Taga 30 - Siswati 1996 Bible

Emavi lahlakaniphile a-Aguri

¹ Leti-ke taga ta-Aguri, umsa waJakhe waseMasa: “Nkulunkulu ungilahlile, ungilahle mbamba, sengiphelelwe ngemandla!

² Sengifanana nesilwane, angisesiye umuntfu, ngobe tintfo angisaticondzi njengemuntfu.

³ Angikakufundzi kuhlakanipha; angimati naLongcwele.

⁴ “Ngubani lowake waya ezulwini waphindze wabuya? Ngubani lophetse imimoya etandleni takhe? Ngubani logocotele emanti ngengubo yakhe? Ngubani lowamisa yonkhe imikhawulo yemhlaba? Ngubani libito lakhe nelendvodzana yakhe? Ungangitjela nje?

⁵ “Nkulunkulu wetsembekile etetsembisweni takhe. Uyabaphephisa labo labeta kutewukhosela kuye.

⁶ Ungengeti lutfo etetsembisweni takhe. Uma uke wengeta nje, uyakukutsetsisa utfolakale ungumuntfu wemanga.”

Letinye taga

⁷ Ticelo tami timbili, Nkulunkulu, lengicela kutsi ungiphe ngisengakafi:

⁸ Ngisindzise ekukhulumeni emanga. Buphuya nebunjinga ungangiphi, kodvwa umane ungiphe lengikudzingako.

⁹ Nangingaba nako kube kunyenti, ngingahle ngicabange kutsi wena angisakudzingi, ngidzimate ngitsi: “Ngubani yena loSimakadze?” Nome-ke nangingaba luphuya, ngingahle ngebe, ngaloko ngihlazise Nkulunkulu wami.

¹⁰ Ungakhulumi kabi ngesisebenti kumphatsi waso; nawenta loko, sitakucalekisa uhlupheke.

¹¹ Labanye bantfu bacalekisa boyise, bangabongi ngisho nekubonga kubonina.

¹² Labanye bantfu bacabanga kutsi bona bahlantekile; kantsi bangcole kakhulu, abakahlantwa.

¹³ Labanye bayatigcabha, bahlala ngekuchukuluta labanye bantfu.

¹⁴ Labanye bantfu banematinyo latinkemba, nemihlatsi lengimikhwa; yebo, babukhali. Baloshela bamite tonkhe timphuya emhlabeni.

¹⁵ Simunyangati unemadvodzakati lamabili; emabito awo boNgiphe naNgiphe. Tintsatfu tintfo letingeneliswa, kantsi empeleni tine letingeke tisho titsi: “Sekwenele”:

¹⁶ Lithuna, nemfati loyinyumba, nemhlabatsi lowomele imvula, nemlilo longacimeki.

¹⁷ Liso leliphukuta uyise, ledzelele nenina nasagugile, liyawukhokhwa ngemahhwabayi; yebo, lowo muntfu uyawuba kudla kwemangce.

¹⁸ Kukhona tintfo letintsatfu letiyimfihlakalo, kantsi empeleni tine lengingaticondzi kahle:

¹⁹ Yindlela yelusweti esibhakabhakeni, nendlela yenyoka edvwaleni, nendlela yemkhumbi elwandle, nendlela yelijaha entfombini.

²⁰ Lena-ke yindlela yemfati loyingwadla: Udla esule umlomo, bese utsi: “Angikenti lutfo mine lolubi.”

²¹ Tintsatfu tintfo letitfutfumelisa umhlaba, kantsi empeleni tine umhlaba lowehluleka kutibeketelela:

²² Kubekwa kwesigcili kuba yinkhosi, silima nasishaye inala,

²³ kushada kwentfombi lebeyenyanywa ngemajaha, nesidzandzane lesisisebenti, nase sengcelele umfati endvodzeni yakhe.

²⁴ Lapha emhlabeni kukhona tilwanyakatana letincane, kodvwa tihlakaniphe kakhulu:

²⁵ Tintfutfwane: tibutsakatsaka, kodvwa tikwekhweta ehlobo kudla kwato.

²⁶ Timbila: tilwanyakatana letite emandla, noko takha emakhaya ato emadvwaleni.

²⁷ Sikhonyane: site inkhosi, noko sihamba ngemaviyo.

²⁸ Tibankhwa: ungatibamba ngesandla, kodvwa ungatikhandza ngisho nasetindlini temakhosi.

²⁹ Kunetintfo letintsatfu letihamba ngekutigcabha; kodvwa leti letine tihamba ngekutigabatisa:

³⁰ Libhubesi: linemandla kunato tonkhe tilwane, futsi alesabi lutfo.

³¹ Lichudze: liyantontomela emkhatsini wetikhukhukati. Siphongo: singumholi wemhlambi wetimbuti. Inkhosi: nayime embikwemabutfo ayo.

³² Nangabe wente bulima watiphakamisa nome wacabanga kwenta lokubi, sale sewuyekela.

³³ Kuphehla lubisi kuveta liphehla. Kushaya likhala kuveta ingati. Kanjalo, nekususa luchuku kuveta kucabana.