Taga 29 - Siswati 1996 Bible

¹ Umuntfu lotsi nakelulekwa acinise inhloko, uyakufohlotwa masinyane.

² Nakungena bantfu labalungile ebuholini, bantfu bayajabula; kodvwa nakubusa bantfu lababi, bantfu bayakhonona.

³ Umuntfu lotsandza kuhlakanipha ujabulisa uyise; kodvwa longumngani wetingwadla uhlaphata lifa lakhe.

⁴ Inkhosi lebusa ngekulunga, live layo liba nesizotsa; kodvwa lebeka imali embili ibhubhisa live layo.

⁵ Umuntfu lolutsa makhelwane wakhe ambonge ngelite, utetsiya yena.

⁶ Kunelugibe etentweni letimbi temuntfu, kodvwa lolungile uhamba ajabula.

⁷ Umuntfu lolungile unakekela emalungelo alabamphofu; kodvwa lomubi akanandzaba naloko.

⁸ Tedzeleli letingenandzaba nebantfu, tingesusa lutfutfuva kuwo onkhe emadolobha; kodvwa bantfu labahlakaniphile baletsa kuthula nelucolo.

⁹ Nangabe umuntfu lohlakaniphile amangalela silima, lesilima sisuke sihleke setfuke ngenhlamba.

¹⁰ Babulali bayamtondza umuntfu lowetsembekile; kodvwa labalungile betama kuphephisa kuphila kwakhe.

¹¹ Silima siyabonakalisa nase sitfukutsele; kodvwa lohlakaniphile uyatibamba angatibonakalisi.

¹² Nangabe umbusi anaka labakhuluma emanga, tonkhe tindvuna takhe tiba nemanga.

¹³ Umcindzeteli nalocindzetelwe bafanana ngantfo yinye, kutsi: Bobabili Nkulunkulu wabapha emehlo ekubona.

¹⁴ Nangabe inkhosi iwavikela ngekungakhetsi emalungelo ebantfu labamphofu, iyawubusa sikhatsi lesidze.

¹⁵ Luswati nekuyalwa kunika inhlakanipho; kodvwa umntfwana longashaywa nalongayalwa uhlazisa unina.

¹⁶ Nangabe bantfu lababi basetikhundleni, bubi buyandza; kodvwa labalungile bayakubona kuwa kwalabo lababi.

¹⁷ Condzisa indvodzana yakho, khona itakunika kuthula kwemphefumulo. Ingeke ikuhlazise.

¹⁸ Lapho kute khona kwembulelwa nguNkulunkulu, bantfu bayeduka; kodvwa ubusisiwe umuntfu logcina umtsetfo waNkulunkulu.

¹⁹ Sisebenti ungeke usicondzise nawutawulibala kukhuluma ngemlomo; ngobe nome singeva, singeke sente.

²⁰ Uyamati nje umuntfu lophike kukhuluma angakacabangi? Sincono silima kunaye.

²¹ Nangabe wetayeta sisebenti ngekusinika konkhe lesikufunako, nase sikhulile sitakwemuka konkhe lokukwakho.

²² Umuntfu losheshe atfuketsele ususa lutfutfuva; yebo, umuntfu lonenhlitiyo lencane ubanga tono letinyenti.

²³ Kutigcabha kwemuntfu kumletsela kuwa; kodvwa lotfobekile utfola kuhlonipheka.

²⁴ Umngani welisela usitsa sakhe cobo lwakhe. Umehluleli uyakumjezisa nakakhuluma liciniso, kantsi Nkulunkulu uyakumcalekisa nakangalikhulumi.

²⁵ Kwesaba bantfu kulugibe; kodvwa lowo lowetsembekile kuSimakadze ulondvolotekile.

²⁶ Bantfu labanyenti bafunana nekutsandvwa ngumbusi; kodvwa imphatfo lengakhetsi muntfu itfolakala kuSimakadze kuphela.

²⁷ Labalungile bayabatondza lababi; nalababi bayabatondza labalungile.