Tihlabelelo 102 - Siswati 1996 Bible

Kukhala kwemuntfu losekuhluphekeni (Sihlabelelo sesihlanu sekutisola)

Umkhuleko wemuntfu lohluphekako, nangabe asaphelelwe ngemandla, atfulula sikhalo sakhe embikwaNkulunkulu.

¹ Awu, Simakadze! Vani umthandazo wami. Kukhala kwami akufinyelele kuwe.

² Ungabufihli buso bakho kimi, ngesikhatsi sekuhlupheka kwami! Beka indlebe yakho kimi; usheshe ungiphendvule njalo nje nangikhala kuwe.

³ Emalanga ami endlula njengentfutfu, ematsambo ami ashise njengemlilo.

⁴ Inhlitiyo yami ihashukile yabuna njengetjani. Angisadli, nekudla akusangeni, ngobe inhlitiyo yami imnyama.

⁵ Sengondze ngingumbambotiyabalwa, ngenca yekububula kwami kakhulu.

⁶ Sengifanana nelingce lasehlane, ngifanane nesikhova setindzala.

⁷ Ngiyacwasha, butfongo abehli, ngifanana nenyoni ledliwa situnge, lehleti etikwendlu.

⁸ Titsa tami tingetfuka onkhe emalanga, laba labangiphukutako bacalekisa betfukane ngelibito lami.

⁹ Ngiyakhala, umlotsa sekudla kwami, tinyembeti titfontsela esinatfweni sami,

¹⁰ ngenca yelulaka nekutfukutsela kwakho, ngobe ungisundvutile wangilahla.

¹¹ Emalanga ami anjengesitfunti sentsambama, ngiyabuna njengetjani.

¹² Kodvwa wena, Simakadze, uyawuba khona kuze kube phakadze. Uyawukhunjulwa titukulwane ngetitukulwane.

¹³ Uyawusukuma uhawukele iSiyoni, ngobe sengiso sikhatsi sekuyiphatsa ngemusa, yebo, sikhatsi lesimiselwe loko sesifikile.

¹⁴ Tinceku takho tiyitsandza ngisho nematje ayo; tihawukela lutfuli lwayo.

¹⁵ Tive tiyawulesaba libito laSimakadze, nemakhosi onkhe emhlaba esabe bukhosi bakhe.

¹⁶ Ngobe Simakadze utawube asayakhe kabusha iSiyoni, asabonakele enkhatimulweni yakhe,

¹⁷ anake imikhuleko yalabangenabani, angayibukeli phansi imithandazo yabo.

¹⁸ Loku akubhalwe phansi, kugcinelwe situkulwane lesitako, kuze naleso sive lesiyawuvela naso sidvumise Simakadze.

¹⁹ Ngobe Simakadze wabuka phansi, asendzaweni yakhe lephakeme lengcwele, wabuka emhlabeni asezulwini,

²⁰ kutsi atewuva kububula kwetiboshwa, atewukhulula labo labagwetjelwe intsambo,

²¹ kuze bantfu bavakalise libito laSimakadze eSiyoni, neludvumo lwakhe eJerusalema,

²² ngesikhatsi sekuhlangene tive ndzawonye, kanye nemibuso kutawukhonta Simakadze.

²³ Wacedza emandla ami ngisesemkhatsini, wafinyeta emalanga ekuphila kwami.

²⁴ Ngitsi: “Hhawu, Nkulunkulu wami, ungaphangisi ungitsatse ngisakhula. Iminyaka yakho yetitukulwane netitukulwane.

²⁵ Emandvulo wabeka tisekelo temhlaba, emazulu angumsebenti wetandla takho.

²⁶ Kuyakwendlula konkhe, wena uhlale unjalo nje, konkhe kuyawuguga njengengubo. Yebo, njengengubo uyawukugucula kusakateke.

²⁷ Kepha wena seloku unjalo nje, iminyaka yakho ayinasiphetfo.

²⁸ Bantfwana betinceku takho bayawuhlala baphephile, intalo yabo ihlale isimiswe embikwakho.”