Numeri 32 - Siswati 1996 Bible

Tive ngasemphumalanga kweJordane

¹ EmaRubeni nemaGadi labenemihlambi lemikhulu yetinkhomo, netimvu, netimbuti abona ematsafa aseJazeri naseGileyadi kutsi abelungele kuba ngemadlelo.

² Ngako baya kuboMosi na-Eleyazare, umphristi, kanye nebaholi besive, bafike batsi:

³ “I-Atharothe, neDiboni, neJazeri, neNimra, neHeshboni, ne-Eleyale, neSebamu, neNebo, kanye neBheyoni,

⁴ live Simakadze lalincoba walinika sive sema-Israyeli, lilungele kuba ngemadlelo, kantsi tinceku takho tinemihlambi yetifuyo.”

⁵ Bachubeka batsi: “Nangabe sizuze umusa emehlweni enu, lelive alabelwe tinceku tenu kube sabelo sato. Ningaseweti umfula iJordane.”

⁶ Mosi waphendvula lamaGadi nemaRubeni, watsi: “Nisho kutsi nine ningasala lapha, abe emabutfo akini lenishuca nawo ayekulwa imphi?

⁷ Niwacedzelani emandla ema-Israyeli kutsi angeweleli ngesheya eveni Simakadze lawaphe lona?

⁸ Naboyihlo benta njalo, nangibatfuma eKhadeshi Bhaneya kutsi bayewuhlola live.

⁹ Ngemva kwekwewelela eSihosheni sase-Eshikholi kuyewubuka live, bawacedza emandla ema-Israyeli kutsi angangeni eveni Simakadze lawaphe lona.

¹⁰ Ngalelo langa intfukutselo yaSimakadze yavutsa, waze wafunga watsi:

¹¹ ‘Njengobe bangazange bangilandzele ngenhlitiyo yonkhe, kute namunye wemadvodza, kusukela kulaneminyaka lengema-20 kuya etulu, laphuma eGibhithe layawulibona lelive lengaletsembisa ngekufunga ku-Abrahama, na-Isaka, naJakobe;

¹² kute namunye ngaphandle kwaKhalebi, umsa waJefune, umKhenizi, naJoshuwa, umsa waNuni, ngobe bona baphikelela balandzela Simakadze ngayo yonkhe inhlitiyo yabo.’

¹³ Intfukutselo yaSimakadze yavutsela sive sema-Israyeli, wasenta sazulazula ehlane iminyaka lengema-40, saze safa saphela sonkhe leso situkulwane lesasente lokubi embikwaSimakadze.

¹⁴ “Nani-ke, ntalelwane yetoni, nime kuleyo ndzawo yaboyihlo, nentela kutsi Simakadze asitfukutselele kakhulu kunakucala sive sema-Israyeli.

¹⁵ Nanijika ningamlandzeli, utawuphindze asishiye sonkhe futsi lesive ehlane, nine-ke nitawuba sisusa sekubhujiswa kwaso.”

¹⁶ Beta kuye, bafike batsi: “Sifuna kwakhela tifuyo tetfu tibaya, sakhe nemadolobha lapha, kuze kutewuhlala khona bafati betfu nebantfwabetfu.

¹⁷ Kodvwa tsine silungele kutsi sihlome sihambe embili kwema-Israyeli, size siwafikise eveni lawo. Ngaleso sikhatsi bafati betfu nebantfwabetfu batawube bahleti emadolobheni lavikelekile, kuze bavikeleke baphephe kulabantfu balelive.

¹⁸ Singeke sibuyele emakhaya etfu, sive sema-Israyeli singakatfoli sabelo saso.

¹⁹ Singeke semukele lifa kanye naso ngesheya kweJordane, ngobe phela tsine lifa letfu sesilemukele ngalapha ngasemphumalanga kweJordane.”

