Taga 27 - Siswati 1996 Bible

¹ Ungatigabatisi ngelikusasa lakho, ngobe awati kutsi lilanga ngelilanga likutela nani.

² Ungatidvumisi wena, kodvwa dvunyiswa ngulabanye; dvunyiswa ngulabanye bantfu, hhayi wena.

³ Litje limatima, nesihlabatsi siyasindza, ungeke ukwetfwale; kodvwa kucansulwa silima kukwengca konkhe.

⁴ Lulaka lungesabeka nentfukutselo ibe nebudlova; kodvwa kute longakhona kumelana nemona.

⁵ Kuncono uvele umuntfu umtsetsise kukhanye kunekumyekela ungamtsetsisi ngesizatfu sekutsi uyamtsandza.

⁶ Umngani usuke atimisele lokuhle ngawe, nome akulimatile; kodvwa ubocaphela ingoti, nangabe sitsa sakho sikwanga kanyenti.

⁷ Nawesutsi, ngisho nekudla lokumnandzi uyakuchwensa; kodvwa nawulambile, ngisho nekudla lokubi kuba mnandzi.

⁸ Umuntfu loshiya likhaya lakhe ufanana nenyoni lese ilahle sidleke sayo.

⁹ Emakha nemafutsa lanuka kamnandzi ajabulisa inhlitiyo; kodvwa bungani sibili buyawuphakamisa umphefumulo.

¹⁰ Ungakhohlwa umngani wakho nemngani weyihlo. Nawehlelwa yinhlupheko ungayi kuyawucela lusito kumnakenu; kuncono uye kumakhelwane losedvutane kunekuya kumnakenu lokhashane.

¹¹ Ndvodzana yami, hlakanipha, khona ngitewujabula, ngitekwati kuphendvula nome ngabe ngubani longedzelelako.

¹² Umuntfu lohlakaniphile uyibona iseta ingoti bese uyayibalekela, uyabhaca; kodvwa longakahlakaniphi uyatfusha nje, etfuke asasetikwayo, atisole kamuva.

¹³ Tsatsa sibambiso salofungela sihambi kutsi sitekutsatsa sikwelede; sitsatse sibe sibambiso salesihambi.

¹⁴ Nangabe umuntfu avusela makhelwane wakhe ngemsindvo ekuseni, kuyawutsatfwa ngekutsi uyacalekiswa.

¹⁵ Umfati lotsetsela futsi ufanana nekuntfontsa kwemanti latsi ntfo-ntfo-ntfo nalina.

¹⁶ Kwetama kumthulisa kufanana nekwetama kuvimba umoya nome kwetfwala emafutsa lancibilikile ngesandla.

¹⁷ Njengensimbi lelola lenye insimbi, kanjalo nebantfu bayahlakaniphisana.

¹⁸ Umuntfu lohlakulela umkhiwa uyakudla titselo tawo, nalowo lophetse kahle umcashi wakhe uyakwemukela ludvumo.

¹⁹ Nawutibuka emantini, ubona lingephandle lakho lelibuso bakho; nawutibuka enhlitiyweni, ubona lingekhatsi lakho lelinguwe sibili.

²⁰ Njengobe emehlo emuntfu angeke eneliswe, kanjalo lithuna nekufa kungeke kweneliswe.

²¹ Isiliva negolide ihlolwa ngemlilo; kodvwa umuntfu uhlolwa ngeludvumo lalunikwa bantfu.

²² Nome silima ungasigaya etjeni lekusila sibe yimphuphu nome inhlama, kodvwa bulima baso ungeke ubukhiphe kuso.

²³ Nakekela imihlambi yetimvu netinkhomo takho, uyeluse kahle,

²⁴ ngobe ingcebo ayihlali siphelane, iyaphunyula; ngisho nekubusa kwemakhosi akuhlali kukhona siphelane.

²⁵ Nakusikwe tjani, kwase kuhluma lobusha, lemihlambi ingadla.

²⁶ Timvu tiyawukungenisela timphahla tekwembatsa, timbuti tikungenisele imali yekutsenga emasimi.

²⁷ Uyawuba nelubisi lwetimbuti lolunyenti lwekutsi utondle wena nebantfwabakho kanye netisebenti takho.