Tihlabelelo 111 - Siswati 1996 Bible

Simakadze uyasinakekela sive sakhe

¹ Haleluya, dvumisani Simakadze! Ngiyawubonga Simakadze ngenhlitiyo yami yonkhe, ngimbonge emihlanganweni yalabacotfo, neyalabangcwele.

² Mikhulu imisebenti yaSimakadze! Iphenywa ngibo bonkhe labatfokota ngayo.

³ Imisebenti yakhe inebukhosi neludvumo, nekulunga kwakhe kume ingunaphakadze.

⁴ Wente timangaliso takhe kutsi tikhumbuleke. Simakadze unemusa nebubele.

⁵ Ubapha kudla labo labamesabako, sivumelwane sakhe uyasikhumbula phakadze naphakadze.

⁶ Sive sakhe usikhombise emandla emisebenti yakhe, wasinika emave aletinye tive.

⁷ Imisebenti yetandla takhe yetsembekile, futsi ilungile; yonkhe imitsetfo yakhe yetsembekile.

⁸ Ayinawugucuka phakadze naphakadze, yentiwa ngeliciniso nangekulunga.

⁹ Sive sakhe wasitfumelela kuhlengwa, wemisa sivumelwane sakhe kuze kube phakadze. Lingcwele liyesabeka libito lakhe.

¹⁰ Kwesaba Nkulunkulu sicalo sekuhlakanipha. Bonkhe labahamba ngemitsetfo yakhe banengcondvo lenhle. Umelwe kudvunyiswa phakadze naphakadze.