Taga 31 - Siswati 1996 Bible

Umyalo locondziswe enkhosini Lemuweli

¹ Leti-ke taga taLemuweli, inkhosi yaseMasa, latifundziswa ngunina:

² “Lalela, ndvodzana yami, ndvodzana yesisu sami! Wena uyimphendvulo yemthandazo wami.

³ Emandla akho ungawacitsi kulabasikati; yebo, emandla ekuphila kwakho ungawacitseli kulabo lababhubhisa emakhosi.

⁴ Lalela-ke, Lemuweli: Emakhosi kufanele angalinatsi liwayini nome ngabe yini lokudzakanako.

⁵ Nase banatsa bayayikhohlwa lemitsetfo lebekiwe, bese bakhohlwa emalungelo alabacindzetelwe.

⁶ Tjwala bebantfu labafako kanye nalabo labaselusizini.

⁷ Bayekele banatse batewudzakwa bakhohlwe tinhlupheko tabo, bangalukhumbuli lusizi lwabo.

⁸ “Khuluma ubemelele labo labehluleka kutikhulumela. Vikela emalungelo alabo labangenalusito.

⁹ Khuluma wehlulele kahle. Vikela emalungelo alabeswele nalabamphofu.”

Umfati sibili

¹⁰ Ngubani longatfola umfati sibili? Uligugu lelengca onkhe ematje laligugu.

¹¹ Indvodza yakhe yetsembele kuye ngenhlitiyo yayo yonkhe, futsi ingeke yeswele lutfo.

¹² Uyentela lokuhle ngaso sonkhe sikhatsi sekuphila kwakhe, akayenteli lokubi.

¹³ Ukhetsa insontfo lenhle nakotini lokahle, asebente ngetandla letivumako.

¹⁴ Njengemikhumbi yebahwebi, kudla kwemndeni wakhe ukulandza khashane.

¹⁵ Uvuka kungakasi alungisele umndeni wakhe kudla, bese wabela tidzandzane takhe imisebenti.

¹⁶ Utsi angatfola indzawo, ayitsenge ngemali latentele yona ngetandla takhe, bese uyayilima wenta sivini.

¹⁷ Ukhutsele, uyabhukula afinyete tidvwaba, acinise tandla, asebente.

¹⁸ Uyacaphelisisa kutsi umsebenti wakhe uyayingenisa yini inzuzo, asebente kuze kube ngusebusuku.

¹⁹ Uyatitfungela atelukele.

²⁰ Unesandla ekusiteni labamphofu, aphe nalabeswele.

²¹ Kukhitsika kwelitulu akumetfusi, ngobe bonkhe bemndeni wakhe banetimphahla letifutfumalako.

²² Wenta tembeso temibhedze, embatse timphahla letentiwe ngakotini locolisakele naletibukhwebeletane.

²³ Indvodza yakhe iyahlonishwa emasangweni, lapho ingulenye yemalunga emsumphe khona.

²⁴ Utfunga tingubo ngendvwangu lecolisakele, bese utsengisela bahwebi.

²⁵ Wembetse emandla nekuhlonipheka, futsi akesabi lutfo ngelikusasa.

²⁶ Ukhuluma kuhlakanipha, lulwimi lwakhe lugcwele teluleko temusa.

²⁷ Ucaphelisisa konkhe lokwenteka ekhaya lakhe, akavilaphi.

²⁸ Bantfwabakhe bayamhlonipha, nendvodza yakhe futsi iyamdvumisa idzimate itsi:

²⁹ “Banyenti bafati labenta tintfo letinhle, kodvwa wena ubendlula bonkhe.”

³⁰ Buhle buyayengana, nekubukeka kulite; kodvwa umfati lowesaba Simakadze ufanele kudvunyiswa.

³¹ Mbonge ngako konkhe lakwenta ngetandla takhe; umdvumisele imisebenti yakhe layentile ngisho nasemkhatsini webantfu.