²⁰ Mosi wakhuluma kubo, watsi: “Nangabe nitawukwenta loko, nihlomele imphi embikwaSimakadze,

²¹ nangabe nonkhe nitawuhloma newelele ngesheya kweJordane embikwaSimakadze, aze aticoshe tonkhe titsa takhe embikwakhe,

²² litawutsi lelive lingatfunjwa embikwaSimakadze, bese niyancandzeka nikhululeke kulesibopho senu naSimakadze nasesiveni sonkhe sema-Israyeli. Lelive-ke seliyawuba sabelo senu embikwaSimakadze.

²³ Kodvwa naningakwenti loko, niyona kuSimakadze, futsi-ke nibociniseka-ke kutsi salakutjelwa sibona ngemopho.

²⁴ Bafati benu nebantfwabenu bakheleni emadolobha, netifuyo tenu nitakhele tibaya; kodvwa nibokwenta loko lenikwetsembisile.”

²⁵ EmaGadi nemaRubeni akhuluma kuMosi, atsi: “Tsine, tinceku takho, sitakwenta njengekusho kwenkhosi yetfu.

²⁶ Bantfwabetfu, nebafati betfu, nemihlambi yetifuyo tetfu kutawusala kulamadolobha aleli lakaGileyadi.

²⁷ Kodvwa tinceku takho, onkhe emadvodza lahlomele kuyakulwa emphini, atakwewela ayekulwa embikwaSimakadze, njengobe inkhosi yetfu isho.”

²⁸ Ngako-ke Mosi wanika imiyalo ngabo ku-Eleyazare, umphristi, nakuJoshuwa, umsa waNuni, nakubaholi betive tema-Israyeli.

²⁹ Wakhuluma watsi kubo: “Nangabe emaGadi nemaRubeni, onkhe emadvodza lahlomele imphi, ewelela nani ngesheya kweJordane embikwaSimakadze, nitawutsi lelive nase nilitfumbile, bese nibanika live lakaGileyadi kutsi libe labo.

³⁰ Kodvwa nabangaweli kanye nani bahlomile, kufanele bemukele sabelo sabo kanye nani eKhenani.”

³¹ EmaGadi nemaRubeni aphendvula atsi: “Tinceku takho titakwenta njengobe Simakadze ashito.

³² Sitakwewela sihlomile embikwaSimakadze siye eKhenani, kodvwa live lelilifa letfu lesilidlile litawuba mshiya ngalo kweJordane.”

³³ Ngako-ke Mosi emaGadi nemaRubeni nencenye yesive sakaManase, umsa waJosefa, wawabela live lembuso wakaSihoni, inkhosi yema-Amori, nelaka-Ogi, inkhosi yaseBhashani, lonkhe lelo live nemadolobha alo nemave lakhelene nalo.

³⁴ EmaGadi akha emadolobha iDiboni ne-Atharothe, ne-Aroyeri,

³⁵ ne-Atrothe Shofani, neJazeri, neJogbeha,

³⁶ neBhethi Nimra, neBhethi Haramu, aba ngemadolobha lavikelekile, akha netibaya temihlambi yawo.

³⁷ EmaRubeni akha emadolobha iHeshboni, ne-Eleyale, neKhiriyathayimu,

³⁸ kanye neNebo, neBhali Meyoni, lawo magama aguculwa, neSibima. Bawetsa emabito lamasha lamadolobha labawakha kabusha.

³⁹ Titukulwane takaMakhire, umsa waManase, tahamba taya kaGileyadi, talihlasela, talidla, tawacosha onkhe ema-Amori labekalapho.

⁴⁰ Ngako-ke live lakaGileyadi Mosi waliniketa emaMakhire, titukulwane takaManase, akha khona lapho.

⁴¹ Jayire, umtukulu waManase, watfumba takhiwo tabo, watetsa libito watsi ngemaHavothi Jayire.

⁴² Kwatsi Noba yena watfumba iKhenathi kanye netabelo letatitungelete lelo dolobha, watetsa ngelibito lakhe watsi yiNoba.