Nehemiya 2 - Siswati 1996 Bible

Kuya kwaNehemiya eJerusalema

¹ Ngenyanga yaNisani, emnyakeni wema-20 wekubusa kwenkhosi Athazeksesi, ngesikhatsi inkhosi seyiletselwe liwayini, ngalitsatsa leliwayini ngaliniketa inkhosi. Ngangingazange sengibonakale ngingulodzabukile embikwenkhosi;

² ngako inkhosi yangibuta yatsi: “Kwentiwa yini kutsi buso bakho bubukeke bukhatsatekile, kantsi awuguli? Loku phela akusilo lutfo ngaphandle kwekudzabuka lokungekhatsi enhlitiyweni.” Ngetfuka kakhulu,

³ kodvwa ngakhuluma enkhosini ngatsi: “Lunwele loludze, nkhosi! Buso bami bungahlala kanjani bungakhatsateki, nangabe lidolobha, lapho kwalala khona bobabemkhulu, libhidlitiwe nemasango akhona asashiswe ngemlilo?”

⁴ Inkhosi yangibuta, yatsi: “Ufuna ngikwenteleni?” Ngavele ngathandaza kuNkulunkulu welizulu,

⁵ ngayiphendvula inkhosi, ngatsi: “Nangabe kukuhle enkhosini, nangabe inceku yakho izuze umusa enkhosini yayo, ngicela kutsi inkhosi ingivumele ngiye edolobheni lakaJuda, lapho kwalala khona bobabemkhulu, khona ngitawufike ngilivuse kabusha.”

⁶ Inkhosi kanye nenkhosikati leyayihleti eceleni kwayo yangibuta yatsi: “Kodvwa, lendlela yakho itakutsatsa sikhatsi lesidze kangakanani, bese ubuya nini?” Inkhosi yasijabulela lesicelo sami, ngako nami ngase ngimisa sikhatsi.

⁷ Ngachubeka ngakhuluma enkhosini, ngatsi: “Nakukuhle emehlweni enkhosi, ngicela tincwadzi lengitawufike ngitetfule kubabusi baseNshonalanga Yufrathe letibatjela kutsi ngivikeleke, ngize ngiyewufika kaJuda.

⁸ Ngicela nencwadzi leya ku-Asafa, umgcini welihlatsi lenkhosi, kutsi angiphe tingodvo tekwakha emasango enqaba leseceleni kwelithempeli kanye netekwakha lubondza lwelidolobha nendlu lengitawube ngihleti kuyo.” Njengobe sandla semusa saNkulunkulu wami sasisetikwami, inkhosi yavele yanginika konkhe loko lengangikucelile.

⁹ Inkhosi yavele yatfumela tindvuna temphi nelibutfo lelaligibele emahhashi kutsi lingiphekeletele; ngefika kubabusi baseNshonalanga Yufrathe, ngabanika letincwadzi tenkhosi.

¹⁰ Kwatsi kube boSanbalati, umHoroni, naThobiya, indvuna yaka-Amoni, beve kutsi kukhona umuntfu lotewusebenta asite ema-Israyeli, bakhatsateka kakhulu etinhlitiyweni.

Kuhlolisiswa kwelubondza lwaseJerusalema nguNehemiya

¹¹ Ngaya eJerusalema, ngahlala emalanga lamatsatfu,

¹² ngingatjeli muntfu kutsi Nkulunkulu ungitfume kutsi ngitekwentani eJerusalema. Ngangivuka ebusuku ngihambe nemadvodza lambalwa. Sifuyo lesasinaso bekungulembongolo lengangiyigibele kuphela.

¹³ Kwakutsi ebusuku ngivuke ngihlole lubondza lwaseJerusalema lolwase lubhidlitiwe nemasango akhona labesashiswe ngemlilo; ngangiphuma ngeliSango Lesigodzi ngicondze ngaseMtfonjeni Wemphungutja nangaseSangweni Lebulongo.

¹⁴ Ngangisuka lapho ngicondze ngaseSangweni Lemtfombo nangaseChibini Lenkhosi, noko lembongolo lengangiyigibele yehluleka kutfola indlela ngenca yemfuhlumfuhlu leyayivimbe indlela,

¹⁵ ngako ngenyusa sigodzi sasemfudlaneni iKhidroni ebusuku, ngihlola lubondza. Ekugcineni ngancandzeka ngabuye ngangena ngeliSango Lesigodzi.

¹⁶ Letindvuna letatilapho tatingati kutsi ngiyephi nekutsi ngentani, ngobe kuze kube ngungaleso sikhatsi ngangisengakawatjeli lutfo emaJuda, nebaphristi, nalabahloniphekile, netindvuna kanye nabo bonkhe labanye lababetakuwenta lomsebenti.

¹⁷ Ngakhuluma kubo ngatsi: “Kambe niyayibona yini lenhlupheko lesikuyo ngekutsi iJerusalema ibhidlitwe nemasango ayo ashiswe ngemlilo? Wotani sitekwakha kabusha lubondza lweJerusalema kuze singabi nelihlazo.”

¹⁸ Ngachubeka ngabatjela futsi nangesandla semusa saNkulunkulu wami lebesisetikwami nekutsi inkhosi ikhulume yatsini kimi. Bona bangiphendvula batsi: “Asivele sicalise nyalo kwakha kabusha.” Ngako bavele bacalisa kuwenta lomsebenti lomuhle.

¹⁹ Kwatsi kube boSanbalati, umHoroni, naThobiya, indvuna yaka-Amoni, kanye naGeshemu, um-Arabu, bakuve loko, basiphukuta basihhalatisa, batsi: “Yini-ke lena lesenicale kuyenta? Senivukela inkhosi yini?”

²⁰ Ngabaphendvula ngatsi: “Nkulunkulu welizulu utasiphumelelisa. Ngako-ke, tsine tinceku takhe sitawusukuma sicale kwakha, kodvwa nine aninasabelo, nalungelo, nabuhlobo natsi ngeJerusalema.”