Taga 8 - Siswati 1996 Bible

Kudvunyiswa kwekuhlakanipha

¹ Utsi kambe kuhlakanipha akumemeti yini? Kona kucondza akuliphakamisi yini liphimbo lako?

² Kume embonisweni eceleni kwemgwaco; kume nasemahlanganweni emigwaco.

³ Kumemeta kakhulu emasangweni elidolobha nasetimphundvwini temasango kutsi:

⁴ “Bonkhe bantfu abalalele kimi, ngikhuluma kubo bonkhe.

⁵ Yeyi nine leningakakhuli engcondvweni, fundzani nikhule ekuhlakanipheni. Nine lenilibele, buyisani tingcondvo tenu.

⁶ Lalelani kimi, ngobe ngitawukhuluma tintfo letibalulekile; emlonyeni wami kutawuphuma liciniso.

⁷ Yebo, konkhe lengikukhulumako kuliciniso; emavi ebubi ngiyawatondza.

⁸ Konkhe lengikukhulumako kwetsembekile; kute lokugwegwile, kute nalokungemanga.

⁹ Kumuntfu lonekucondza, konkhe kucondzile; kulabanelwati, konkhe kuyakhanya.

¹⁰ Khetsani imfundziso yami kunesiliva, nikhetse lwati lwami kunegolide lecengiwe.

¹¹ “Ngobe kuhlakanipha kuncono kunematje laligugu; kute umcebo longawulinganisa nako.

¹² Mine lengikuhlakanipha, ngingumnikati webucotfo; lwati nemicabango lemihle kwami.

¹³ Kwesaba Simakadze kukutondza lokubi. Ngiyakutondza kutigcabha, neluchuku, nekutiphatsa dlephu, nebumbulu.

¹⁴ Kweluleka lokuhle nekwehlulela kahle kwami, kucondza kanye nemandla kwami.

¹⁵ Emakhosi abusa kahle ngami, nebabusi bashaya umtsetfo ngami.

¹⁶ Bonkhe lababusa ngekungakhetsi basitwa ngimi, nome ngabe tikhulu nome tindvuna.

¹⁷ Ngiyabatsandza laba labangitsandzako, nalabo labangifunisisako bayangitfola;

¹⁸ batfola ngami ingcebo neludvumo, babutfole ngami bunjinga lobungapheli kanye nekuchuma.

¹⁹ Labakutfola kimi kuncono kunegolide lecengiwe, sitselo sami sendlula isiliva lecengiwe.

²⁰ Ngihamba endleleni yekulunga, yebo, emikhondvweni yebumsulwa.

²¹ Ngibahlobisa ngekuceba labo labangitsandzako, tikhwama tabo batigcwalise ngemali.

²² “Simakadze wangidala, ngaba wekucala emisebentini yakhe, ngaba wekucala endalweni yakhe, ngiwasendvulo.

²³ Ngemiswa phakadze, ekucaleni, umhlaba ungakadalwa.

²⁴ Ngatalwa, kusete ngisho nekujula kwetilwandle, kusete tiyalu temanti lageletako.

²⁵ Tintsaba tisengakasekelwa etindzaweni tato, nemagcuma asengabibikho, mine ngase ngikhona,

²⁶ umhlaba nemave abesengakakwenti, ngisho nelitsantsana lemhlabatsi imbala.

²⁷ Ngangikhona mhlazana amisa emazulu, mhlazana abeka umkhatsi ehlukanisa sibhakabhaka netilwandle,

²⁸ mhlazana asimisa emafu etulu, acinisa imitfombo yetilwandle,

²⁹ mhlazana asika imincele yetilwandle, kuze emanti angalengci livi lakhe, mhlazana abeka tisekelo temhlaba,

³⁰ ngangiseceleni kwakhe, njengengcweti yekwakha. Nganginentfokoto lenkhulu onkhe emalanga, ngijabula embikwakhe njalonjalo.

³¹ Ngangidlalisela umhlaba wakhe, ngijabulela bantfu bonkhe.

³² “Manje-ke, madvodzana ami, ngilaleleni, babusisiwe labo labagcina imiyalo yami.

³³ Lalelani imfundziso yami, ningayedzeleli; nitawuhlakanipha.

³⁴ Ubusisiwe umuntfu longilalelako, longilindzela onkhe malanga emasangweni ami, logadza etimphundvwini teminyango yami.

³⁵ Umuntfu lotfola mine utfola kuphila, utakwemukela kutsandvwa nguSimakadze;

³⁶ kodvwa logeja kungitfola, utilimata yena, bonkhe labangitondzako batsandza kufa.”