Numeri 24 - Siswati 1996 Bible

¹ Ngaleso sikhatsi Bhalamu bese ati kahle kutsi kuyamjabulisa Simakadze nakabusisa lesive sema-Israyeli, ngako akazange aphindze afune letinye tibonakaliso njengakucala, kodvwa wesuka wabheka ngasehlane.

² Bhalamu watsi uyabuka wabona ema-Israyeli emisile, sive ngesive, Moya waNkulunkulu wehlela etikwakhe,

³ walayetela watsi: “Umlayeto waBhalamu, umsa waBheyori, umlayeto walowo lonemehlo labona kahle konkhe.

⁴ Umlayeto walowo lova emavi aNkulunkulu, lowo lobona umbono waSomandla, lowo lokhotsamako, lonemehlo lavulekile.

⁵ Maye mahle emathende akho, sive sakaJakobe, emakhaya lapho uhlala khona, Israyeli!

⁶ “Njengemifula lenemanti, nanjengetivandze letiseceleni kwemfula; nanjengenhlaba lehlanyelwe nguSimakadze, nanjengemisedari ngasemantini emfula,

⁷ emanti atawugeleta asuka etimbiteni takhe, nenhlanyelo yakhe itfole emanti lamanyenti. “Inkhosi yabo iyawuba yinkhulu kuna-Agagi, nembuso wabo uyawuphakanyiswa.

⁸ Nkulunkulu wabakhipha eveni laseGibhithe, unjengenyatsi lenemandla kubo. Bayakudla tive letititsa tabo, bephule ematsambo ato abe timvutfu, bagwaze leto tive ngetikhali.

⁹ Njengelibhubesi bayahoshoba bacambalale phansi, yebo, nanjengelibhubesi lelisikati, ngubani nje longacala abavuse? “Ababusiswe labo labakubusisako, bacalekiswe labo labakucalekisako!”

¹⁰ Lulaka lwaBhalaki lwamvutsela kamatima Bhalamu, washaya tandla takhe, watsi kuye: “Ngikulandzele kutsi utewucalekisa titsa tami, kodvwa wena sewutibusise kwaze kwaba katsatfu.

¹¹ Nyamalala nyalo ubuyele ekhaya lakho; bengitsi ngitakubonga ngesibongo lesihle, kodvwa Simakadze ukwalele kutsi utfole lesibongo.”

¹² Bhalamu watsi kuBhalaki: “Angititjelanga yini letigijimi lewawutitfumele kimi, ngatsi kuto:

¹³ ‘Ngisho nome ngabe Bhalaki anganginika sigodlo sakhe sigcwele isiliva negolide, bengingeke ngitentele lutfo lolusuka kimi, lokuhle nome lokubi, lokuphambene nemyalo waSimakadze. Ngitakusho kuphela loko lokushiwo nguSimakadze.’ ”

Umlayeto wekugcina waBhalamu

¹⁴ “Sengiyancandzeka ngibuyela eveni lakitsi, kodvwa kota lapha ngikutjele kutsi yini letakwentiwa ngulesive kulesive sakho kulamalanga letako.”

¹⁵ Walayetela, watsi: “Umlayeto waBhalamu, umsa waBheyori, umlayeto walowo lonemehlo labona kahle konkhe.

¹⁶ Umlayeto walowo lova emavi aNkulunkulu, lowo lonelwati loluvela kuLosetikwako Konkhe, lowo lobona umbono waSomandla, lowo lokhotsamako, lonemehlo lavulekile.

¹⁷ “Ngiyambona, noko, hhayi nyalo; ngibuke kuye, noko, akekho edvute. Inkhanyeti iyawuvela kuJakobe, intfonga yebukhosi iyawumila ka-Israyeli, uyawupitjita tinhloko tesive sakaMowabi, tinkhakhayi tawo onkhe emadvodza akaShethi.

¹⁸ Edomu uyawuncotjwa; Seyiri, sitsa sakhe, naye uyawuncotjwa, kodvwa Israyeli uyawukhula abe nemandla.

¹⁹ Umbusi uyawuvela kuJakobe abhubhise bonkhe lababesele nakuhlaselwa lelo dolobha.”

²⁰ Bhalamu wabona Amaleki, wase ubeka umlayeto wakhe, watsi: “Amaleki waba wekucala etiveni tonkhe, kodvwa, noko ekugcineni uyawubhubha.”

²¹ Waphindza wabona emaKheni, wase ubeka umlayeto wakhe utsi: “Emakhaya akho avikelekile, sidleke sakho sakhelwe edvwaleni.

²² Noko nine maKheni niyawubhujiswa ngesikhatsi nitfunjwa ngu-Ashuri.”

²³ Walayetela futsi watsi: “Awu! Ngubani nje longaphila, Simakadze nase acala kwenta loku?

²⁴ Imikhumbi iyawuchamuka elusentseni lwelwandle eKhithimu, imncobe Ashuri na-Ebheri, noko, naye uyawubhujiswa.”

²⁵ Bhalamu wesuka wancandzeka wabuyela eveni lakubo, naBhalaki watsatsa yakhe indlela.