Tihlabelelo 11 - Siswati 1996 Bible

Kwetsembela kuSimakadze

Sihlabelelo saDavide lesetfulwe kumhlabelisi.

¹ KuSimakadze ngitfole siphephelo. Pho, ngabe ningeluleka njani nanitsi: “Ndizela entsabeni njengenyoni!

² Ase ubuke nje kutsi lababi babhace ebumnyameni lapho bantsala butjoki khona, baciphe imicibisholo yabo kubo, khona batewudubula labacotfo ngenhlitiyo.

³ Nangabe tisekelo setibhidlitwa, lolungile angenta njani?”

⁴ Simakadze usethempelini lakhe lelingcwele, sihlalo sebukhosi saSimakadze sisezulwini, emehlo akhe ayacaphela, emehlo akhe avivinya bantfu emhlabeni.

⁵ Simakadze uyamvivinya lolungile, kodvwa uyamtondza lomubi nalotsandza budlova.

⁶ Lababi uyawubehlisela imvula yemalahle lavutsako nesibabule, abajezise ngemoya lohhusha kabuhlungu.

⁷ Simakadze ulungile, utsandza tento letinhle, labalungile bayawububona buso bakhe.