Tihlabelelo 106 - Siswati 1996 Bible

Nkulunkulu akesuki esivumelwaneni nome bantfu sebamhlubuka

¹ Haleluya, dvumisani Simakadze! Bongani Simakadze ngobe muhle, nemusa wakhe ume kuze kube phakadze.

² Ngubani longalandzisa ngemisebenti lemikhulu yaSimakadze, avakalise lonkhe ludvumo lwakhe?

³ Babusisiwe labo labahamba ngebucotfo bente kulunga ngato tonkhe tikhatsi.

⁴ Awu, Simakadze, ngikhumbule nawusentela umusa sive sakho, nami ungisindzise kanye naso,

⁵ kuze ngibone kuchuma kwalabakhetsiwe bakho, ngitfokote ekujabuleni kwesive sakho, ngitigabise kanye nalabalifa lakho.

⁶ Sonile tsine kanye nabokhokho betfu, sente lokubi, sonakele.

⁷ Ngesikhatsi bokhokho baseseGibhithe abazange bacaphele timangaliso takho, futsi abazange bakhumbule bunyenti betento takho temusa, kodvwa bakuhlubuka ngaseLwandle Lolubovu.

⁸ Noko, Simakadze wabasindzisa, ngenca yelibito lakhe, kuze abonakalise emandla akhe lamakhulu.

⁹ Wakhalimela Lwandle Lolubovu, lwasha, wabeweta ekujuleni kwalo, kwaba shangatsi bahamba ehlane.

¹⁰ Ngako wabasindzisa esandleni sesitsa, wabahlenga emandleni esitsa.

¹¹ Emanti atimbonya titsa tabo, kute ngisho nasinye sato lesasala.

¹² Base bayawakholwa emavi akhe, bahlabela, bamdvumisa.

¹³ Kodvwa basheshe bayikhohlwa imisebenti yakhe, abazange basatilindzela teluleko takhe.

¹⁴ Bahamba bashangashanga ehlane, bamlinga Nkulunkulu kalashameshame.

¹⁵ Wabapha leto tintfo bebaticela kuye, kodvwa wabatfumela kufa lokwabacedza.

¹⁶ Basesendleleni baba nemona naMosi kanye na-Aroni, longcwele waSimakadze.

¹⁷ Umhlaba wakhamisa wamita Dathani, wagcibedzela Abiramu nebalandzeli bakhe,

¹⁸ kwalumekeka umlilo ebutfweni labo, lilangabi lashisa lacedza bonkhe lababi.

¹⁹ Babumba sitfombe selitfole eHorebe, bakhotsama kuso sithico lesibunjiwe.

²⁰ Bamnyembenya lowo abeludvumo lwabo, bakhetsa sitfombe senkhomo ledla tjani.

²¹ Bamkhohlwa Nkulunkulu, uMsindzisi wabo, labebentele tintfo letinkhulu eGibhithe,

²² lekwakuyimisebenti lemangalisako eveni lakaHhamu, netintfo letesabekako ngaseLwandle Lolubovu.

²³ Ngako-ke watsi utababhubhisa, kepha Mosi, lokhetsiwe wakhe, wema emkhatsini, wabalamlela ngekubashweletela kuNkulunkulu, kutsi lulaka lwakhe lungababhubhisi.

²⁴ Baledzelela live lelihle, abazange balikholwe livi laSimakadze.

²⁵ Bakhonona basemathendeni abo, abazange balilalele livi laSimakadze.

²⁶ Ngako-ke waphakamisa sandla sakhe wafunga kubo kutsi uyawubabhubhisa bafele ehlane,

²⁷ asakate intalo yabo emkhatsini wetive, ayihlakatele emaveni.

²⁸ Base batihlanganisa nalababekhonta sithico lesasinguBhali wasePheyori, badla lokwakuhlatjelwe labaphansi,

²⁹ bacunula Simakadze ngetento tabo, kwabhoboka sifo emkhatsini wabo.

³⁰ Kwase kusukuma Finehasi walamula ngekubulala letephulamtsetfo; lesifo saphela.

³¹ Loku kwabalelwa kuye njengekulunga titukulwane ngetitukulwane kuze kube phakadze.

³² Bacunula Simakadze ngaseticojeni taseMeribha, Mosi wamhambela kabi ngenca yabo,

³³ ngobe baphambana naMoya waNkulunkulu, naMosi waze wakhuluma kubo ngemawala.

³⁴ Abazange batibhubhise tive, njengobe Simakadze abebayalile;

³⁵ kodvwa batihlanganisa nebetive, bafundza kwenta imikhuba yato.

³⁶ Bakhonta tithico tato, letagucuka taba lugibe kubo.

³⁷ Banikela ngemadvodzana abo nemadvodzakati abo, kutsi abe yimihlatjelo yemadimoni.

³⁸ Bacitsa ingati lete licala, ingati yemadvodzana abo nemadvodzakati abo, labawahlabela tithico taseKhenani; ngaloko bangcolisa lonkhe live ngengati.

³⁹ Batingcolisa ngetintfo lababetenta, bangete betsembeka kuNkulunkulu, bafana netiphingi.

⁴⁰ Ngako-ke intfukutselo yaSimakadze yasivutsela sive sakhe, loko lokulifa lakhe kwaba sinengiso kuye.

⁴¹ Wabanikela emandleni ebetive, labo lababatondzako bababusa.

⁴² Titsa tabo tabacindzetela, batfotjiswa ngephansi kwesandla sato.

⁴³ Wabakhulula emahlandla lamanyenti, kepha batimisela kumelana naye, bawiswa phansi ngebubi babo.

⁴⁴ Noko walunaka lusizi lwabo, asakuvile kukhala kwabo.

⁴⁵ Wabevela, wasikhumbula sivumelwane sakhe, ngenca yemusa wakhe lomkhulu wabuye wabahawukela.

⁴⁶ Wenta bonkhe batfumbi babo kutsi babahawukele.

⁴⁷ Sisindzise, Simakadze, Nkulunkulu wetfu, sibutse etiveni usicocele ndzawonye, kuze sibonge libito lakho lelingcwele, sigungubale ngeludvumo lwakho.

⁴⁸ Akabongwe Simakadze, Nkulunkulu wema-Israyeli, kusukela phakadze kuze kube phakadze! Sive sonkhe asitsi: “Amen!” Haleluya! Dvumisani Simakadze!