Taga 24 - Siswati 1996 Bible

¹ Ungabi namona nebantfu lababi, futsi ungafisi kutsi babe bangani bakho.

² Etingcondvweni tabo bacabanga budlova, imilomo yabo ikhuluma ngekulimatana.

³ Umuti wakhiwa ngekuhlakanipha, usimiswe ngekucondza;

⁴ ngelwati tindlu tigcwaliswe ngemicebo lemihle lengakavami.

⁵ Umuntfu lohlakaniphile unemandla kakhulu, kwendlula sichwaga; yebo, lonelwati uncono kunalonetikhwepha.

⁶ Ubotsatsa umyalo lohlakaniphile, nawuphuma imphi; kuncoba kusekubeni nebeluleki labalungile labanyenti.

⁷ Kucondza kungetulu kwemandla esilima; nase kukhulunywa ngempela, kute lesingahle sikusho silima.

⁸ Umuntfu lohlose kwenta lokubi uyawuba neludvumo lolubi.

⁹ Tinhloso tesilima tisono, nebantfu bayamtondza umuntfu lowedzelelako.

¹⁰ Nawukhubatela ngesikhatsi lesibucayi, usuke unemandla lamancane.

¹¹ Nawubona bantfu bayawubulawa, ngaphandle kwesizatfu, baphephise;

¹² ungasho kutsi: “Bengingakwati-ke loku,” ngobe Nkulunkulu uyati, ehlulele tinhloso takho. Lowo lokwelusako uyakwati loko. Yena uyawuvuza lowo nalowo njengekwemisebenti yakhe.

¹³ Ndvodzana yami, ubodla luju ngobe lumnandzi, nematfonsi etinhlanga tetinyosi ayanongotela.

¹⁴ Yati futsi kutsi kuhlakanipha kumnandzi; ngobe nawutfole kona, unesiciniseko ngelikusasa lakho, nelitsemba lakho alinawuphelela eteni.

¹⁵ Ungasilingisi sigelekece ngekunyenyela lolungile kutsi umlimate endlini yakhe, ungayihlaseli ngisho nendzawo lapho ahlala khona;

¹⁶ ngobe nome lolungile angawa emahlandla lasikhombisa, noko uyawuvuka; kodvwa lababi bayawubhubha.

¹⁷ Ungakujabuleli kuwa kwesitsa sakho, inhlitiyo yakho ingatfokoti nasikhubatela;

¹⁸ ngobe Simakadze angahle akubone angete ajabula, esuse lulaka lwakhe kuso.

¹⁹ Ungahlupheki ngebantfu lababi, ungabi namona nabo;

²⁰ ngobe umuntfu lomubi akanalo likusasa lelihle. Bumnyama bodvwa lobummele.

²¹ Ndvodzana yami, ubohlonipha Simakadze nenkhosi yeluhlanga. Ungahambisani nalabamelene naSimakadze nenkhosi,

²² ngobe bayawubhubha masinyane. Ngubani nje longati tehlakalo letingehliswa nguSimakadze nenkhosi?

Letinye Taga

²³ Nati-ke futsi letinye taga talabahlakaniphile: Kubi nangabe umehluleli ehlulela ngekukhetsa.

²⁴ Nangabe akhuluma kulona lolahlwa licala atsi: “Ute licala,” bonkhe bantfu bayakumcalekisa bamtondze;

²⁵ kodvwa behluleli labayawuchuma babusiseke, ngulabo labajezisa labo labafanele kujeziswa.

²⁶ Umuntfu lonika imphendvulo leyetsembekile ukhombisa bungani lobungibo sibili.

²⁷ Cedzela kucala imisebenti yakho yangaphandle, ulungise emasimi akho, bese wakha indlu yakho.

²⁸ Ungabenti bufakazi bekulahla makhelwane wakho ngelicala ngaphandle kwesizatfu, ungamcaleli ngisho nemanga.

²⁹ Ungasho nekutsi: “Ngitamenta loko langenta kona! Ngitakwenana njengobe enta kimi!”

³⁰ Ngase ngendlula eceleni kwensimi yelivila, bekusivini semuntfu longenangcondvo.

³¹ Kwakunemena wesaphulamshini, nembabatane, nelutsango lwakhona seluwile.

³² Ngatsi kube ngikubone loku, ngafundza nasi sifundvo:

³³ “Kulalalala kancane nekwetelatela kancane, kanye nekugoca tandla kancane, uphumule;”

³⁴ kodvwa utawutsi usalele, buphuya bukuhlasele njengesigebengu, nekweswela kukuvimbetele njengesifo.