Tihlabelelo 116 - Siswati 1996 Bible

Sekubonga kwephulwa ekufeni

¹ Ngiyamtsandza Simakadze, ngobe ulivile livi lami nekuncusa kwami.

² Ngobe ubekile indlebe yakhe kimi, ngako-ke sengiyawukhuleka kuye imphilo yami yonkhe.

³ Tingibe tekufa tangitungeleta, iminjunju yekufa yangihlasela, ngabandzetelwa tinhlupheko nelusizi.

⁴ Ngase ngibita libito laSimakadze, ngatsi: “Awu, Simakadze, ngiyakuncenga, ngisindzise.”

⁵ Simakadze unemusa nekulunga; Nkulunkulu wetfu unesihe.

⁶ Simakadze uyamlondvolota londzindzako; ngangisengotini wangisindzisa.

⁷ Mphefumulo wami, ake uphindze uphumule, ngobe Simakadze ukuphetse ngemusa.

⁸ Wena, Simakadze, uwephulile umphefumulo wami ekufeni, wephula emehlo ami etinyembetini netinyawo tami ekuweni.

⁹ Ngiko nje ngihamba ebukhoneni baSimakadze kulelive lalabaphilako.

¹⁰ Ngachubeka ngakholwa, nome sengitsi: “Maye, ngiphelile tinhlupheko!”

¹¹ Ngajabha, ngadzimate ngatsi: “Bonkhe bantfu banemanga!”

¹² Ngiyawumentelani Simakadze, ngimbonge ngako konkhe lokuhle langentela kona?

¹³ Ngiyawuphakamisa indzebe yensindziso, ngikhuleke kuSimakadze, ngibonga libito lakhe.

¹⁴ Tifungo tami ngiyawutifeza kuSimakadze, embikwabo bonkhe bantfu bakhe.

¹⁵ Kuligugu emehlweni aSimakadze kufa kwalabangcwele bakhe.

¹⁶ Awu, Simakadze! Mine ngiyinceku yakho, indvodzana letalwa yincekukati yakho. Utfukulule tibopho lebengiboshwe ngato.

¹⁷ Ngiyawunikela kuwe ngemhlatjelo wekubonga, ngikhuleke kuSimakadze, ngibonga libito lakhe.

¹⁸ Tifungo tami ngitatifeza kuSimakadze embikwabo bonkhe bantfu bakhe,

¹⁹ ngisetibuyeni tendlu yaSimakadze, ekhatsi nawe, Jerusalema. Haleluya, dvumisani Simakadze!