Tihlabelelo 112 - Siswati 1996 Bible

Umuntfu lowesaba Nkulunkulu uyaphumelela

¹ Haleluya, dvumisani Simakadze! Ubusisiwe umuntfu lowesaba Simakadze, lotijabulisa ngekugcina imiyalo yakhe.

² Intalo yakhe iyawuba nemandla emhlabeni; situkulwane salabacotfo siyakubusiswa.

³ Ingcebo nemfuyo kusendlini yakhe, kulunga kwakhe kume kuze kube phakadze.

⁴ Labacotfo batfola kukhanya ebumnyameni. Simakadze unemusa, nesihe, nekulunga.

⁵ Ubusisiwe umuntfu lowephanako, ebolekise ngesihle, lowenta tonkhe tintfo ngekwetsembeka.

⁶ Lolungile angeke anyakatiswe; uyawuhlala akhunjulwa phakadze naphakadze.

⁷ Imibiko lemibi ayimesabisi, inhlitiyo yakhe icinile, yetsembele kuSimakadze.

⁸ Unesibindzi, angeke esabe, aze abone kujabhiswa kwetitsa takhe.

⁹ Labamphofu ubapha ngekukhululeka; kulunga kwakhe kuyawuma kuze kube phakadze. Uyawuba nemandla, ahlonipheke.

¹⁰ Lomubi uyawubona loku acanuke, acucudze ematinyo, ahusheke, adzimate aphele. Tinhloso talomubi tiyawushabalala.