Taga 9 - Siswati 1996 Bible

Kuhlakanipha nebulima

¹ Kuhlakanipha kwakhe indlu yako, kwayisimisa ngetinsika letisikhombisa.

² Kuhlabile, kwadidiyela liwayini lako, kwadeka litafula lako.

³ Kutfumele tincekukati tako kutsi tiphume tiye kuyawumemeta eticongweni telidolobha,

⁴ titsi: “Nine labate lwati, wotani lapha! Nine labate ingcondvo,

⁵ wotani nitewudla kudla kwami, ninatse neliwayini lengilihlanganisile.

⁶ Shiyani bulima benu, khona nitewuphila nihambe ngendlela yekucondza.”

⁷ Naweluleka sedzeleli, utilandzela inhlamba; nawucondzisa umuntfu lomubi, utawusuke akulimate.

⁸ Ungaseluleki sedzeleli, ngobe sitakutondza; yeluleka lohlakaniphile, yena utakutsandza.

⁹ Nawuyala umuntfu lohlakaniphile, utawusuka ahlakaniphe kakhulu; nawufundzisa umuntfu lolungile, yena usuka engete kulokufundza kwakhe.

¹⁰ Kwesaba Simakadze kusicalo sekuhlakanipha, nekumati Longcwele kuba nekucondza sibili.

¹¹ Mine kuhlakanipha, ngitakwandzisa emalanga akho neminyaka yekuphila kwakho.

¹² Nawuhlakaniphile, kusitakala wena; kodvwa nangabe usedzeleli, kutawuhlupheka wena.

¹³ Bulima bufanana nemfati lonemsindvo, longalati lihlazo nalongati lutfo,

¹⁴ lohlala emnyango wendlu yakhe embonisweni yelidolobha,

¹⁵ amemete emadvodza lendlulako atihambela ngemisebenti yawo, atsi:

¹⁶ “Wotani lapha, nine tilima.” Ukhuluma kubo bonkhe labate lwati atsi:

¹⁷ “Emanti ekwebiwa amnandzi, nekudla lokudlelwa emasitseleni kwehla esiphundvu.”

¹⁸ Lendvodza lasayitfumbile ayati kutsi akuyi lolubuyako lapho, nekutsi labangena kuye basemajukujukwini elithuna.