Tihlabelelo 109 - Siswati 1996 Bible

Sikhalo semuntfu lohlushwa titsa takhe

Sihlabelelo saDavide lesetfulwe kumhlabelisi.

¹ Awu, Nkulunkulu lengimdvumisako, ungathuli ungibukelele.

² Ngobe lababi netikhohlakali tinginyundzele, baphambene nami bangicalela emanga.

³ Bangitungeleta ngemavi enzondo, balwa nami ngaphandle kwesizatfu.

⁴ Umusa wami bawubonga ngekungibeka licala, noko mine ngihlala ngikhuleka.

⁵ Mine ngabentela lokuhle, bona bangibonga ngalokubi, lutsandvo lwami balwenana ngenzondo.

⁶ Bakhuluma batsi: “Akagwetjwe ngumehluleli lomubi, ummangaleli wakhe amelane naye.

⁷ Ekwehlulelweni kwakhe akalahlwe licala, umthandazo wakhe awubalwe njengesono.

⁸ Shangatsi imihla yekuphila kwakhe ingafinyetwa, lomunye atsatse sikhundla sakhe.

⁹ Shangatsi bantfwabakhe bangaba tintsandzane, nemkakhe abe ngumfelokati.

¹⁰ Shangatsi bantfwabakhe bangaba tindzindzi letiphila ngekucela; shangatsi bangakhishwa nakuto letindzala labahlala kuto kwamanje.

¹¹ Shangatsi konkhe lanako kungadliwa ngumtjelekisi; shangatsi titfukutfuku takhe tingadliwa bafokatana.

¹² Akubete loba nemusa kuye, kubete nalohawukela tintsandzane takhe.

¹³ Shangatsi intalelwane yakhe ingaphela nya; libito lakhe lesulwe esitukulwaneni lesitako.

¹⁴ Shangatsi Simakadze angakhumbula bubi baboyise, nesono senina singete sesulwa.

¹⁵ Shangatsi tono tabo tingema embikwaSimakadze njalo. Shangatsi bangete baphindze bakhunjulwe emhlabeni.

¹⁶ “Ngobe lomuntfu akazange akhumbule kwenta umusa, kodvwa labamphofu, nalabandzindzako, nalabanetinhlitiyo letidzabukile wabahlupha kwaze kwabasekufeni kwabo.

¹⁷ Abetsandza kucalekisa. Shangatsi leticalekiso tingehlela etikwakhe; akazange asitsandze sibusiso, shangatsi sibusiso singakhwesha kuye.

¹⁸ Abembatsa ticalekiso njengengubo, tangena etibilinini takhe njengemanti, nasematsanjeni akhe njengemkantja.

¹⁹ Shangatsi tingamembesa njengelijazi, nanjengelibhande latibopha ngalo elukhalweni yonkhe imihla le.”

²⁰ Shangatsi Simakadze angangiphindziselela etitseni tami, kulabo labakhuluma kabi ngami.

²¹ Kodvwa wena, Nkulunkulu, Nkhosi yami, ngivikele ngenca yelibito lakho, ungephule ngenca yemusa wakho.

²² Ngobe mine ngisihlupheki nalomphofu, inhlitiyo yami idzabukile.

²³ Ngiyanyamalala kancane kancane, njengesitfunti nase kuhwalala; ngiyavitsitwa njengentsetse.

²⁴ Emadvolo ami ayaceka ngenca yekuzila kudla, umtimba wami wonkhe uyesabeka.

²⁵ Ngiyinhlekisa yetitsa tami; nabangibona, banikina tinhloko.

²⁶ Ngisite, Simakadze, Nkulunkulu wami, ngisindzise ngelutsandvo lwakho lwaphakadze.

²⁷ Shangatsi bangati kutsi sandla sakho, Simakadze, lesente loku.

²⁸ Bona bangangicalekisa, kodvwa wena utangibusisa. Shangatsi labangihlaselako bangehluleka, shangatsi mine, nceku yakho, ngingatfokota.

²⁹ Shangatsi labangimangalelako bangahlazeka, shangatsi emahloni angabambonya njengengubo.

³⁰ Ngiyawumemeta ngibonge Simakadze, ngimdvumise esicunjini lesikhulu;

³¹ ngobe ume ngesekudla salomphofu kutsi amsindzise kulabamgwebela intsambo.