Numeri 35 - Siswati 1996 Bible

Emadolobha labelwa sive semaLevi

¹ Ematsafeni akaMowabi ngaseJordane macondzana neJerikho, Simakadze wakhuluma kuMosi, watsi:

² “Yala ema-Israyeli kutsi abele emaLevi lawo madolobha latawuhlala kuwo kuleso sabelo lesitawuba ngesawo ema-Israyeli. Wabeleni nalawo madlelo latungelete lawo madolobha.

³ Ngako atawuba nemadolobha latawuhlala kuwo abe nemadlelo, lapho atawukhotsisa khona tifuyo tawo.

⁴ “Bubanti balawo madlelo latungelete lawo madolobha lenitakuwanika emaLevi butawuba ngemamitha langaba ngema-450 kusuka elubondzeni lwelidolobha.

⁵ Ngephandle kwelidolobha niyawulinganisa indzawo lelibanga lelingemamitha langaba ngema-900 ngasemphumalanga, nalengemamitha langaba ngema-900 ngaseningizimu, nalengemamitha langaba ngema-900 ngasenshonalanga, nalengemamitha langaba ngema-900 ngasenyakatfo, lidolobha libesemkhatsini. Lendzawo iyawuba ngemadlelo alawo madolobha awo.

⁶ “Kulamadolobha, leniwabela emaLevi, lasitfupha atawuba ngewekukhoselisa umuntfu lobulele lomunye umuntfu. Ngetulu kwawo nibowabela lamanye langema-42,

⁷ lokusho kutsi asawonkhe emadolobha lekufanele niwabele wona atawuba ngema-48 kanye nemadlelo awo.

⁸ Lamadolobha lenitawanika emaLevi kulelive lelabelwe ema-Israyeli kufanele alingane nalelo live laleso naleso sive ngebukhulu nangebuncane baso: Tsatsani emadolobha lamanyenti kuleso sive lesikhulu, kodvwa nitsatse emadolobha lambalwa kuleso sive lesincane.”

Emadolobha ekukhosela

⁹ Simakadze wakhuluma kuMosi, watsi:

¹⁰ “Khuluma kuma-Israyeli utsi: ‘Naniwela iJordane, ningena eKhenani,

¹¹ khetsani lamanye emadolobha kutsi atewuba ngemadolobha enu ekukhosela, lapho kungabalakela khona umuntfu, nangabe abulele lomunye umuntfu angakacondzi.

¹² Ayawuba tindzawo tekukhosela ekubalekeleni umphindziseli, khona kutewutsi lona lobulele angetikufa asengakalitfoli litfuba lekutsi licala lakhe litekwe ebandla.

¹³ Lamadolobha lasitfupha nitawakhetsela kutsi abe ngewekukhosela.

¹⁴ Lamatsatfu atawuba ngala kweJordane, lamatsatfu abe ngale ngesheya kweJordane eKhenani.

¹⁵ Lamadolobha lasitfupha atawuba yindzawo yekukhoselisa ema-Israyeli, nebetive, nome ngubani umuntfu lohlala emkhatsini wabo, khona kutewutsi lowo lobulele umuntfu ngesiphosiso atewubalekela khona ayewukhosela.

¹⁶ “ ‘Nangabe umuntfu ashaye lomunye umuntfu ngensimbi, wafa, lowo lomshayile ungumbulali; lombulali uyawubulawa.

¹⁷ Nome-ke nangabe umuntfu anelitje esandleni sakhe lelingabulala umuntfu, bese kuyenteka ushaya umuntfu ambulale ngalo, lowo lomshayile ungumbulali; lombulali uyawubulawa.

¹⁸ Nome-ke nangabe umuntfu aphetse intfo leyentiwe ngelukhuni lengambulala umuntfu, bese kuyenteka ushaya umuntfu ambulale ngayo, lowo lomshayile ungumbulali; lombulali uyawubulawa naye.

¹⁹ Umphindziseli losihlobo sengati semufi nasihlangana nalombulali, siyawumbulala.

²⁰ “ ‘Nangabe umuntfu atondza lomunye, adzimate ambulale ngekumchilitela phansi nome ambulale ngekumjikijela ngentfo acondze kumbulala, nembala afe,

²¹ nome atfukutsele wamshaya wambulala ngesibhakela, lowo muntfu uyawubulawa; ungumbulali. Umphindziseli losihlobo semufi utawutsi angahlangana nalombulali ambulale.

²² “ ‘Kodvwa nakwenteka ngaphandle kwekutfukutsela umuntfu wachilita lomunye nome wamjikijela ngentfo angakacondzi,

²³ nome wamshaya angaboni, ngelitje lelingambulala, nembala afe, kantsi abengesiso sitsa sakhe futsi abengakacondzi kumlimata,

²⁴ libandla kufanele lehlulele emkhatsini wakhe nalomphindziseli losihlobo semufi, lilandzele lemitsetfo.

²⁵ Libandla kufanele livikele lona lonelicala lekubulala kulomphindziseli losihlobo semufi ngekutsi lincandzekise lombulali, abuyele edolobheni lekukhosela, lapho abebalekele khona. Kufanele ahlale lapho, kuze kufe umphristi lomkhulu, labegcotjwe ngemafutsa langcwele.

²⁶ “ ‘Kodvwa nangabe lombekwacala kwenteka aphumela ngephandle kwalelidolobha lekukhosela labalekele kulo,

²⁷ bese lomphindziseli losihlobo semufi ukhandza lombulali ngephandle kwalelidolobha, lomphindziseli angambulala futsi angabi nacala ngaloko kumbulala kwakhe.

²⁸ Umbulali kufanele ahlale kulelo dolobha lekukhosela, kuze kufe umPhristi Lomkhulu; emvakwekufa kwemPhristi Lomkhulu sangancandzeka abuyele endzaweni lesabelo sakhe.

²⁹ Lena-ke nguyona mitsetfo yenu lenitawuhamba ngayo titukulwane ngetitukulwane.

³⁰ “ ‘Umuntfu lobulala lomunye umuntfu naye uyawubulawa njengembulali ngebufakazi babofakazi. Kodvwa kute umuntfu loyawubulawa ngebufakazi bemuntfu munye.

³¹ Ningayemukeli inhlawulo yekuhlenga kuphila kwembulali, lofanele kufa. Lowo kufanele afe.

³² Ningayemukeli inhlawulo yemuntfu lobalekele edolobheni lekukhosela ngekutsi nimvumele kutsi abuyele ayewuhlala eveni lakhe, umPhristi Lomkhulu asengakafi.

³³ Ningalingcolisi lelive lenikulo. Kucitsa ingati kuyalingcolisa live, nenhlawulo yekubuyisana naSimakadze ingeke yentelwe live, lapho kucitselwe khona ingati, ngaphandle kwengati yalowo lobulele.

³⁴ Ningalingcolisi lelive, lapho nine nami sihlala khona, ngobe mine, Simakadze, ngihlala emkhatsini wema-Israyeli.’ ”