Taga 6 - Siswati 1996 Bible

Letinye tecwayiso

¹ Ndvodzana yami, nangabe umelele makhelwane wakho nome-ke umuntfu wetive ngesikwelede lasentako,

² nangabe ungene elugibeni lwesetsembiso sakho, wabanjwa ngemavi akho,

³ naku-ke, ndvodzana yami, lofanele kukwenta khona utewukhululeka: Hamba uye kulomuntfu lokubambile umncenge aze akuvele.

⁴ Ungalali, ungavali ngisho nemehlo.

⁵ Tisindzise njengenyamatane ibalekela umtingeli, nanjengenyoni lephunyule esandleni semtingeli.

Tecwayiso ngebuvila

⁶ Hamba ufundze entfutfwaneni, wena vila-ndzini, kutsi iphila njani, khona utawuhlakanipha.

⁷ Lite tintfutfwane tite sikhulu nome indvuna nome umbusi,

⁸ kodvwa kudla kwato tikubutsa ehlobo tikulondvolote ngesikhatsi sekuvuna.

⁹ Wena vila-ndzini, uyawulala embhedzeni kudzimate kube ngunini?

¹⁰ Ukhuluma utsi: “Kulalalala kancane, kwetelatela kancane, kugocagoca tandla kancane, kuphumula kancane.”

¹¹ Kodvwa buphuya butawufika kuwe bukunyonyobele njengelisela, nekweswela kukuhlasele njengesihlupheki.

¹² Sihlangananhloko nome sihlophoyi sitfunguluta yonkhe indzawo sihamba sicala emanga,

¹³ sifica liso lapha nalapha, sisusa luchuku ngekuhlokolota nangekunyatsela lowa nalowa.

¹⁴ Sonkhe sikhatsi sakha emachinga ebubi enhlitiyweni yaso, sisuse nelutfutfuva lwekulwa.

¹⁵ Ngenca yaloku siyakwehlelwa yingoti masinyane sipitjitwe ngaphandle kwesecwayiso, singaphindzi sisindze.

¹⁶ Tisitfupha tintfo letenyanywa nguSimakadze, empeleni letisikhombisa uphambene nato kakhulu:

¹⁷ Ngemehlo latichenyako, nelulwimi lolucala emanga, nembulali walote licala,

¹⁸ nengcondvo lebumba emacebo ebubi, nemuntfu lotsandza lokubi,

¹⁹ nafakazi lotfulula emanga, nemuntfu locabanisa bazalwane.

Tecwayiso macondzana nekuphinga

²⁰ Ndvodzana yami, gcina umyalo weyihlo, ungayilahli imfundziso yenyoko.

²¹ Kucoboshele enhlitiyweni yakho, ukugace entsanyeni yakho.

²² Nawuhamba kuyawukucondzisa, nawulala kukugadze, nawuvukako kukweluleke.

²³ Ngobe umyalo usibane, imfundziso ikukhanya, kucondziswa ngekutsetsiswa kuyindlela yekuphila.

²⁴ Kuyawukuphephisa kumfati lomubi, nasemlonyeni lomnandzi wemfati walenye indvodza.

²⁵ Ungacali kumkhanukela buhle bakhe enhlitiyweni yakho, nome-ke akutfumbe ngemashiya akhe.

²⁶ Ngobe ingwadla ungayicasha ngemkhama wesinkhwa, kodvwa umgomo wemfati losiphingi kuhliphita nome kutfumba indvodza.

²⁷ Ikhona yini indvodza lengetfwala emalahle lavutsako ngetimphahla tayo, tendlule tingashi?

²⁸ Kungenteka yini ihambe etikwemalahle lavutsako, tinyawo tayo tingashi?

²⁹ Kanjalo-ke, nendvodza lelala nemfati walenye indvodza, ingeke ikubalekele kujeziswa.

³⁰ Bantfu abalibukeli phansi lisela lelebela kucosha indlala ngobe lilambile,

³¹ kodvwa nangabe libanjwa, kufanele likukhokhe sekuphindvwe kasikhombisa, tonkhe timphahla tendlu yakhe atetfule.

³² Lophingako weswela ingcondvo, nangabe aphinga nemfati, utibulala yena.

³³ Uyakushaywa ahlaziswe njengobe kufanele; lihlazo lakhe lingeke lesulwe.

³⁴ Ngobe sikhwele sivusa lulaka lwalendvodza yakhe lephingelwe, nase iphindzisela, ingeke ibe nesihawu.

³⁵ Kute nenhlawulo leyawukwenta lendvodza lephingelwe ibuyisane naye, futsi kute kwekuncenga lengamnika kona nome ngabe kukhulu kanganani.