Taga 25 - Siswati 1996 Bible

Letinye taga taSolomoni

¹ Leti nguletinye taga taSolomoni letabhalwa bantfu baHezekiya, inkhosi yakaJuda.

² Bukhosi baNkulunkulu bubonakala kuloko lakufihlile; kodvwa bukhosi bemakhosi busekuphenyisiseni tintfo.

³ Njengekuphakama kwesibhakabhaka nekujula kwemhlaba, kunjalo kucabanga kwenkhosi, ungeke ukwati.

⁴ Susa kungcola kuyo isiliva, khona lomkhandzi atewukhandza intfo lenhle ngayo;

⁵ susa beluleki lababi edvute nenkhosi, kuze itewubusa ngekulunga.

⁶ Nawusembikwenkhosi, ungatenti lohlakaniphile nome utibeke esigabeni salabakhulu;

⁷ ngobe kuncono kwenyuselwa esikhundleni lesiphakeme kunekwehliselwa phansi, bantfu labakhulu bakubuka.

⁸ Ungasheshi uye enkantolo ngaloko lokubonile, ngobe nase kuphele lelicala lomunye wafakaza wakwenta silima, utawube sewentani-ke?

⁹ Nawunelicala namakhelwane wakho, khulumisana naye nilungisane; ungayibhabati imfihlo yalomunye umuntfu,

¹⁰ funa lona lokuvile akutsele ngelihlazo, bantfu bangaphindzi bakwetsembe.

¹¹ Livi lelikhulunywe ngesikhatsi lesifanele lifanana nemahhabhula egolide labekwe etindishini tesiliva.

¹² Njengelicici legolide, nanjengemhlobiso loligugu, linjalo livi leseluleko kulolivako alente.

¹³ Sitfunywa lesetsembekile sijabulisa lowo lositfumile, njengemanti lacandzako ehlobo; yebo, sihlumelelisa umoya wenkhosi yaso.

¹⁴ Njengemoya nemafu late imvula, unjalo umuntfu lotigabatisa ngetipho langatenti.

¹⁵ Ngekubeketela umbusi angancengeka aze avume, nelulwimi lolumnandzi lungatsambisa ematje.

¹⁶ Nawutfole luju, ubodla lolo loludzingako; ungaludli kakhulu, ngobe lutakugulisa.

¹⁷ Ungavamisi kuvakashela makhwelwane wakho, funa adzinwe nguwe bese uyakutondza.

¹⁸ Umuntfu lofakaza emanga ngamakhelwane wakhe uyingoti njengesicwayi, nome njengenkemba, nome njengesikhali lesikhaliphako.

¹⁹ Kwetsembela kumuntfu longetsembeki ngesikhatsi lesibucayi kufanana nekwetsemba litinyo lelibolile nome kwetsemba lunyawo lolwenyele.

²⁰ Kuhlabelela umuntfu lodzabukile kufanana nekukhumula tingubo takhe kucandza nome nekutsela viniga esilondzeni.

²¹ Nangabe sitsa sakho silambile, siphe kudla sidle; nasomile, siphe emanti sinatse.

²² Ngekwenta loko utawube usidlisa ngemahloni, Simakadze utakuvuza.

²³ Njengobe umoya wasenyakatfo uletsa imvula, kanjalo nenhlebo iletsa kutfukutsela.

²⁴ Kuncono kutihlalela wedvwana etaleni kunekuhlala endlini yinye nemfati lotsetsela futsi.

²⁵ Tindzaba letimnandzi letiphuma eveni lelikhashane tifanana nemanti lacandzako emphefumulweni lokhatsele.

²⁶ Njengemtfombo lodvungekile nome siyalu lesinashevu, unjalo umuntfu lolungile nakatihlanganisa nemuntfu lomubi.

²⁷ Bubi bekuhalela ludvumo bufanana nekudla kakhulu luju.

²⁸ Umuntfu lowehluleka kutibamba ufanana nelidolobha lelibhidlikelwe tindvonga talo.