Tihlabelelo 103 - Siswati 1996 Bible

Kudvumisa Simakadze ngemusa wakhe

Sihlabelelo saDavide.

¹ Mphefumulo wami, dvumisa Simakadze, nako konkhe lokukimi akudvumise libito lakhe lelingcwele!

² Mphefumulo wami, dvumisa Simakadze, ungatikhohlwa tento takhe temusa kimi.

³ Ungitsetselela lonkhe licala letono tami angelaphe tonkhe tifo tami.

⁴ Ungihlenga ngiphephe ekufeni, enhloko yami ungifaka umchele longumusa nesihawu.

⁵ Wenelisa kuphila kwami ngalokuhle, kuvuseleleke emandla ebusha bami, ngivuseleleke ngibe njengelusweti.

⁶ Bonkhe labacindzetelwe Simakadze ubentela kulunga, angakhetsi muntfu.

⁷ Imisebenti yakhe wayenta yatiwa nguMosi, tento takhe tatiwa sive saka-Israyeli.

⁸ Simakadze unemusa nesihawu, uyephuta kutfukutsela, andze ngemusa.

⁹ Akatsetsi ngaso sonkhe sikhatsi, futsi akahlali atfukutsele kuze kube phakadze.

¹⁰ Akasiphatsi njengalokufanele tono tetfu, futsi akasivuzi njengekwemacala etfu.

¹¹ Njengobe emazulu aphakeme ngetulu kwemhlaba, unjalo-ke nemusa wakhe kulabamesabako.

¹² Njengobe imphumalanga yehlukene nenshonalanga utikhweshise kangako-ke tono tetfu kitsi.

¹³ Njengobe uyise anesihe kubantfwabakhe, ngalokufananako Simakadze unesihe kulabamesabako.

¹⁴ Ngobe uyakwati kubunjwa kwetfu, uyakhumbula kutsi silutfuli nje.

¹⁵ Emalanga emuntfu anjengetjani, uyabhahela njengembali yesiganga.

¹⁶ Ngesikhatsi umoya uphephetsa wendlule etikwayo, kube kuphela kwayo njalo, ingeke iphindze yatiwe kuleyo ndzawo.

¹⁷ Kodvwa umusa waSimakadze ukubo bonkhe labamesabako, futsi uyawuhlala ukubo phakadze naphakadze, nekulunga kwakhe etikwebantfwana bebantfwana,

¹⁸ kubo labagcina sivumelwane sakhe, bakhumbule kwenta imiyalo yakhe.

¹⁹ Simakadze wasimisa ezulwini sihlalo sakhe sebukhosi, konkhe lokukhona kungaphansi kwembuso wakhe.

²⁰ Dvumisani Simakadze, nine tingilosi takhe, nani machawe lanemandla, nine labenta livi lakhe, nilalele kukhuluma kwelivi lakhe.

²¹ Dvumisani Simakadze, nine mabandla akhe nonkhe, nani tikhonti takhe letenta intsandvo yakhe.

²² Bongani Simakadze, nonkhe nine misebenti yakhe, kuto tonkhe tindzawo embusweni wakhe. Mphefumulo wami, dvumisa Simakadze.