibone timangaliso letisemtsetfweni wakho.

¹⁹ Ngisihambi lapha emhlabeni, ungangifihleli imiyalo yakho.

²⁰ Umphefumulo wami sewufile kulangatelela kwati imitsetfo yakho, ngato tonkhe tikhatsi.

²¹ Uyabatsetsisa labatidlako; bacalekisiwe labedukile emiyalweni yakho.

²² Ngikhulule etinhlambeni nasekungedzeleleni kwabo, ngobe imiyalo yakho ngiyigcinile.

²³ Nome emakhosi asahlangene ngami, mine, sikhonti sakho, ngiyawuzindla ngetimiso takho.

²⁴ Timfundziso takho tikujabula kwami, ngito letibeluleki bami.

4 Kutimisela kulalela umtsetfo waNkulunkulu

²⁵ Ngilahleke phansi elutfulini. Vuselela kuphila kwami njengekwelivi lakho.

²⁶ Tonkhe tindlela tami ngateneka kuwe, wena wangiphendvula, ngako-ke ngifundzise timiso takho.

²⁷ Ngente ngiticondzisise timiso takho, kuze ngikhulume ngetimangaliso takho.

²⁸ Lusizi selungicedze emandla, ngicinise, njengelivi lakho.

²⁹ Tindlela temacebo tikhweshise kimi, ungifundzise umtsetfo wakho ngemusa.

³⁰ Ngitikhetsele indlela yeliciniso. Tehlulelo takho ngitibeke embikwami njalo.

³¹ Ngibambelele emiyalweni yakho, Nkulunkulu, ungangijabhisi, ungidlise ngemahloni.

³² Ngiyawugijima ngendlela yemiyalo yakho, ngobe nguwe lotakwandzisa kucondza kwami.

5 Umthandazo wekucela kucondza

³³ Ngifundzise, Simakadze, kuhamba ngetimiso takho, khona ngiyawuhamba ngato, kuze kubesekupheleni.

³⁴ Ngiphe ingcondvo yekwati umtsetfo wakho, kuze ngiwugcine kahle, ngiwulalele ngenhlitiyo yami yonkhe.

³⁵ Ngiholele endleleni yemiyalo yakho, ngobe lendlela iyinjabulo yami.

³⁶ Condzisa inhlitiyo yami ekutfobeleni timiso takho, ingalitjatiswa yingcebo.

³⁷ Fulatselisa emehlo ami ekubukeni tintfo letingenamsebenti; ngiphe kuphila ngekwelivi lakho.

³⁸ Gcina setsembiso sakho, lowanginika sona, mine nceku yakho. Lesetsembiso salabo labakwesabako.

³⁹ Ngiphephise ehlazweni lengilesabako, ngobe timiso takho tilungile.

⁴⁰ Maye, ngiyatilangatelela timiso takho! Hlumelelisa kuphila kwami ngekulunga kwakho.

6 Kwetsemba umtsetfo waNkulunkulu

⁴¹ Shangatsi ungangiphatsa ngemusa wakho, Simakadze; ungigone ngensindziso yakho njengekwesetsembiso sakho.

⁴² Khona-ke ngiyawukwati kubaphendvula labo labangetfukako, ngobe livi lakho ngiyaletsemba.

⁴³ Ngiphe emandla ekukhuluma liciniso, ngobe litsemba lami ngilibeke etimisweni takho.

⁴⁴ Umtsetfo wakho ngiyakuwugcina phakadze naphakadze.

⁴⁵ Ngiyawuhamba ngekukhululeka, ngobe ngetamile kuhlonipha imitsetfo yakho.

⁴⁶ Imiyalo yakho, Nkulunkulu, ngiyawuyimemetela nasembikwemakhosi, ngingeke ngibe nemahloni ngayo.

⁴⁷ Ngiyatfokota ngemiyalo yakho, ngobe ngiyayitsandza.

⁴⁸ Imiyalo yakho ngiyayihlonipha ngiyitsandze futsi; ngiyawuhlala ngizindla ngetimiso takho.

7 Sibindzi ngemtsetfo waNkulunkulu

⁴⁹ Khumbula setsembiso sakho lowasenta kimi, mine nceku yakho, ngobe ngiso lesinginike litsemba.

⁵⁰ Indvudvuto yami ekuhluphekeni kwami kutsi setsembiso sakho singinika kuphila.

