Tihlabelelo 114 - Siswati 1996 Bible

Simangaliso sekukhishwa eGibhithe

¹ Mhlazana baka-Israyeli baphuma eGibhithe, mzukwana indlu yakaJakobe iphuma kubantfu labakhuluma lolunye lulwimi,

² Juda waba sive lesingcwele saSimakadze, Israyeli waba sive lesibuswa nguye.

³ Lwandle Lolubovu lwakubona loku lwabaleka, umfula iJordane wema, wangete wageleta.

⁴ Tintsaba tatjakadvula njengetimbuti, emagcuma atjekula njengemazinyane etimvu.

⁵ Kwenteke njani kuwe, Lwandle Lolubovu, kutsi bewungaze ubaleke? Nawe Jordane, wentiwe yini kuma ungageleti?

⁶ Nine-ke tintsaba, nitjakadvuleleni njengetimbuti? Nani magcuma, nitjekuleleni njengemazinyane etimvu?

⁷ Mhlaba, tfutfumela embikwaSimakadze, yebo, embikwaNkulunkulu waJakobe.

⁸ Simakadze ugucula lidvwala libe lichibi lemanti, ancibilikise tiphongotja tetintsaba tibe ngimitfombo yemanti.