Makho 7 - Siswati 1996 Bible

Emasiko abokhokho

¹ BaFarisi kanye naletinye tati temtsetfo babutsana kuJesu, baphuma eJerusalema.

² Babona kutsi bafundzi bakhe badla ngetandla letatingakagezwa, letatingcolile ngekwelisiko lebuJuda.

³ Phela baFarisi, njengemaJuda onkhe, bebasabambelele kakhulu emasikweni abokhokho babo, babengadli bangakagezi tandla.

⁴ Ngisho nekudla lokuphuma etimakethe bebangakudli bangakakuhlambululi. Kukhona nalamanye emasiko labawagcinako, njengekugezwa kwetinkomishi, nekwemabhodo, nekwetindishi telitfusi.

⁵ Ngako-ke baFarisi netati temtsetfo babuta Jesu batsi: “Kwentiwa yini lokutsi bafundzi bakho bangawenti emasiko abokhokho, kodvwa besuke badle nje ngetandla letingcolile?”

⁶ Jesu wabaphendvula watsi: “Hho, kantsi abecinisile Isaya umphrofethi ngesikhatsi aphrofetha ngani, batentisi-ndzini, nakatsi: “ ‘Lesive singidvumisa ngetindzebe temilomo, kepha tinhlitiyo taso tikhashane nami.

⁷ Bangikhonta ngelite, ngobe bafundzisa imitsetfo leshaywe bantfu, bente shangatsi iphuma kimi!’ ”

⁸ Jesu wachubeka watsi: “Niyekela imitsetfo yaNkulunkulu nibambelele emitsetfweni yebantfu.”

⁹ Wabuye watsi kubo: “Ninemacebo lahlakaniphile ekulahla imiyalo yaNkulunkulu, khona nitewubambelela emasikweni enu.

¹⁰ Mosi watsi: ‘Hlonipha uyihlo nenyoko,’ nekutsi: ‘Umuntfu lowetfuka uyise nome unina, akabulawe afe.’

¹¹ Kodvwa nine nitsi: ‘Umuntfu nakanelutfo langahle asite ngalo uyise nome unina, kepha bese utsi: “Sekuyikorbani”,’ (lokusho kutsi sekwehlukaniselwe Nkulunkulu),

¹² ‘lowo muntfu akasavumeleki kutsi asite unina nome uyise ngaleyontfo.’

¹³ Ngaleyo ndlela nilenta lite livi laNkulunkulu, nilicitsa ngetimfundziso tenu temasiko leninikana wona. Kunyenti lenikwentako lokufanana naloku.”

Tintfo letingutona tingcolisa umuntfu

¹⁴ Jesu wabuye wabita sicuku lesikhulu sebantfu watsi kuso: “Lalelani nonkhe nitekuva kutsi ngitsini.

¹⁵ Kute kudla lokungena ngemlomo lokungahle kumngcolise umuntfu, kepha lokumngcolisako umuntfu nguloko lokuphuma kuye. [

¹⁶ “Lonendlebe akeve loko lengikushoko.”]

¹⁷ Kwatsi nase angene endlini asehlukene nebantfu, bafundzi bakhe bambuta batsi: “Usho kutsini lomfanekiso?”

¹⁸ Wabaphendvula watsi: “Kantsi nani nisengakangiva? Nani aniboni kutsi kute lokungena ngemlomo lokungamngcolisa umuntfu?

¹⁹ Phela kudla akuyi enhlitiyweni, kodvwa kucondza esiswini, nakhona kufike kwengce.” Ngaloko Jesu abechaza kutsi konkhe kudla kuhlantekile.

²⁰ Wachubeka watsi: “Nguloko lokuphuma ngekhatsi lokumngcolisako umuntfu.

²¹ Ngobe enhlitiyweni yemuntfu kuphuma imicabango lemibi, nebugwadla, nekuba, nekubulala,

²² nekuphinga, nekukhanuka, nekukhohlakala, nekuyengana, nemanyala, nemona, nekunyundza, nekutigcabha, nebulima.

²³ Bonkhe bubi lobunjalo buchamuka ngekhatsi kumuntfu bumngcolise.”

Kukholwa kwemfati wetive

²⁴ Jesu wesuka lapho wahamba waya esigodzini saseThire [naseSidoni]. Wefika wangena endlini wabhaca, kodvwa abengenakutifihla.

²⁵ Lomunye umfati labegulelwa yindvodzakati yakhe inelidimoni weva ngaye, weta watilahla phansi etinyaweni takhe.

²⁶ Lomfati abengewetive, angumSirofenikhe ngekutalwa. Wancusa Jesu kutsi akhiphe lelidimoni kulendvodzakati yakhe.

²⁷ Kepha Jesu watsi kuye: “Asekwenele kucala bantfwana bendlini, ngobe akukalungi kutsi sitsatse kudla kwebantfwana bendlini sikunikete tinja.”

²⁸ Kodvwa lomfati watsi kuye: “Yebo, kona Nkhosi, ucinisile; kodvwa noko netinja letingaphansi kwelitafula tiyawatfola emavutfuluka lawa kubantfwana.”

²⁹ Jesu wase utsi kuye: “Mahle emavi lowakhulumile. Ungahamba, lidimoni seliphumile endvodzakatini yakho.”

³⁰ Lomfati wahamba wabuyela ekhaya, wakhandza lendvodzakati yakhe icambalele embhedzeni, lidimoni seliphumile kuyo.

Jesu uphilisa sihhulu lesingakwati kukhuluma kahle

³¹ Jesu wesuka esifundzeni saseThire wayakujika eSidoni, wadzabula sifundza saseDekhapholisi acondze eLwandle lwaseGalile.

³² Kwaletfwa kuye indvodza lebeyisihhulu, futsi ingakhulumi nakahle. Bacela kutsi Jesu ayibeke tandla.

³³ Jesu wayehlukanisa nebantfu yaba yodvwa, wase ufaka iminwe yakhe etindlebeni tayo, wakhafula, wase utsintsa lulwimi lwayo.

³⁴ Wabheka ezulwini wabubula watsi kuyo: “Efatha,” lokusho kutsi: “Vuleka.”

³⁵ Tindlebe tayo tavuleka, ngekushesha lulwimi lwayo lwacatuluka, yase ikhuluma ngalokuvakala kahle.

³⁶ Jesu wabayala bantfu kutsi bangatjeli muntfu ngaloku. Kwaba shangatsi ubabangile, batsi besuka babe bayisakata nelive lonkhe.

³⁷ Bamangala kakhulu batsi: “Lomuntfu utenta kahle tonkhe tintfo. Wenta labangeva beve, nalabangakhulumi bakhulume!”