Taga 18 - Siswati 1996 Bible

¹ Umuntfu longakhoni kutihlanganisa nalabanye utatisa yena; uyatfukutsela nakayalwa.

² Umuntfu losilima akanandzaba nome intfo uyayiva nome akayiva, lakufunako kutsi atibonakalise yena kutsi uhlakaniphe kanganani.

³ Sono nekwedzelela kuyahambisana; nawulahlekelwa kutihlonipha, utfola lihlazo esikhundleni sako.

⁴ Emavi lakhulunywa bantfu afanana nemtfombo wekuhlakanipha, ashona njengelwandle, ahlumelelise njengemfula logeletako.

⁵ Kubi kungamlahli ngelicala umuntfu lowonile, nekugodla emalungelo alongenacala kubi.

⁶ Emavi esilima abanga kucabana, naloko lakushoko kumbangela kutsi bantfu bamshaye.

⁷ Sicitfo sesilima ngumlomo waso; emavi emlomo waso atingibe kuso.

⁸ Emavi enhlebo afanana nemtsamo wekudla lokumnandzi; ehla kamnandzi afinyelele ngekhatsi etibilinini temuntfu.

⁹ Umuntfu lolidlabha emsebentini wakhe ufanana nemuntfu lobhubhisako.

¹⁰ Libito laSimakadze liyinqaba lecinile, lapho kungabalekela khona bantfu labalungile basindze.

¹¹ Ingcebo yemuntfu lonjingile siphephelo sakhe. Uyaye acabange kutsi nguyona nqaba yakhe lengamvikela.

¹² Umuntfu lotigcabhako uyawubhujiswa, umuntfu lotitfobako uyadvunyiswa.

¹³ Kubulima nelihlazo kuphendvula umbuzo ungakeva kutsi utsini.

¹⁴ Umoya wemuntfu umenta akubeketelele kugula; kodvwa umoya lodzabukile ngubani longawubeketelela?

¹⁵ Umuntfu lonengcondvo leyehlukanisako uyaluzuza lwati, nendlebe yalohlakaniphile ifunana nelwati.

¹⁶ Sipho sakhe umuntfu simphendlela indlela, simholele kulabakhulu.

¹⁷ Sikhulumi sekucala ecaleni sibonakala shangatsi sicinisile, kuze kufike lomunye asibute.

¹⁸ Inkatho icedza umbango, ilamule tichwaga letilwako.

¹⁹ Sita umnakenu, uyawukusita akuvikele abe njengelubondza lwelidolobha; kodvwa nawucabana naye, uyawukuvalela umnyango.

²⁰ Umuntfu weneliswa nguloko lakukhulumako; angeneliswa tento temlomo wakhe.

²¹ Lulwimi lunemandla ekuphila newekufa; labo labatsandza kulusebentisa bayakudla titselo talo.

²² Lowo lotfola umfati utfole intfo lenhle, uzuze umusa kuSimakadze.

²³ Umuntfu lomphofu ukhuluma ngekutincengela acela umusa; kodvwa injinga ikhuluma ngebudlabha.

²⁴ Labanye bangani bayakuhlamuka; kodvwa labanye bangani basondzela kakhulu kwengca banakenu bengati.