Taga 12 - Siswati 1996 Bible

¹ Umuntfu lotsandza kuyalwa utsandza lwati; kodvwa lotondza kucondziswa usilima.

² Umuntfu lolungile uyemukeleka kuSimakadze; kodvwa lohlosa lokubi uyamlahla.

³ Umuntfu akasimamiswa kwenta bubi; kodvwa lolungile angeke ashukunyiswe.

⁴ Umfati lolungile ungumchele wendvodza yakhe; kodvwa loyihlazisako ufanana nekubola ematsanjeni ayo.

⁵ Emasu alabalungile mahle; kodvwa teluleko talababi tiyedukisana.

⁶ Emavi ebantfu lababi acotsele kucitsa ingati; kodvwa emavi alabalungile ayabakhulula bantfu.

⁷ Bantfu lababi bayaketulwa banyamalale; kodvwa imindeni yalabalungile iyawuhlala imile.

⁸ Umuntfu udvunyiswa ngekunakekela kwakhe; kodvwa lonenhlitiyo lembi ubukeleka phansi.

⁹ Uncono umuntfu lotitfobako atisebentele kunemuntfu lotsi ucebile kantsi uyalamba.

¹⁰ Umuntfu lolungile uyatinakekela tifuyo takhe; kodvwa lomubi utiphatsa dlephu.

¹¹ Lolima umhlaba wakhe uyawuba nenala yekudla; kodvwa lolibala kulandzelana netintfo letingenamsebenti akanangcondvo.

¹² Bantfu lababi betama kutiphephisa ngebubi; kodvwa labalungile bayakuma banganyakatiswa.

¹³ Umuntfu ubanjwa tinkhulumo takhe letimbi; kodvwa lolungile uyasindza enhluphekweni.

¹⁴ Lomunye utfola inzuzo ngekukhuluma kwakhe; kantsi lomunye uyitfola ngekusebentisa tandla takhe.

¹⁵ Silima sicabanga kutsi konkhe lokwentiwa ngiso kulungile; kodvwa umuntfu lotsatsa teluleko uhlakaniphile.

¹⁶ Kutfukutsela kwesilima kusheshe kubonakale; kodvwa umuntfu lohlakaniphile uyayitsalalisela inhlamba.

¹⁷ Fakazi lowetsembekile ukhuluma bufakazi lobuliciniso; kodvwa fakazi lonemanga wandzisa emanga.

¹⁸ Emavi lakhulumeke ngebudlabha ahlaba njengesikhali; kodvwa emavi lakhulumeke ngekuhlakanipha ayaphilisa.

¹⁹ Umuntfu lokhuluma liciniso uyakhonsa; kodvwa lokhuluma emanga akakhonsi.

²⁰ Inkhohliso isetinhlitiyweni talabo labahlose lokubi; kodvwa labo labasebentela kutsi kube nekuthula bayawujabula.

²¹ Labalungile bayawuhlala baphephile etingotini; kodvwa lababi bayawuhlala basetinhluphekweni.

²² Imilomo lecala emanga isinengiso kuSimakadze; kodvwa laba labetsembekile bayinjabulo kuye.

²³ Umuntfu lohlakaniphile uyalufihla lwati lwakhe; kodvwa tilima tikubeka ebaleni kungati kwato.

²⁴ Sandla lesikhutsele emsebentini sigcina siphetse; kodvwa livila ligcina lisigcili.

²⁵ Kukhatsateka kuyamondzisa umuntfu; kodvwa livi lemusa limenta ajabule.

²⁶ Umuntfu lolungile ungumholi kumakhelwane wakhe; kodvwa lababi bayedukisana.

²⁷ Umuntfu lolivila uyalamba; kodvwa lokhutsele ugcina aphumelele.

²⁸ Kutiphatsa kahle kwalolungile kuyindlela leya ekuphileni; kodvwa kutiphatsa kabi kuyindlela leya ekufeni.