Taga 11 - Siswati 1996 Bible

¹ Simakadze uyasenyanya sikali lesonakele; kodvwa ujabula ngalabo labasebentisa tikali letisemtsetfweni.

² Kutiphakamisa kulandzelwa lihlazo; kodvwa kuhlakanipha kuhambisana nekutitfoba.

³ Kwetsembeka kungumcondzisi walabacotfo; kodvwa bucili buyabacitsa labangaketsembeki.

⁴ Ingcebo ingeke isite lutfo ngelilanga lentfukutselo; kodvwa kutiphatsa kahle kusindzisa umuntfu ekufeni.

⁵ Indlela yebantfu labate kusoleka yentiwa ibe ngulebekile ngekutiphatsa kahle kwabo; kodvwa kuwa kwemuntfu lokhohlakele kusungulwa nguye matfupha.

⁶ Bantfu labacotfo bakhululwa kutiphatsa kahle kwabo; kodvwa labo labangaketsembeki babanjwa lugibe lolubukhali babo.

⁷ Nakufa lokhohlakele, ufa kanye nematsemba akhe, nekwetsembela kwakhe ebunjingeni kuyashabalala.

⁸ Umuntfu lolungile uvikelekile etinhluphekweni; kodvwa umuntfu lomubi tiyamehlela.

⁹ Umuntfu longesabi Nkulunkulu ubulala makhelwane wakhe ngekukhuluma kwakhe; kodvwa bantfu labalungile bavikelwa lwati lwabo.

¹⁰ Nakuchuma bantfu labalungile, takhamiti telidolobha labo tiyatsakasa; kantsi nakufa lomubi, wonkhe umuntfu uyajabula.

¹¹ Nangabe bantfu labacotfo babusisa lidolobha, liba neludvumo; kodvwa nakukhuluma lomubi, liyafa.

¹² Umuntfu longenangcondvo umbukela phansi makhelwane wakhe; kodvwa umuntfu lohlakaniphile uyalubamba lulwimi lwakhe.

¹³ Ndzabakatibutwa wembula timfihlo; kodvwa umuntfu lowetsembekile uyatilondvolota.

¹⁴ Sive siyawa ngenca yekweswela kucondziswa; siyawuphepha nangabe sinebeluleki labanyenti.

¹⁵ Umuntfu angahle angene ekuhluphekeni lokukhulu, nangabe sihambi asentele sibambiso; kodvwa nangabe uyala, kute langakwesaba.

¹⁶ Umuntfu lomsikati lonemusa utfola ludvumo ngako, kantsi bantfu labanelutfutfuva batfola ludvumo ngemcebo wabo.

¹⁷ Umuntfu lonemusa kulabanye utisita yena; kodvwa umuntfu lote sihe utilimata yena.

¹⁸ Umuntfu lomubi utfola inzuzo ngendlela lembi; kodvwa lohlanyela ngebucotfo utfola sivuno lesikhonsako.

¹⁹ Lotimisele kwenta lokulungile uyawuphila; kodvwa loneluphike lwekwenta lokubi uyakufa.

²⁰ Simakadze uyabenyanya bantfu labanenhlitiyo lembi; kodvwa ujatjuliswa ngulabo labangasoleki.

²¹ Kuliciniso kutsi bantfu lababi bayawujeziswa; kodvwa bantfu labalungile bayawusindza.

²² Buhle balomsikati lote similo bufanana nendandatho yegolide lesekhaleni lehhontji.

²³ Tifiso talabalungile tigcina ebuhleni; kodvwa ematsemba alababi agcina ebubini.

²⁴ Umuntfu lowephana ngemali yakhe wandzisa umcebo wakhe; lomunye uyemana, asuke agcine asaluphuya.

²⁵ Umuntfu lowephanako, lanako kuyandza; lona lonatsisa lowomile naye uyawunatsiswa.

²⁶ Bantfu bayamcalekisa umuntfu logodla kudla; kodvwa bamfisele lokuhle lowo lotsengisa ngako.

²⁷ Umuntfu lofunana nalokuhle ufunana nemvuzo; kodvwa lofunana nebubi uhlangabetana nabo.

²⁸ Umuntfu loncike ebunjingeni bakhe utakuwa; kodvwa lolungile uyawuhluma njengemacembe laluhlata.

²⁹ Umuntfu loletsa kuhlupheka ekhaya lakhe ulahlekelwa lifa lakhe. Silima siyakuhlala sisisebenti sesihlakaniphi.

³⁰ Sitselo salolungile sisihlahla sekuphila; kodvwa lohlakaniphile uzuza imiphefumulo.

³¹ Umuntfu lolungile utfola loko lokumfanele asesemhlabeni; kakhulu kangakanani-ke umuntfu lomubi nalosoni!