Nahume 3 - Siswati 1996 Bible

Maye kuwe, Nineve!

¹ Maye kulo lidolobha lengati leligcwele emacebo, naleligcwele imphango, nalelingabesweli bantfu lekubahlupha.

² Ase nilalele kubhoma kwesiswebhu, nebuklekekleke bemasondvo, nebugidzigidzi bemahhashi, nebunsegensege betincola temphi.

³ Bagibeli bemahhashi bayajijimeta, kumanya tinkemba, tikhali bumengemenge. Imphi yatfolana etulu, kwadzindzibala tindvundvuma tetidvumbu letingeke tibalwe nekubalwa; bantfu bagijima etikwato, tiyabagila.

⁴ Konkhe loku kuye ngebunyenti benkhanuko yengwadla lebukekako, umhhunguli wabo bonkhe butsi, ingwababane leyagcilata tive ngebugwadla bayo netive tonkhe ngebutsi bayo.

⁵ Simakadze longuSomandla utsi: “Mine ngiphambene nawe, ngitawuphakamisa tidvwaba takho tibheke etulu. Tonkhe tive temhlaba ngitatikhombisa bungcunu bakho, nemibuso yemhlaba ngiyikhombise lihlazo lakho.

⁶ Ngiyawukujikijela ngemanyala, ngikuphatse dlephu, ngikwente ube yinhlekisa.

⁷ Bonkhe labakubonako bayawukubalekela, batsi: ‘INineve seyiwile, sengusemaboleleni, ingabe itawukhalelwa ngubani?’ Ngingamtfolaphi umuntfu longahle akudvudvute?”

⁸ Wena Nineve, uncono yini kuneThebesi, lekuyindlunkhulu yaseGibhithe, letungeletwe ngemanti? Lawo manti bekulubondza lwayo.

⁹ IKushe neGibhithe bekungemandla ayo lamakhulu; iPhuthi neLibhiya, bangani bayo.

¹⁰ Noko, yatfunjwa yesuswa eveni layo, yadzingiswa. Bantfwabayo labancane bashaywa baphihlitwa kuwo onkhe emakona etitaladi, baholi bayo bashayelwa inkatho; bonkhe bahlonishwa bayo baboshwa ngetinketane.

¹¹ Nawe-ke, Nineve, utawudzakwa, uhambe uyekubhaca, ufune kukhoseliswa titsa.

¹² Tonkhe tinqaba takho tinjengemikhiwa lenemakhiwa ayo ekucala lasavutsiwe; nangabe inyakatiswa, lamakhiwa adzilikela emlonyeni walowo lowadlako.

¹³ Ase ubheke emasotja akho! Onkhe abafati nje. Emasango elive lakho, avulekele titsa takho kabanti, umlilo uyishise yonkhe imicabo yawo.

¹⁴ Khani lamanti utilungiselele kuvinjetelwa, ucinise tinqaba takho. Tsatsa inhlabatsi ubhuce ludzaka, utilungiselele, ufolome sitini.

¹⁵ Umlilo utakudlela khona lapho, nenkemba itakudla ikucedze, njengetintsetse tidla tjani, nawe umlilo utakudla ukucedze, wandze njengesikhonyane.

¹⁶ Bahwebi bakho ubandzise baba banyenti, bendlula tinkhanyeti tesibhakabhaka. Kodvwa nyalo balingise tintsetse ngekutsi bahluphulute live, bese bayabaleka.

¹⁷ Balindzi bakho bafanana nesikhonyane, netindvuna takho tinjengelibulo lesikhonyane lesihlala elubondzeni nakumakhata, kodvwa kutsi nakuphuma lilanga, sindize siye le khashane, singatiwa lapho sikhona.

¹⁸ Awu, mbusi wase-Asiriya, belusi bakho bayetela, kantsi netakhamiti takho letihloniphekile setilele kokuphela. Bantfu bakho basakateke bagcwala tintsaba, kute nalongahle abagcogce babuye ekhaya.

¹⁹ Kute lokungelapha lesilondza sakho, lelinceba lakho linengati yekufa. Bonkhe labo labeva letindzaba takho bagidza batibetsele. Utsi ukhona nje lowase waphunyula wasindza kulolunya lwakho lolungenamkhawulo?