Numeri 31 - Siswati 1996 Bible

Ema-Israyeli alwa nemaMidiyani

¹ Simakadze wakhuluma kuMosi, watsi:

² “Khiphela sive saka-Israyeli sibhongo esiveni sakaMidiyani, bese-ke uyafa.”

³ Ngako Mosi wakhuluma esiveni saka-Israyeli, watsi: “Hlomisani lamanye emadvodza emkhatsini wenu atilungiselele kulwa nemaMidiyani, alungele kuchuba imphindziselo yaSimakadze kubo.

⁴ Tfumelani libutfo leliyinkhulungwane yemadvodza kuleso nakuleso sive saka-Israyeli.”

⁵ Ngako kwaphuma emadvodza labeti-12 000, labehlomele kulwa imphi, kuleso nakuleso sive ka-Israyeli kwaphuma inkhulungwane yinye.

⁶ Mosi wabatfumela emphini. Kwaphuma inkhulungwane esiveni sisinye, wabakhipha naFinehasi, umsa wa-Eleyazare, umphristi. Yena-ke watsatsa tintfo endzaweni lengcwele, watsatsa nemacilongo lababetawukhombisa ngawo indlela.

⁷ EmaMidiyani bawahlasela bawashaya bawacotfula onkhe emadvodza, njengekusho kwaSimakadze kuMosi.

⁸ Babulala ngisho nemakhosi lasihlanu akaMidiyani, bo-Evi, naRekhemu, naSuri, naHure, naReba. Babulala ngisho naBhalamu, umsa waBheyori, ngelusiko lwenkemba.

⁹ Ema-Israyeli ahlasela emaMidiyani atfumba bafati bawo kanye nebantfwana, nemfuyo yawo yonkhe, nekudla kwawo, nato tonkhe timphahla.

¹⁰ Bashisa onkhe emadolobha, lapho bekuhlala khona emaMidiyani, bashisa netinkambu tawo.

¹¹ Batfumba tonkhe timphahla tekwembatsa, nekudla, nebantfu, netifuyo.

¹² Baletsa imphango nebatfunjwa kuMosi na-Eleyazare, umphristi, nakulo lonkhe libandla lema-Israyeli enkambu yabo ematsafeni akaMowabi, edvute nemfula iJordane macondzana neJerikho.

Kuncandzeka kwemphi

¹³ BoMosi na-Eleyazare, umphristi, nebaholi besive bahamba bayawubahlangabeta ngephandle kwenkambu.

¹⁴ Mosi wabatfukutselela labaholi bemphi, baholi betinkhulungwane nebemakhulu labancandzeka emphini.

¹⁵ Wababuta watsi: “Nibayekele bonkhe yini labasikati nangete nababulala?

¹⁶ Ngibo laba labalandzela teluleko taBhalamu, bekungubona bashushisi labebacondze kwedukisa ema-Israyeli kutsi ahlubuke kuSimakadze kulentfo leyenteka ePheyori, kuze lulaka lwehlele sive saSimakadze.

¹⁷ Bulalani bonkhe bafana, nibulale bonkhe labasikati labake balala nemuntfu lomdvuna,

¹⁸ kodvwa nitishiyele tonkhe tintfombi letingazange setilale nemuntfu lomdvuna.

¹⁹ “Nonkhe nine lenibulele umuntfu nome lenitsintse sidvumbu nifanele nihlale ngephandle kwenkambu, kuze kuphele emalanga lasikhombisa. Ngelilanga lesitsatfu nelesikhombisa kufanele nitihlambulule kanye nalabo lenibatfumbile.

²⁰ Niyawuhlanta tonkhe timphahla tekwembatsa nako konkhe lokwentiwe ngesikhumba, nome ngeboya betimbuti nome yini lokubatiwe.”

²¹ Eleyazare, umphristi, wakhuluma kulamabutfo labebuya emphini, watsi: “Loko ngulokufunwa ngumtsetfo Simakadze lawunika Mosi:

²² Igolide, nesiliva, nelitfusi, nensimbi, nemfimfi, nemtfofu,

²³ nako konkhe lokungamelana nemlilo kufanele kufakwe emlilweni, khona kutewuhlanteka. Kodvwa nako kuyadzinga kutsi kuhlanjululwe ngemanti enhlambuluko. Konkhe lokungasha emlilweni kufanele kufakwe kulawo manti ekuhlambulula.

