Tihlabelelo 115 - Siswati 1996 Bible

Nkulunkulu netithico

¹ Yenta kungabi ngitsi, Simakadze, yenta kungabi ngitsi, kepha akudvunyiswe libito lakho ngenca yemusa wakho nangenca yekwetsembeka kwakho.

² Kungani betive batsi: “Sewushonephi loNkulunkulu wabo?”

³ Phela, Nkulunkulu wetfu usemazulwini, wenta konkhe lakutsandzako.

⁴ Kodvwa tithico tebetive tentiwa ngesiliva nangegolide, tingumsebenti wetandla temuntfu.

⁵ Tinemilomo, kodvwa atikhulumi, tinemehlo, kodvwa atiboni.

⁶ Tinetindlebe, kodvwa ativa, tinemakhala, kodvwa atiliva liphunga.

⁷ Tinetandla, kodvwa atiphatsi, tinetinyawo, kodvwa atihambi. Tite nemalakanya emiphinjeni yato.

⁸ Laba labatentako bafanana nato, bonkhe labetsembele kuto bafanana nato.

⁹ Awu, Israyeli, yetsembelani kuSimakadze. Nguye longumsiti wenu nesihlangu senu!

¹⁰ Awu, wena ndlu yaka-Aroni, beka litsemba lakho kuSimakadze. Nguye longumsiti wakho nesihlangu sakho!

¹¹ Nine lenesaba Simakadze, yetsembelani kuye. Nguye longumsiti wenu nesihlangu senu!

¹² Simakadze usikhumbulile, utasibusisa; utayibusisa nendlu yaka-Israyeli, ayibusise nendlu yaka-Aroni.

¹³ Utababusisa bonkhe labamesabako Simakadze, labancane nalabakhulu.

¹⁴ Shangatsi Simakadze anganandzisela nine kanye nebantfwabenu.

¹⁵ Shangatsi ningabusiswa nguSimakadze, yena lowenta lizulu nemhlaba.

¹⁶ Emazulu ayindzawo yaSimakadze, yena yedvwa, kodvwa umhlaba wawuniketela kubantfu.

¹⁷ Nkulunkulu akadvunyiswa ngulabafile; yebo, akadvunyiswa ngulabo lase bathula emathuneni.

¹⁸ Kodvwa tsine, lesiphilako, siyawumbonga Simakadze, kusukela manje kuze kube phakadze. Haleluya, dvumisani Simakadze.