Numeri 27 - Siswati 1996 Bible

Emadvodzakati aSelofehadi

¹ Emadvodzakati aSelofehadi, umsa waHeferi, umsa waGileyadi, umsa waMakhire, umsa waManase, abewelusendvo lwakaManase, umsa waJosefa. Emabito alamadvodzakati bekuboMahala, naNowa, naHogila, naMilkha, naThisa. Asondzela

² ekungeneni kwelithende lekuhlangana ema embikwaMosi, na-Eleyazare, umphristi, nebaholi besive sonkhe, atsi:

³ “Babe wetfu wafela ehlane. Abengesiye lomunye webalandzeli baKhora, labadudana ngekuhlubuka Simakadze; wafela sono sakhe, washiya kute emadvodzana.

⁴ Pho, kwentiwa yini libito lababe lingaveli elusendvweni ngobe abete indvodzana? Sinikeni sabelo emkhatsini wetihlobo tababe.”

⁵ Ngako Mosi wayitsatsa lendzaba yawo wayimikisa kuSimakadze.

⁶ Simakadze watsi kuye:

⁷ “Kuliciniso loku lokushiwo ngemadvodzakati aSelofehadi. Kufanele uwanike sabelo sawo etihlotjeni teyise, aniketwe lifa leyise.

⁸ Tjela ema-Israyeli utsi: ‘Nangabe indvodza ifa, ishiye kute indvodzana, imphahla nelifa layo alendluliselwe endvodzakatini yayo.

⁹ Nangabe ite ngisho nendvodzakati, lifa layo linikeni banakabo.

¹⁰ Nangabe ite banakabo, lifa layo linikeni bomnakaboyise.

¹¹ Nangabe uyise abete banakabo, lifa linikeni sihlobo lesisedvutane elusendvweni lwayo kutsi litewuba laso. Loku kufanele kube ngumtsetfo wema-Israyeli, njengobe Simakadze ayala Mosi.’ ”

Joshuwa ukhetfwa kutsi atsatse umsebenti waMosi

¹² Simakadze wakhuluma kuMosi, watsi: “Yenyukela eNtsabeni i-Abarimu utewubuka lelive lengiliphe ema-Israyeli.

¹³ Utawutsi ungalibona nawe bese uya kubakini, njengemnakenu Aroni,

¹⁴ ngobe ngesikhatsi bantfu bangihlubuka ngasemantini eHlane laseSini, nani nobabili nangihlubuka lapho nangete nawulalela umyalo wami, ngekunganginiki kwenu ludvumo lwekungingcwelisa embikwabo kulawo manti.” Lawo bekungemanti aseMeribha, eKhadeshi, eHlane laseSini.

¹⁵ Mosi wakhuluma kuSimakadze, watsi:

¹⁶ “Shangatsi Simakadze, Nkulunkulu wemimoya yebantfu bonkhe, angabeka lenye indvodza ibe ngumholi emkhatsini walesive,

¹⁷ iphume ingene embikwaso, isihole ngekusikhipha nekusingenisa, kuze sive saSimakadze singafani netimvu letingenamelusi.”

¹⁸ Ngako-ke Simakadze wakhuluma kuMosi, watsi: “Tsatsa Joshuwa, umsa waNuni, indvodza lenaMoya, umbeke sandla.

¹⁹ Mmise embikwa-Eleyazare, umphristi, nesive sonkhe, umbeke embikwaso.

²⁰ Mnike lamanye emagunya nemandla akho, kuze sive sonkhe sema-Israyeli sitawumlalela simhloniphe.

²¹ Utakuma embikwa-Eleyazare, umphristi, lotamtsatsela tincumo latitfole nge-Urimu kuSimakadze. Ngekukhuluma kwakhe yena nesive sonkhe sema-Israyeli bayawuphuma baphindze bangene njengekuyala kwakhe.”

²² Mosi wenta njengobe abeyalwe nguSimakadze. Watsatsa Joshuwa, wammisa embikwa-Eleyazare, umphristi, kanye nesive sonkhe.

²³ Wabeka tandla takhe etikwakhe, wamnika sikhundla, njengobe Simakadze abeyale Mosi.