Tihlabelelo 118 - Siswati 1996 Bible

Sekubonga insindziso yaSimakadze

¹ Bongani Simakadze, ngobe muhle, umusa wakhe ume kuze kube phakadze.

² Baka-Israyeli abavume batsi: “Umusa wakhe ume kuze kube phakadze.”

³ Bendlu yaka-Aroni abatsi: “Umusa wakhe ume kuze kube phakadze.”

⁴ Labo labesaba Simakadze abatsi: “Umusa wakhe ume kuze kube phakadze.”

⁵ Ngakhala kuSimakadze ngiselusizini lwami, yena wangiphendvula ngekungikhulula.

⁶ Simakadze ungakimi angesabi lutfo. Umuntfu angangentani nje?

⁷ Simakadze ungakimi, ungumsiti wami, labangitondzako ngiyawubabuka ngibacoloshele.

⁸ Kuncono kuphephela kuSimakadze kunekwetsembela kumuntfu.

⁹ Kuncono kuphephela kuSimakadze kunekwetsembela emakhosini.

¹⁰ Tonkhe tive tangivimbetela ndzawo tonkhe, kodvwa ngelibito laSimakadze ngatishaya ngatibhuca.

¹¹ Tangitungeleta, tangicindzetela ndzawo tonkhe, kodvwa ngelibito laSimakadze ngatishaya ngatibhuca.

¹² Tangibunganyela njengelibulo letinyosi, tasha njengemlilo wemanyeva; kodvwa ngelibito laSimakadze ngatishaya ngatibhuca.

¹³ Ngafucwa matima ngacishe ngawa; kodvwa Simakadze wangisita.

¹⁴ Simakadze ungemandla ami nengoma yami, sewuyinsindziso yami.

¹⁵ Kuvakala emaphimbo ekwetsaba laphuma etindlini talabangcwele atsi: “Sandla sekudla saSimakadze sisebenta ngemandla.

¹⁶ Sandla sekudla saSimakadze siphakanyiselwe etulu. Sandla sekudla saSimakadze sisebenta ngemandla.”

¹⁷ Ngingeke ngife, kodvwa ngitawuphila, ngibalise ngemisebenti yaSimakadze.

¹⁸ Simakadze wangishaya kabuhlungu kabi, kodvwa akazange anginikele ekufeni.

¹⁹ Ngivuleleni emasango ekulunga, kuze ngingene ngawo ngibonge Simakadze.

²⁰ Ngilo leli lisango laSimakadze, labalungile bangena ngalo.

²¹ Ngiyawukubonga ngobe ungiphendvulile, waba yinsindziso yami.

²² Litje lekwakha lelaliwa bakhi, ngobe batsi alinamsebenti, seligucuke laba litje lekusimisa indlu.

²³ Loku kwentiwe nguSimakadze, kuyamangalisa kitsi.

²⁴ Leli lilanga lelentiwe nguSimakadze, asijabule setsabe kulo.

²⁵ Awu, Simakadze, sisindzise, siyakuncenga! Awu, Nkhosi, siphumelelise, siyakuncenga!

²⁶ Ubusisiwe lotako egameni laSimakadze. Sinibusisa sisendlini yaSimakadze.

²⁷ Simakadze nguNkulunkulu, wasipha kukhanya, wasikhanyisela. Hlabani lihele leMkhosi, niphatse emacembe ngetandla tenu, nize nifike etimphondvweni telilati.

²⁸ Wena unguNkulunkulu wami, ngiyakubonga; wena unguNkulunkulu wami, ngiyakudvumisa.

²⁹ Bongani Simakadze, ngobe muhle, nemusa wakhe ume kuze kube phakadze.