⁵¹ Labatigcabhako bangihleka bulima; kepha ngingeke ngiphambuke emtsetfweni wakho.

⁵² Awu, Simakadze, ngiyayikhumbula imitsetfo yakho yasendvulo, bese ngiyadvudvuteka ngayo.

⁵³ Nangibona tikhohlakali tephula umtsetfo wakho ngemabomu, ngitfukutsela ngigcwale kokana.

⁵⁴ Timiso takho tingumgogodla wetingoma lengitihlabelako, nome kukuphi lapha ngihlala khona.

⁵⁵ Ebusuku ngikhumbula libito lakho, Simakadze, ngizindle ngemtsetfo wakho.

⁵⁶ Nguloku bengikwenta: Kulalela timiso takho.

8 Kutinikela emtsetfweni waNkulunkulu

⁵⁷ Simakadze usabelo lesilifa lami, ngetsembisa kuwagcina emavi akho.

⁵⁸ Buso bakho ngibufune ngayo yonkhe inhlitiyo yami. Bani nemusa kimi ngekwesetsembiso sakho.

⁵⁹ Nangicabanga ngetindlela tami, ngijikisa tinyatselo tami, ngiticondzise etimisweni takho.

⁶⁰ Angicitsi sikhatsi, ngivele ngiphutfume, ngigcine imiyalo yakho.

⁶¹ Nome lababi banginkinka ngetintsambo, ngingeke ngiwukhohlwe umtsetfo wakho.

⁶² Ekhatsi nebusuku ngiyavuka ngikubonge, ngobe imitsetfo yakho ilungile.

⁶³ Ngingumngani wabo bonkhe labakwesabako, labahamba ngetimiso takho.

⁶⁴ Simakadze, umhlaba ugcwele umusa wakho; ngifundzise timiso takho.

9 Kubaluleka kwemtsetfo waSimakadze

⁶⁵ Yentele lokuhle inceku yakho, Simakadze, kuye ngekwelivi lakho.

⁶⁶ Ngifundzise umcondvo lomuhle nekwati, ngobe litsemba lami lisemiyalweni yakho.

⁶⁷ Lokwa ngisengakahlupheki ngenca yekushaywa kwami, ngangivamise kweduka, manje sengiyaligcina livi lakho.

⁶⁸ Wena umuhle, konkhe lokwentako kuhle, ngifundzise timiso takho.

⁶⁹ Labatigabatisako bakhuluma emanga ngami; kodvwa mine, ngitfobela imitsetfo yakho ngenhlitiyo yami yonkhe.

⁷⁰ Inhlitiyo yabo ilukhunisa kwelitje, kepha mine ngitfokotiswa ngumtsetfo wakho.

⁷¹ Kwaba kuhle kutsi ngihlushwe kuze ngifundze timiso takho.

⁷² Umtsetfo lophuma emlonyeni wakho muhle kunemali yonkhe yemhlaba.

10 Umtsetfo waNkulunkulu awunasici

⁷³ Tandla takho tangidala tangibumba; ngiphe ingcondvo yekufundza imiyalo yakho.

⁷⁴ Labesaba wena bayawutsi nabangibona bajabule, ngobe mine ngetsemba livi lakho.

⁷⁵ Ngiyati, Nkulunkulu, kutsi tehlulelo takho tilungile, nekutsi ungijezise njengobe kungifanele.

⁷⁶ Umusa wakho awube yindvudvuto yami ngekwesetsembiso sakho kimi, mine, nceku yakho.

⁷⁷ Shangatsi sihawu sakho singehlela kimi, khona ngiyawuphila, ngobe umtsetfo wakho uyinjabulo yami.

⁷⁸ Shangatsi labatigabatisako bangahlazeka, ngobe bangicindzetela ngaphandle kwesizatfu; kepha mine ngiyawuzindla ngetimiso takho.

⁷⁹ Shangatsi labakwesabako bangagucukela ngakimi, bona labo labati imitsetfo yakho.

⁸⁰ Shangatsi inhlitiyo yami ingagcina timiso takho, kuze ngingehlelwa ngemahloni, ngihlazeke.

11 Umthandazo wekucela kukhululwa

⁸¹ Umphefumulo wami ulambele insindziso yakho, litsemba lami ngilibeke evini lakho.