²⁴ Ngelilanga lesikhombisa niyawugeza timphahla tenu, bese niba ngulabahlambululekile. Emvakwaloko-ke seningangena enkambu.”

Kwabiwa kwemphango

²⁵ Simakadze wakhuluma kuMosi, watsi:

²⁶ “Wena na-Eleyazare, umphristi, nebaholi bemindeni yesive kufanele nibale bonkhe labantfu nalemfuyo letfunjiwe.

²⁷ Lemphango niyawuyehlukanisa nabele onkhe emabutfo labehlanganyele emphini naso sonkhe-ke sive.

²⁸ Kulamabutfo labekayile emphini niyakwehlukanisela Simakadze kube kunye lokusibongo senu emakhulwini lasihlanu: ebantfu, newetinkhomo, newetimbongolo, newetimvu, kanye newetimbuti.

²⁹ Niyawutsatsa lesibongo encenyeni yabo nisinike Eleyazare, umphristi, sibe sabelo saSimakadze.

³⁰ Encenyeni yema-Israyeli niyakwehlukanisa kunye emashumini lasihlanu: ebantfu, newetinkhomo, newetimbongolo, newetimvu, newetimbuti, nome-ke aletinye nje tilwane. Niyakukunika emaLevi lekunguwona anakekela tintfo tasendzaweni lengcwelengcwele.”

³¹ Ngako boMosi na-Eleyazare, umphristi, benta njengobe Simakadze abeyale Mosi.

³² Imphango leyasala kuloko lokwakutfunjiwe leyatsatfwa ngemabutfo kwaba timvu letiti-675 000,

³³ netinkhomo letiti-72 000,

³⁴ netimbongolo letiti-61 000,

³⁵ netintfombi letiti-32 000 letatingazange setilale nemuntfu lomdvuna.

³⁶ Incenye yeliphakelo lalamabutfo labekaye emphini kwaba timvu letiti-337 500,

³⁷ sabelo saSimakadze saba timvu letingema-675;

³⁸ tinkhomo taba ti-36 000, sabelo saSimakadze saba tinkhomo letatingema-72;

³⁹ timbongolo taba ti-30 500, sabelo saSimakadze saba timbongolo letatingema-61;

⁴⁰ bantfu baba ti-16 000, sabelo saSimakadze saba ngema-32 ebantfu.

⁴¹ Mosi waniketa Eleyazare lesibongo lebesisabelo saSimakadze, njengobe Mosi abeyalwe nguSimakadze.

⁴² Lencenye leyayingeyema-Israyeli Mosi labeyehlukanise kulena yemabutfo,

⁴³ lena yesive yaba timvu letiti-337 500;

⁴⁴ netinkhomo letiti-36 000,

⁴⁵ netimbongolo letiti-30 500;

⁴⁶ nebantfu labati-16 000.

⁴⁷ Kulencenye yesive Mosi wehlukanisa kunye kuwo onkhe ema-50 ebantfu newetilwane, njengobe Simakadze abemyalile; wakuniketa emaLevi labenguwona anakekela indzawo lengcwelengcwele yaSimakadze.

⁴⁸ Baholi lababehola emabutfo emphi, labo labebahola tinkhulungwane nemakhulu, baya kuMosi,

⁴⁹ bafike batsi: “Tinceku takho setiwabalile emabutfo letiwaholako, kute nalinye lelilahlekile.

⁵⁰ Ngako sesiletse umnikelo kuSimakadze, tintfo tegolide lesititfumbile: emabhengela, nemigaco, netindandatho letitimphawu, nemacici, netingcibe. Sitetentela inhlawulo yetfu yekubuyisana kuSimakadze.”

⁵¹ BoMosi na-Eleyazare, umphristi, batemukela letintfo tegolide nato tonkhe tintfo tebuchwephesha.

⁵² Yonkhe igolide leyaletfwa baholi betinkhulungwane nebemakhulu, leyemukelwa boMosi na-Eleyazare bayetfula kuSimakadze yayinesisindvo lesasingemakhilogremu labengaba li-190.

⁵³ Ngulelo nalelo butfo latitsatsela sabelo salo emphangweni.

⁵⁴ BoMosi na-Eleyazare, umphristi, bayemukela legolide kulabaholi betinkhulungwane nebemakhulu, bayimikisa ethendeni lekuhlangana, kwaba sikhumbuto sema-Israyeli embikwaSimakadze.