Taga 23 - Siswati 1996 Bible

¹ Nangabe umbusi akumeme kutsi utekudla naye, ubokhumbula kutsi ungubani lowo mmemi wakho.

² Nawulambile, tibambe ungadli.

³ Ungakuhawukeli kudla lakunika kona nome kumnandzi kanganani, tibambe; kungahle kube lugibe.

⁴ Caphela ungatibulali ngekucoshana nebunjinga; tsatsa kuhlakanipha nekutibamba.

⁵ Bunjinga buyawunyamalala emehlweni akho ububuka; buyawushesha bundize njengelusweti.

⁶ Ungadli nemuntfu lowemanako; ungakuhaleli nekudla kwakhe nome kungaba mnandzi kanganani.

⁷ Nawukudla lokudla, kuyawukubamba emphinjeni. Ungamuva atsi: “Dlani, unatse,” kantsi inhlitiyo yakhe ayikho lapho.

⁸ Uyawukuhlanta naloko lokuncane lokudlile, ukhandze kutsi ubongele lite.

⁹ Ungasicitsi sikhatsi sakho ngekukhuluma intfo lenengcondvo esilimeni, ngobe singeke siwemukele lamavi akho.

¹⁰ Ungayisusi iminyele lese yabekwa kadzeni nome-ke udle live letintsandzane.

¹¹ UMvikeli wato unemandla, uyakutitsatsela sikhundla emelane nawe.

¹² Yenta ingcondvo yakho yemukele imiyalo, ulalelisise loko lofundziswa kona.

¹³ Ungesabi kumcondzisa umntfwana; ngobe nawumfaka luswati, angeke afe.

¹⁴ Kumshaya ngeluswati kuyawusindzisa imphilo yakhe ekufeni.

¹⁵ Ndvodzana yami, nangabe unekuhlakanipha enhlitiyweni yakho, inhlitiyo yami iyawujabula.

¹⁶ Ngiyawutfokota enhlitiyweni yami, nangiva ukhuluma emavi ekuhlakanipha.

¹⁷ Ungahawukeli lutfo etonini, kodvwa yesaba Simakadze ngetikhatsi tonkhe;

¹⁸ ngobe likusasa lakho liyawuba nekuciniseka nemphumelelo.

¹⁹ Ndvodzana yami, lalela; ubolalela, khona utekuhlakanipha. Ingcondvo yakho yibeke endleleni lengiyo sibili.

²⁰ Ungabi ngumngani wetidzakwa nome timiti.

²¹ Tidzakwa netimiti tiphetsa ngebuphuya. Nawuphila ngekulala ungasebenti, uyawugcina wembatsa emanikiniki.

²² Lalelisisa uyihlo, ngobe nguye lowakutala; ungamedzeleli nenyoko ngobe asagugile.

²³ Tsenga liciniso ungatsengisi ngalo. Zuza kuhlakanipha, nemiyalo, nekucondza konkhe; ungakhohlwa ngiko.

²⁴ Uyise wendvodzana lelungile uyajabula; nangabe indvodzana ihlakaniphile, uyise uyatfokota.

²⁵ Yenta uyihlo nenyoko batigcabhe ngawe; yebo, ajabule nenyoko lowakutala.

²⁶ Ndvodzana yami, ngilalele utigcine ngekunakekela tindlela tami.

²⁷ Tingwadla tingumgodzi lojulile, nemfati losiphingi ulugibe lolubulalako.

²⁸ Betsiya emadvodzana ebantfu bawabhacele emasitseleni njengetigebengu, batfumbe emadvodza lamanyenti bawente angasetsembeki.

²⁹ Ngubani lotsi: “Maye?” Ngubani lonelusizi? Ngubani lonenkhani? Ngubani lokhononako? Ngubani lonemanceba nemihuzuko ngelite? Ngubani lonemehlo labovu?

³⁰ Ngulabo labacitsa sikhatsi lesinyenti ekunatseni liwayini lelidzakanako netjwala.

³¹ Nome liwayini libila, nome lihaza, nome limnandzi lehla ngesiphundvu, kodvwa libalekele.

³² Ekugcineni liluma njengenyoka, linhlonhlotse njengesitfozi selibululu.

³³ Emehlo akho ayawubona tintfo letingekho, emlonyeni wakho kuphume emavi langenamcondvo.

³⁴ Liyawukwenta uve shangatsi untanta emagagasini elwandle nome njengemuntfu lolele etsala letintsambo letiboshelwe ensikeni yemkhumbi.

³⁵ Utawutsi: “Bangilimatile, kodvwa angikabuva buhlungu; bangishayile, kodvwa angikhumbuli. Nginelibhabhalazi, ngifuna kuyawunatsa futsi.”