⁸² Sengigolotele sekuze kubuhlungu emehlo, solomane ngilindzele setsembiso sakho; solomane ngiyatibuta namanje, ngitsi: “Uyawungidvudvuta nini?”

⁸³ Kambe mine ngisewani nje? Sengifanana neludzengelo lolusetaleni, noko imiyalo yakho angikayikhohlwa.

⁸⁴ Inceku yakho iyawulindzela kuze kube ngunini? Uyawubehlulela nini laba labangitingelela kungihlupha?

⁸⁵ Labatigabatisako bangimbela imigodzi, ngisho bona kanye labaphambene nemtsetfo wakho.

⁸⁶ Imiyalo yakho yonkhe yetsembekile. Ngisite, ngobe bantfu bangitingela ngaphandle kwesono.

⁸⁷ Bacishe bangibulala, kepha mine angiphambukanga emiyalweni yakho.

⁸⁸ Londvolota imphilo yami ngekwemusa wakho, kuze ngigcine timiso takho.

12 Kukholwa emtsetfweni waNkulunkulu

⁸⁹ Yebo, Simakadze, livi lakho lime kuze kube phakadze, lime licinile ezulwini.

⁹⁰ Kuyawendlula titukulwane netitukulwane, kodvwa kwetsembeka kwakho kungeke kugucuke, wamisa umhlaba, nanyalo usemile.

⁹¹ Seloku kwema mhlazana kumiswa nguwe, ngobe konkhe kufanele kukhonte wena.

⁹² Kube umtsetfo wakho bewungesiyo injabulo yami, ngabe sengabhubhela ekuhluphekeni kwami.

⁹³ Ngingeke ngitikhohlwe timiso takho, ngobe ungiphilise ngato.

⁹⁴ Ngingewakho, ngisindzise, Nkulunkulu, ngobe ngifuna kugcina timiso takho.

⁹⁵ Lababi bahlose kungibulala, kodvwa mine ngiyawucaphela timiso takho.

⁹⁶ Ngifundze kutsi: Yonkhe intfo, nome iyinhle kanganani, inemkhawulo; kodvwa imiyalo yakho ite umkhawulo.

13 Kutsandza umtsetfo waNkulunkulu

⁹⁷ Maye, ngiyawutsandza umtsetfo wakho! Ngizindla ngawo imini yonkhe.

⁹⁸ Imiyalo yakho ingenta ngihlakaniphe kwengca titsa tami, ngobe ihlala kimi njalo.

⁹⁹ Ngicondza kancono kunabo bonkhe labangifundzisako, ngobe ngihlala ngizindla ngetimiso takho.

¹⁰⁰ Lwati lwami lwendlula lwalabadzala kunami, ngobe ngigcina timiso takho.

¹⁰¹ Ngiyatincandza tinyawo tami etindleleni letimbi, ngobe ngifuna kugcina livi lakho.

¹⁰² Angikaphambuki emtsetfweni wakho, ngobe nguwe longifundzisile.

¹⁰³ Maye, timnandzi tetsembiso takho kimi! Tinongotela kwengca luju lwetinyosi emlonyeni wami.

¹⁰⁴ Ngetimiso takho ngitfola kucondza, ngako-ke ngiyatitondza tindlela temanga.

14 Kukhanya lokuphuma emtsetfweni waNkulunkulu

¹⁰⁵ Livi lakho lisibane etinyaweni tami, likukhanya endleleni yami.

¹⁰⁶ Ngifungile ngafungisisa kutsi ngiyawuyilalela imitsetfo yakho yekulunga.

¹⁰⁷ Simakadze, kuhlupheka kwami kumatima, ngihlumelelise ngelivi lakho.

¹⁰⁸ Simakadze, yemukela iminikelo yami yekukudvumisa, ungifundzise imitsetfo yakho.

¹⁰⁹ Imphilo yami isengotini njalo, noko angiwukhohlwa umtsetfo wakho.

¹¹⁰ Lababi bangibekele lugibe, kodvwa mine ngingeke ngeduke emtsetfweni wakho.

¹¹¹ Timiso takho tilifa lami laphakadze, yebo, tiyinjabulo yenhlitiyo yami.

¹¹² Inhlitiyo yami ngiyitfobisele kutsi yente timiso takho ngize ngife.

