Makho 1 - Siswati 1996 Bible

Kushumayela kwaJohane uMbhabhatisi

¹ LiVangeli ngaJesu Khristu, iNdvodzana yaNkulunkulu, licala kanje:

² Encwadzini yemphrofethi Isaya kubhaliwe kutsi: “Nasi sigijimi sami, lengisitfumela kutsi sikuhambele embili sitekubholela indlela.

³ “Livi lalomemeta ehlane litsi: “ ‘Lungisani indlela yeNkhosi, nente imikhondvo yayo icondze.’ ”

⁴ Nangempela kwavela Johane uMbhabhatisi ehlane ashumayela bantfu atsi: “Phendvukani nibhajatiswe, Nkulunkulu utanitsetselela tono tenu.”

⁵ Bonkhe bantfu besifundza saseJudiya nebaseJerusalema babephuma bayewulalela Johane. Babetsi bangefika ababhabhatise emfuleni iJordane, bavume tono tabo.

⁶ Johane abembatsa ingubo leyayentiwe ngeboya belikamela atibophe ngelibhande lesikhumba elukhalweni, abedla tintsetse neluju lwetinyosi tesiganga.

⁷ Abeshumayela atsi: “Kukhona lota emvakwami, lonemandla kakhulu kunami. Mine angikafaneli nekutsi ngigobondzele ngitfukulule imichilo yeticatfulo takhe.

⁸ Mine benginibhabhatisa ngemanti, kepha yena utanibhabhatisa ngaMoya Longcwele.”

Kubhajatiswa kwaJesu

⁹ Kulawo malanga Jesu wefika aphuma eNazaretha yaseGalile, naye wabhajatiswa nguJohane eJordane.

¹⁰ Watsi uyaphuma nje Jesu emantini, wabona lizulu livuleka naMoya Longcwele ehlela etikwakhe anjengelituba.

¹¹ Kwevakala livi livela ezulwini litsi: “Wena uyiNdvodzana yami lengiyitsandzako. Ngiyatfokota ngawe.”

Kulingwa kwaJesu

¹² Masinyane Moya Longcwele wachubela Jesu ehlane.

¹³ Kwaphela emalanga langema-40 asehlane, alingwa nguSathane. Jesu bekahlala emkhatsini wetilwane tesiganga. Tingilosi tatimsita kuloko labekudzinga.

Jesu ucala umsebenti wakhe eGalile

¹⁴ Emvakwekuboshwa kwaJohane Jesu waya eGalile, ahamba ashumayela liVangeli laNkulunkulu.

¹⁵ Abetsi: “Sikhatsi sesifikile, umbuso waNkulunkulu sewusondzele. Phendvukani nikholwe liVangeli.”

Jesu ubita badwebi labane

¹⁶ Kwatsi Jesu asahamba agudla Lwandle lwaseGalile, wabona boSimoni bana-Andreya, umnakabo, badweba tinhlanti ngelinetha; phela bebabadwebi.

¹⁷ Jesu watsi kubo: “Ngilandzeleni, ngitawunenta nibe badwebi bebantfu.”

¹⁸ Masinyane bashiya emanetha abo, bamlandzela.

¹⁹ Jesu watsi nasachubachubekile, wakhandza boJakobe naJohane, emadvodzana aZebedi. Bebasesikebheni balungisa emanetha abo.

²⁰ Watsi kube ababone Jesu, wababita nabo, base bayamlandzela, bashiya uyise, Zebedi, asesikebheni kanye netisebenti labeticashile.

Jesu uphilisa umuntfu lonelidimoni

²¹ Bahamba-ke baze bangena eKhaphanawume. Kwatsi kube kufike liSabatha, Jesu wangena esinagogeni wafundzisa bantfu.

²² Kwabamangalisa kufundzisa kwakhe, ngobe wabafundzisa njengalonemandla, hhayi njengetati tabo temtsetfo.

²³ Masinyane kwevakala umuntfu labenelidimoni esinagogeni labo, akhala amemeta,

²⁴ atsi: “Ufunani kitsi, Jesu waseNazaretha? Sewutesibhubhisa yini? Ngiyakwati kutsi ungubani. UnguLongcwele waNkulunkulu.”

²⁵ Jesu walekhuta watsi: “Thula! Phuma kuye!”

²⁶ Lelidimoni lamklinklitisa lomuntfu, lakhala limemeta laphuma kuye.

²⁷ Bonkhe bantfu bamangala betfuka, kangangoba badzimate babutana bodvwana batsi: “Seyini-ke le? Yimfundziso lensha lenemandla. Kantsi nemadimoni uyawekhuta amlalele!”

²⁸ Masinyane tidvumo taJesu tandza nalo lonkhe laseGalile.

Jesu uphilisa bantfu labanyenti

²⁹ Base bayaphuma esinagogeni baya kaSimoni na-Andreya; bahamba naJakobe naJohane.

³⁰ Umkhwekati waSimoni abelele embhedzeni aphetfwe ngumkhuhlane. Watsi kube efike Jesu, bambikela ngaye.

³¹ Waya kuye, wamphakamisa ambambe ngesandla. Umkhuhlane wesuka kuye, waphila, wase ubalungisela kudla.

³² Kwatsi kusihlwa selishonile baletsa kuJesu bonkhe lababegula nalababephetfwe ngemadimoni.

³³ Bonkhe bantfu bakulelo dolobha babutsana ngasemnyango.

³⁴ Jesu waphilisa bantfu labanyenti lababephetfwe tinhlobonhlobo tetifo, wakhipha nemadimoni lamanyenti. Akawavumelanga emadimoni kutsi akhulume, ngobe abemati.

Kuthandaza kwaJesu nekushumayela kwakhe eGalile

³⁵ Ekuseni kusemnyama kakhulu Jesu wavuka wahamba, waphumela ngephandle kwelidolobha waya ehlane, lapho afike wathandaza khona.

³⁶ BoSimoni nalabenabo baphuma sebayawumfuna.

³⁷ Batsi kube bamtfole, bamtjela batsi: “Bonkhe bantfu bayakufuna.”

³⁸ Kepha Jesu watsi kubo: “Asichubekele kulamanye emadolobha lasedvutane kuze ngishumayele nakhona, ngobe ngulowo umsebenti wami lengiwutele.”

³⁹ Wahamba kulo lonkhe laseGalile, ashumayela emasinagogeni abo, akhipha nemadimoni.

Jesu uphilisa lilephelo

⁴⁰ Kwasondzela umuntfu labenebulephelo, wancenga Jesu aguce embikwakhe watsi: “Nkhosi, nawutsandza, ungangihlambulula.”

⁴¹ Jesu wamhawukela, welula sandla sakhe, wamphatsa watsi: “Ngiyatsandza, hlambuluka.”

⁴² Masinyane bulephelo baphela, wahlambuluka.

⁴³ Jesu wamdvonsa ngendlebe amfica,

⁴⁴ watsi kuye: “Caphelisisa-ke, ungacali ukhulume kumuntfu ngaloku; hamba uye kumphristi akuhlole, bese ukhipha umnikelo wekubonga lokuhlanjululwa kwakho, njengaloku Mosi ayala, khona bonkhe bantfu batawuciniseka kutsi uhlambulukile.”

⁴⁵ Kepha lomuntfu wahamba ayifafata lendzaba, yandza kakhulu, kangangekutsi Jesu abengasakhoni kungena nakulinye nje lidolobha abonwa bantfu. Abesatihlalela emaphandleni nje, kepha bantfu labanyenti babeta kuye bachamuka magangana onkhe.