Taga 28 - Siswati 1996 Bible

¹ Bantfu lababi babaleka ngisho nome kute umuntfu lobacoshako; kodvwa lolungile unesibindzi lesinjengeselibhubesi.

² Nakukhona kuvukela umbuso eveni, live liba makhosikhosi; kodvwa nangabe baholi balelo live banekuhlakanipha nekucondza, kuba nekuthula.

³ Umholi lomubi lophuyile acindzetele labamphofu ufanana nesikhukhula selitulu leligcoba livungule.

⁴ Labo labephula umtsetfo ngemabomu badvumisa lababi; kodvwa labo labahlonipha umtsetfo baphambana nebantfu lababi.

⁵ Bantfu lababi abacondzi kahle lokulungile kutsi kuyini; kodvwa labo labakhonta Simakadze bakucondzisisa kahle konkhe.

⁶ Kuncono kuba mphofu kodvwa ube wetsembekile, kunekutsi ucebe ube ungaketsembeki.

⁷ Indvodzana lelalela umtsetfo ihlakaniphile; kodvwa lengumngani wetiyingayinga ihlazisa uyise.

⁸ Nangabe umuntfu acetjiswa kwebolekisa ngekubita intalo lenkhulu, ingcebo yakhe itakuya kubantfu labaphatsa kahle timphuya.

⁹ Nangabe umuntfu angafuni kugcina umtsetfo, ngisho nemithandazo yakhe iyenyanyeka kuNkulunkulu.

¹⁰ Lowo loholela lolungile endleleni lembi kuyawubanjwa yena kulolo lugibe. Lolungile uyawuvuzwa kakhulu.

¹¹ Sicebi singacabanga kutsi sihlakaniphile; kodvwa luphuya loluhlakaniphile lwati kancono kutsi liciniso liyini.

¹² Nangabe labalungile baba baholi, bonkhe bantfu bayajabula; kodvwa nangabe baholi kuba ngulababi, bantfu baphila ngekubhaca.

¹³ Umuntfu lofihla tono takhe angeke aphumelele; kodvwa lotivumako atishiye uyawutfola umusa.

¹⁴ Ubusisiwe umuntfu lowesaba Simakadze. Lowenta inhlitiyo ibe lukhuni uyawubhujiswa.

¹⁵ Njengelibhubesi lelibhodlako nelibhele lelihhongako, unjalo umbusi lomubi lobusa bantfu labeswele.

¹⁶ Umbusi lobusa ngencindzetelo usilima; kodvwa lotondza kutsengeka uyawuphila sikhatsi lesidze.

¹⁷ Umuntfu nakanelicala lekubulala, myekele abaleke aze afe.

¹⁸ Umuntfu lophila ngekwetsembeka uyawuphepha; kodvwa lophila imphilo legwegwile uyakuwa.

¹⁹ Umuntfu lowulimako umhlaba wakhe uhlala anenala; kodvwa lolibala kulandzelana nemisebenti lelite uyakwesutsa bumphofu.

²⁰ Umuntfu lowetsembekile uyawuchuma; kodvwa lojaka kuceba uyawutfola sijeziso.

²¹ Kubi kukhetsa bantfu; kodvwa labanye bayona ngekukhetsana ngenca yekudizelwa kancane nje.

²² Lifelela litimisela ngekutsi licebe; alati kutsi linyonyobelwa buphuya.

²³ Loyalako ubongwa kakhulu ekugcineni kunalowo lolutsa lomunye ambonge ngelite.

²⁴ Umuntfu lowebela uyise nenina abe atiyenga atsi: “Akusiso sono loko,” ufanana nesigelekece lesisidlova.

²⁵ Umuntfu loligovu ususa lutfutfuva; kodvwa lowo lowetsemba Simakadze uyawuchuma.

²⁶ Umuntfu lotetsemba yena usilima; kodvwa lohamba ngekuhlakanipha uyawuphepha.

²⁷ Umuntfu lopha timphuya angeke eswele; kodvwa lotitsalaliselako uyawutfola ticalekiso letinyenti.

²⁸ Nakungena bantfu lababi etikhundleni, bantfu bayabhaca; kodvwa nakuwa lababi, labalungile bayaphumelela bahlale etikhundleni.