15 Kuphepha emtsetfweni waNkulunkulu

¹¹³ Ngiyabatondza bantfu labamphacambili, kodvwa umtsetfo wakho ngiyawutsandza.

¹¹⁴ Wena, Nkulunkulu, usiphephelo sami nesihlangu sami, litsemba lami ngilibeke evini lakho.

¹¹⁵ Sukani kimi, nine lababi, kuze ngigcine imiyalo yaNkulunkulu wami.

¹¹⁶ Ngisimise ngelivi lakho, kuze ngiphile, ungangijabhisi ngelitsemba lami.

¹¹⁷ Ngisekele, kuze ngisindziswe, ngiyawubheka timiso takho njalonjalo.

¹¹⁸ Uyabadzela bonkhe labeduka etimisweni takho, yebo, bucili babo bulite.

¹¹⁹ Bonkhe lababi bemhlaba ubacitsa njengetibi, kungako ngitsandza timiso takho nje.

¹²⁰ Umtimba wami uyatfutfumela ngenca yekwesaba wena, netehlulelo takho ngiyatesaba.

16 Kulalela umtsetfo waNkulunkulu

¹²¹ Sengikwentile lokulungile nalokucotfo, ungangiyekeleli kulabangicindzetelako.

¹²² Yetsembisa kutsi utayisita inceku yakho, labatigabatisako bangete bangicindzetela.

¹²³ Emehlo ami asacundzekile, ngifunana nensindziso yakho, nekugcwaliseka kwesetsembiso sakho.

¹²⁴ Phatsa inceku yakho ngemusa wakho, ungifundzise timiso takho.

¹²⁵ Mine ngiyinceku yakho, ngiphe ingcondvo yekwati timfundziso takho.

¹²⁶ Simakadze, sesikhatsi sakho sekutsi utsatse tinyatselo, ngobe umtsetfo wakho uyephulwa.

¹²⁷ Imiyalo yakho ngiyitsandza kakhulu, kwendlula igolide, ngisho igolide lecengeke kakhulu.

¹²⁸ Ngako-ke tinyatselo tami ngiticondzisa ngato tonkhe timiso takho; ngiyatitondza tindlela letimbi.

17 Sifiso sekulalela umtsetfo waNkulunkulu

¹²⁹ Timiso takho tiyamangalisa, ngako ngiyatilalela.

¹³⁰ Kwembuleka kwemavi akho kuveta kukhanya, kuletse kuhlakanipha kulabangenakucondza.

¹³¹ Ngimita ematse ngilangatelela kufundza imiyalo yakho.

¹³² Ase ugucukele ngakimi, ube nemusa kimi, njengobe wenta kubo bonkhe labakutsandzako.

¹³³ Condzisa tinyatselo tami evini lakho, angingabuswa ngisho nangulobuncane bubi.

¹³⁴ Ngihlenge ekucindzetelweni bantfu, kuze ngitewugcina timiso takho.

¹³⁵ Ngikhanyise ngebuso bakho mine, nceku yakho; ungifundzise timiso takho.

¹³⁶ Emehlo ami ageleta tinyembeti, ngobe bantfu abawugcini umtsetfo wakho.

18 Bumsulwa bemtsetfo waSimakadze

¹³⁷ Wena, Simakadze, ulungile, nemitsetfo yakho ilungile.

¹³⁸ Timiso takho tetsembekile, tetsembeke kakhulukati.

¹³⁹ Kushisekela kwami kungicedzile, ngobe titsa tami tiwakhohliwe emavi akho.

¹⁴⁰ Tetsembiso takho tihlanteke ngalokuphelele, nenceku yakho iyatitsandza.

¹⁴¹ Nome ngimncane, ngedzelelekile, noko angiyikhohlwa imiyalo yakho.

¹⁴² Kulunga kwakho kukulunga kwaphakadze, nemtsetfo wakho uliciniso.

¹⁴³ Nome kuhlupheka nelusizi kungehlela, kodvwa imiyalo yakho ikujabula kwami.

¹⁴⁴ Timiso takho tiliciniso phakadze naphakadze; ngifundzise tona ngitewuphila ngato.

19 Umthandazo wekucela kukhululwa

¹⁴⁵ Ngikhala kuwe ngayo yonkhe inhlitiyo yami, ngiphendvule, Simakadze; ngiyawutigcina timiso takho.

