Taga 26 - Siswati 1996 Bible

¹ Njengesitfwatfwa ehlobo nome imvula nakuvunwako, kunjalo kudvumisa silima.

² Njengancedze londiza angahlali, nenkonjane lendiza ingahlali, sinjalo sicalekiso; asimehleli umuntfu longakasifaneli.

³ Emahhashi ayatalajwa, timbongolo tifakwa ematomu, netilima tiyashaywa.

⁴ Ungasiphendvuli silima ngebulima baso; nawenta njalo, nawe utawuba silima njengaso.

⁵ Phendvula silima njengalokufanele bulima baso, khona sitawubona kutsi asikahlakaniphi njengobe siticabanga.

⁶ Nangabe utfumela umbiko ngesilima, utiletsela inhlupheko, ngobe kufanana nekutsi ujuba tinyawo takho.

⁷ Emavi lahlakaniphile lakhulunywe silima akanamsebenti, afanana nemilente yesishosha.

⁸ Njengekubophela litje esidubulelweni, kunjalo kudvumisa silima.

⁹ Njengesidzakwa nasikhipha linyeva esandleni, anjalo emavi lahlakaniphile nasemlonyeni wesilima.

¹⁰ Umuntfu locasha silima nome ngubani nje lowendlulako, ufanana nemuntfu lodubula nome ngukuphi nje ngebutjoki alimate konkhe.

¹¹ Silima lesenta intfo lembi kuze kube kabili sifanana nenja yona lebuyela iyekudla emahlante ayo.

¹² Wake wambona kambe umuntfu locabanga kutsi uhlakaniphile? Silima sincono kakhulu kunaye.

¹³ Livila liyatitila litsi: “Ngingeke ngiphume, ngobe kunelibhubesi endleleni!” Liphindze litsi: “Kunelibhubesi emgwacweni.”

¹⁴ Njengesivalo sijikajika sibanjwe ngemahhuka, kanjalo nelivila lilala lijilajila embhedzeni walo.

¹⁵ Livila liyasifaka sandla salo endishini, kodvwa bese lehluleka kusifaka emlonyeni walo.

¹⁶ Livila liyaye licabange kutsi lihlakaniphe kakhulu kwendlula emadvodza lasikhombisa laphendvula ngekuhlakanipha.

¹⁷ Umuntfu longena ekucabaneni kwalabanye ufanana nemuntfu lobamba inja lengumkhenkhetse ngemadlebe.

¹⁸ Njengeluhlanya loludubula nome ngukuphi ngebutjoki,

¹⁹ uyingoti kanjalo umuntfu loyenga makhelwane abese utsi: “Cha, mine bengidlala.”

²⁰ Ngaphandle kwetinkhuni umlilo uyacima; yebo, nangaphandle kwenhlebo incabano iyaphela.

²¹ Emalahle enta umlilo ukhehleke, tinkhuni tivutsisa umlilo, nemuntfu welutfutfuva ubhedla inkhani.

²² Emavi enhlebo afanana nemtsamo wekudla lokumnandzi; ehla kamnandzi afinyelele ngekhatsi kwemuntfu.

²³ Njengeludziwo loluhucwe ngesiliva, anjalo emavi ekuyengana laphuma emlonyeni lonenhlitiyo lembi.

²⁴ Umuntfu lotentisako ukhuluma kamnandzi, kantsi enhlitiyweni yakhe ufihle kuyengana.

²⁵ Nome inkhulumo yakhe ingaba mnandzi kanjani, ungakholwa; ngobe ngekhatsi inhlitiyo yakhe igcwele bucili.

²⁶ Inzondo yakhe angayimbonya ngemavi ekutentisa, kodvwa bubi bakhe buyawubasebaleni ngalelinye lilanga.

²⁷ Nangabe umuntfu emba umgodzi wekwetsiya labanye, kuyakugcumkela yena; nome agicitela labanye ematje, kodvwa ayakugicikela kuye.

²⁸ Umuntfu localemanga uyabatondza labo labacalela emanga, nelulwimi lolumphacambili luletsa kufa.