Tihlabelelo 107 - Siswati 1996 Bible

Sigaba sesihlanu (Tihlabelelo 107 – 150) Kubonga Simakadze ngemusa wakhe

¹ “Dvumisani Simakadze, ngobe yena muhle, nemusa wakhe ume kuze kube phakadze.”

² Labahlengwe nguSimakadze abasho njalo, bona labo labahlengwe emandleni ebacindzeteli babo.

³ Wababutsa emaveni onkhe emphumalanga nasenshonalanga, enyakatfo naseningizimu.

⁴ Labanye bazulazula ehlane, kalashameshame, kepha abazange batfole ngisho nemuti wekungenisa.

⁵ Balamba, boma, umphefumulo wabo waphela emandla kubo.

⁶ Base bakhala kuSimakadze basesekulolo lusizi lwabo, wabephula kulo.

⁷ Wabahola ngendlela lecondzile kutsi bahambe baze befike emtini lababengangenisa kuwo.

⁸ Akabongwe Simakadze ngemusa wakhe, ngekwentela bantfu imisebenti lemangalisako:

⁹ Ngobe wenelisa umuntfu lowomile, lolambile umesutsisa ngalokuhle.

¹⁰ Labanye babehleti ebumnyameni nasetfuntini lekufa, baboshwe tinsizi netinketane,

¹¹ ngobe baphambana nemavi aNkulunkulu, bakwedzelela kuyalwa kwaLosetikwako Konkhe.

¹² Yebo, wabayendzisa ngekudvonsa kamatima, basakateka phansi, kwabate lobasitako.

¹³ Base bakhala kuSimakadze basesekulolo lusizi lwabo, wabasindzisa kulo.

¹⁴ Wabakhipha kulobo bumnyama nakulelo tfunti lekufa, wajuba tibopho letatibabophile.

¹⁵ Akabongwe Simakadze ngemusa wakhe, ngekwentela bantfu imisebenti lemangalisako:

¹⁶ Ngobe wafohla emasango elitfusi, wajuba nemishudvo yetinsimbi.

¹⁷ Labanye baba tilima ngenca yekona nebubi babo behlelwa kuhlupheka.

¹⁸ Tinhlitiyo tabo taba mnyama, behluleka kudla, ngako bondza bacishe bafa.

¹⁹ Base bakhala kuSimakadze basesekulolo lusizi lwabo, wabasindzisa kulo.

²⁰ Wakhipha umyalo wakhe, wabaphilisa, wabenta bagejwa kufa.

²¹ Akabongwe Simakadze ngemusa wakhe, ngekwentela bantfu imisebenti lemangalisako.

²² Abanikele ngemihlatjelo yekubonga, bamemetele imisebenti yakhe ngenjabulo.

²³ Labanye babehla benyuka ngemikhumbi elwandle, babephila ngekuhweba.

²⁴ Bayibona imisebenti yaSimakadze, netimangaliso takhe ekujuleni kwalo.

²⁵ Wakhuluma kwavuka sivunguvungu, sadlondlobalisa emagagasi elwandle.

²⁶ Abatsatsa abajika etulu, aphindza abagoboncisela ekujuleni, badzimate batfutfumeliswa kwesaba.

²⁷ Badzayitela, bayendza, njengemuntfu nadzakiwe, lwati lwabo lwefika lapho luphela khona.

²⁸ Base bakhala kuSimakadze basesekulolo lusizi lwabo, wabakhulula kulo.

²⁹ Wathulisa kubhenguta kwelwandle, emagagasi alo abindza.

³⁰ Batfokota ngobe kwase kuba nekuthula, wabaholela esikhumulweni lababecondze kuso.

³¹ Akabongwe Simakadze ngemusa wakhe, ngekwentela bantfu imisebenti lemangalisako.

³² Abamphakamise emkhambatsini wesive, bamdvumise emhlanganweni webaholi.

³³ Imifula wayigucula yaba lihlane, tiyalu toma taba lubhubhushi,

³⁴ live lelivundzile laba lugagadvu ngenca yebubi betakhamiti talo.

³⁵ Wagucula lihlane laba ngumena, umhlaba lowomile wamila tiyalu.

³⁶ Kulapho abeka khona labalambile, bacaba, bakha khona imiti yabo, bahlala batinta.

³⁷ Balima emasimi, bahlanyela tivini, bavuna sivuno lesikhulu.

³⁸ Wababusisa, bandza kakhulu, netifuyo tabo tandza kakhulu.

³⁹ Babuye bancipha baphunguka, ngenca yekucindzetelwa nangekuhlushwa,

⁴⁰ watsela kwedzelewa etikwetikhulu, wabazulazulisa ehlane lelite indlela.

⁴¹ Kodvwa waphakamisa labamphofu wabakhipha elusizini, wenta imindeni yaba njengemihlambi yetimvu.

⁴² Labacotfo bayakubona loku bajabule, kodvwa bonkhe lababi bayathula.

⁴³ Lohlakaniphile akacaphele letintfo, bantfu abayicondzisise imisebenti yemusa waSimakadze.