Taga 20 - Siswati 1996 Bible

¹ Liwayini lenta umuntfu abe sidvwaladvwala, abange nemsindvo. Kute umuntfu lotiphatsa kahle nasadzakiwe.

² Kutfukutsela kwenkhosi kufanana nekubhodla kwelibhubesi, lowo loyitfukutselisako ulengisela imphilo yakhe ekufeni.

³ Umuntfu longakufuni kulwa uzuza ludvumo; silima sihlala ngekususa lutfutfuva singatibambi.

⁴ Livila liyehluleka kulima ngesikhatsi lesifanele, nase kuvunwa lona alibuyi nalutfo etsafeni.

⁵ Tinjongo tenhlitiyo yemuntfu tifanana nekujula kwemanti emtfombo; kodvwa lonekuhlakanipha angatikhipha.

⁶ Banyenti bantfu labatishoko kutsi banelutsandvo sibili; kodvwa ngubani longatfola lowetsembeke ngempela?

⁷ Babusisiwe labo bantfwana labatalwa yindvodza lephila ngebucotfo nangekwetsembeka.

⁸ Inkhosi itsi ingahlala esihlalweni sayo sekwehlulela, ivele imbone zisuka nje lowo lowonile.

⁹ Ngubani longasho atsi: “Inhlitiyo yami ngiyigcine imsulwa, ngihlantiwe esonweni sami”?

¹⁰ Tisindvo tebucili netilinganiso tebucili, kokubili, Simakadze uyakwenyanya.

¹¹ Ngisho nemntfwana wembula similo sakhe ngendlela latiphetse ngayo; tento takhe tikhombisa kutsi similo sakhe sihle yini nome sibi.

¹² Simakadze usiphe emehlo ekubona netindlebe tekuva: kokubili kwentiwa nguye.

¹³ Ungalibali kulala, ngobe utawugcina umphofu. Hlala usebenta, khona utawuba nenala yekudla.

¹⁴ Umtsengi ukhala kumtsengisi atsi: “Idule kakhulu lentfo, ngephulele,” atsi esuka lapho lomtsengi abe atigabatisa ngekutsi umcindzetele waze wamephulela.

¹⁵ Igolide nematje laligugu lamanyenti ungaba nako; kodvwa umlomo lokhuluma lwati ungetulu kwentsengo yematje laligugu.

¹⁶ Nangabe sihambi seboleka bese sibambisa ngelijazi laso, litsatse. Lelijazi lisiciniseko kuwe, ngobe ungasati lesihambi.

¹⁷ Kudla lokutfolakale ngekwebiwa kucala kube njengeluju kulona lokwebile; kodvwa ekugcineni kugcwala umlomo kube shangatsi udla umhlabatsi.

¹⁸ Yenta tinhloso takho ngekutfola teluleko letilungile; ungacali uhlasele emphini ungenamasu.

¹⁹ Inhlebo ivumbulula timfihlo; ngako-ke mgweme umuntfu lokhulumela futsi.

²⁰ Umuntfu localekisa uyise nome unina siphetfo sakhe siyawufanana nekucima kwesibane ebumnyameni lobuphatsekako.

²¹ Ingcebo letfolakale ngekushesha igcina ingenasibusiso.

²² Ungasho kutsi: “Ngitatiphindziselela ngalokubi;” tsembela kuSimakadze, yena utakulungiselela.

²³ Simakadze uyabenyanya bantfu labasebentisa tikali netisindvo letinebucili.

²⁴ Tinyatselo temuntfu ticondziswa nguSimakadze. Pho, umuntfu angayati ngani indlela lahamba ngayo kutsi icondzephi?

²⁵ Ungasheshi wente tetsembiso kuNkulunkulu, bese utisola kamuva.

²⁶ Inkhosi lehlakaniphile iyaphenyisisa ize imtfole lowonile, bese imjezisa ngaphandle kwesihe.

²⁷ Umoya wemuntfu usibane saSimakadze, uphenyisisa konkhe ngisho nalokujulile kumuntfu.

²⁸ Umbuso wenkhosi utawuchubeka ume, nangabe ibusa ngekwetsembeka, nangelutsandvo, nangekungakhetsi.

²⁹ Ludvumo lwalabasha ngemandla abo; labadzala bahlonishelwa bumphunga babo.

³⁰ Kushaywa kamatima kwenta umuntfu abuyekele bubi bakhe, nekubhanjabulwa kuphilisa lingekhatsi lakhe.