¹⁴⁶ Ngikhala kuwe ngitsi: “Ngisindzise, khona ngitawugcina umtsetfo wakho.”

¹⁴⁷ Ngivuka lokwa kuseluvivi, ngicele lusito, litsemba lami libambelele evini lakho.

¹⁴⁸ Ebusuku ngiyacwasha ngingalali, kuze ngizindle ngetetsembiso takho.

¹⁴⁹ Vani livi lami ngemusa wakho; Simakadze, londvolota imphilo yami ngekwehlulela kwakho.

¹⁵⁰ Bayasondzela labo labangitondzako, labanemacebo ebubi, kodvwa bakhashane nemtsetfo wakho.

¹⁵¹ Kodvwa wena, Simakadze, usedvute nami, nemiyalo yakho iliciniso sibili.

¹⁵² Timiso takho ngatifundza kadzeni, watimisa ingunaphakadze.

20 “Inyandzaleyo!”

¹⁵³ Buka kuhlupheka kwami ungikhulule, ngobe angikawukhohlwa umtsetfo wakho.

¹⁵⁴ Mela indzaba yami, ungikhulule, hlumelelisa kuphila kwami njengekwetsembisa kwakho.

¹⁵⁵ Insindziso ikhashane nalababi, ngobe abatifuni timiso takho.

¹⁵⁶ Sihawu sakho sikhulu, Simakadze, hlumelelisa kuphila kwami ngekwehlulela kwakho.

¹⁵⁷ Banyenti labangitingelako nalabamelene nami, kodvwa ngingeke ngikhweshe etimisweni takho.

¹⁵⁸ Nangibuka tihlubuki, ngifikelwa kumangala, ngobe atiyigcini imiyalo yakho.

¹⁵⁹ Nawe, Simakadze, uyatibonela kutsi timiso takho ngititsandza kanganani. Londvolota kuphila kwami ngemusa wakho.

¹⁶⁰ Umgomo welivi lakho liciniso sibili; tonkhe timiso takho letilungile tiyawuma kuze kube phakadze.

21 Kutinikela emtsetfweni waSimakadze

¹⁶¹ Tikhulu tingitingela ngaphandle kwesizatfu, kodvwa livi lakho liyangitfutfumelisa.

¹⁶² Livi lakho ngiyalijabulela, ngijabule njengemuntfu lotfole umcebo.

¹⁶³ Emanga ngiyawatondza ngiwenyanye, kodvwa ngitsandza umtsetfo wakho.

¹⁶⁴ Ngiyakudvumisa kasikhombisa ngelilanga ngenca yetehlulelo takho tekulunga.

¹⁶⁵ Bantfu labatsandza umtsetfo wakho banekuthula lokuphelele, kute lokuyawubakhuba endleleni.

¹⁶⁶ Yebo, Simakadze, ngetsemba insindziso yakho, ngiyayenta imiyalo yakho.

¹⁶⁷ Ngigcina timfundziso takho, ngobe ngititsandza ngenhlitiyo yami yonkhe.

¹⁶⁸ Ngigcina timiso takho nemiyalo yakho, ngobe tonkhe tindlela tami tisembikwakho.

22 Umthandazo wekucela lusito

¹⁶⁹ Kukhala kwami akufike kuwe, Simakadze, ngiphe kucondza njengekwelivi lakho.

¹⁷⁰ Kuncusa kwami akute kuwe, ungikhulule njengekwelivi lakho.

¹⁷¹ Ngiyawukudvumisa ngaso sonkhe sikhatsi, ngobe ungifundzisa timiso takho.

¹⁷² Ngiyawuhlabela ngelivi lakho, ngobe imiyalo yakho yonkhe ilungile.

¹⁷³ Shangatsi sandla sakho singahlala silungele kungisita, ngobe ngitikhetsele kugcina timiso takho.

¹⁷⁴ Ngomele insindziso yakho, Simakadze, nemtsetfo wakho ukujabula kwami.

¹⁷⁵ Ase ungiphe kuphila, khona ngitewukudvumisa; shangatsi nemiyalo yakho ingangisimisa.

¹⁷⁶ Ngedukile, njengemvu lelahlekile. Ngifune, mine nceku yakho, ngobe imiyalo yakho angikayikhohlwa.