Taga 10 - Siswati 1996 Bible

Taga taSolomoni

¹ Leti-ke taga taSolomoni: Indvodzana lehlakaniphile ijabulisa uyise, kodvwa indvodzana lelibele ikhuba unina.

² Ingcebo letfolakale ngebubi ayikusiti ngalutfo, kodvwa kutiphatsa kahle kukusindzisisa ekufeni.

³ Simakadze akavumi kutsi lolungile alambe; kodvwa lababi uyabavimba kutsi bakutfole loko labakufunako.

⁴ Buvila benta umuntfu abe luphuya; kodvwa kukhutsala kwenta umuntfu abe yinjinga.

⁵ Indvodzana lehlakaniphile ngulebutsa kudla emasimini nase kulungile; kodvwa lelalako nakuvunwako iyahlazisana.

⁶ Umuntfu lolungile uphiwa tibusiso letinyenti; kodvwa lomubi ufihla budlova bakhe ngekukhuluma kwakhe lokunyenti.

⁷ Kukhunjulwa kwemuntfu lolungile kuyawuba sibusiso; kodvwa libito lalomubi liyawubhubha.

⁸ Umuntfu lohlakaniphile uyakwemukela kuyalwa; kodvwa lowo lokhulumela futsi uyawukhubeka, awe.

⁹ Umuntfu lowetsembekile uhamba aphephile; kodvwa lokhetsa tindlela letimagiligombo uyawugcina atfolakele.

¹⁰ Umuntfu loficelana liso lebucili uvisana buhlungu; kodvwa losheshe ekhute lokubi usebentela kuthula.

¹¹ Emavi ebantfu labalungile angumtfombo wekuphila; kodvwa lababi bafihla budlova babo ngekukhuluma kwabo lokunyenti.

¹² Inzondo ibanga kucabana; kodvwa lutsandvo lusibekela tonkhe tono.

¹³ Umuntfu lonengcondvo ukhuluma ngekuhlakanipha; kodvwa longenangcondvo udzinga kushaywa.

¹⁴ Bantfu labahlakaniphile babutsa lwati, kodvwa silima nasikhuluma njalo nje, sibanga ingoti.

¹⁵ Umcebo wesicebi uyinqaba yaso; buphuya buletsa ingoti eluphuyeni.

¹⁶ Umvuzo wekulunga kuphila lokuphuphumako; kodvwa kujeziswa kungumholo walabonako.

¹⁷ Umuntfu lowemukela kuyalwa uyawuphila; kodvwa lona longakufuni kucondziswa uyakweduka.

¹⁸ Umuntfu lofihla inzondo yakhe unemanga, nalowo lowandzisa emanga usilima.

¹⁹ Kukhuluma lokunyenti kubanga kona, ngako umuntfu lohlakaniphile uyawabamba emavi akhe.

²⁰ Emavi emuntfu lolungile afanana nesiliva lecengiwe, umcondvo webantfu lababi awunamsebenti.

²¹ Emavi emuntfu lolungile ondla bantfu labanyenti; kodvwa tilima tifa ngenca yekweswela lwati.

²² Sibusiso saSimakadze lesenta umuntfu acebe, akengeti kuhlupheka kuso.

²³ Injabulo yesilima isekwenteni lokubi; kodvwa injabulo yemuntfu lonekucondza isekutfoleni kuhlakanipha.

²⁴ Lokwesatjwa ngumuntfu lomubi kuyamehlela; kodvwa lolungile uphiwa loko lakufunako.

²⁵ Nase kwendlule sihhushuhhushu, kubate losindzako kulababi; kodvwa lolungile uyawusima phakadze naphakadze.

²⁶ Njengeliwayini lelimunyu nalingena ematinyweni, nanjengentfutfu emehlweni, linjalo livila kulabalitfumako.

²⁷ Kwesaba Simakadze kwandzisa kuphila kwemuntfu; kodvwa iminyaka yalomubi iyancishiswa.

²⁸ Lokujabulisa bantfu labalungile nguloko labakwetsembako; kodvwa litsemba lalababi liyanyamalala.

²⁹ Indlela yaSimakadze iyinqaba yalabalungile; kodvwa ikubhubha kulababi.

³⁰ Umuntfu lolungile angeke asishulwe; kodvwa lomubi angeke asale eveni.

³¹ Umuntfu lolungile ukhuluma kuhlakanipha; kodvwa lulwimi lwenkhohliso luyawujutjwa.

³² Umlomo wemuntfu lolungile ukhuluma lokufanele; kodvwa emavi esikhohlakali ayakhubana.